'আগন্তুক ৫ বছৰত বি টি আৰত সকলো লোক হ'ব প্ৰথম শ্ৰেণীৰ নাগৰিক'

dainik janambhumi August 03, 2025

ডিজিটেল ডেস্ক  : '২০২১ বর্ষত মই মুখ্যমন্ত্ৰীৰ দায়িত্ব লোৱাৰ পাছৰে পৰা বি টি আৰত কেতিয়াও গুলী ফুটা নাই, বোমা বিস্ফোৰণ হোৱা নাই আৰু আইন-শৃংখলাৰ পৰিস্থিতিৰ অৱনতি ঘটা নাই। বি টি আৰলৈ শান্তি ঘূৰি আহিছে। বি টি আৰৰ ৰাইজ শান্তিত আছে। যাৰ ফলত এই অঞ্চলত উন্নতি হৈছে।'- এই ভাষ্য অসমৰ মুখ্যমন্ত্রী ড° হিমন্ত বিশ্ব শৰ্মাৰ। শনিবাৰে ওদালগুৰি জিলাৰ কলাইগাঁৱত এখন দলীয় কর্মী সভা তথা জিলা সংকল্প সভাত মুখ্যমন্ত্রীয়ে আগন্তুক বি টি আৰৰ নির্বাচনত ভাৰতীয় জনতা দলে বিগত নির্বাচনতকৈ আৰু ভাল ফলাফল দেখুৱাবলৈ সক্ষম হ'ব বুলি কয়। তেওঁ কয় 'বিগত পাঁচ বছৰত বি টি আৰলৈ শান্তি ঘুৰি আহিছে, সমন্বয় ঘুৰি আহিছে আৰু আগন্তুক পাঁচ বছৰত বি টি আৰৰ নাগৰিকে বিগত বছৰতকৈ আৰু উন্নতি দেখা পাব। 

বি টি আৰত বসবাস কৰা নাগৰিকসকলে যাতে প্রথম শ্ৰেণীৰ নাগৰিক হিচাপে জীবন-নির্বাহ কৰি থাকিব পাৰে, সেই বিষয়ত আগন্তুক বর্ষবোৰত অধিক গুৰুত্ব দিয়া হ'ব। ইয়াত বসবাস কৰা সকলো নাগৰিকে প্রথম শ্ৰেণীৰ নাগৰিক হিচাপে নিজকে চিনাকি দিবলৈ সক্ষম হ'ব। শনিবাৰৰ সভাৰ অন্তত সাংবাদিকৰ এক প্ৰশ্নৰ উত্তৰত মুখ্যমন্ত্ৰীয়ে বি টি আৰৰ নিৰ্বাচন ছেপ্টেম্বৰ মাহৰ তৃতীয় সপ্তাহত অনুষ্ঠিত হ'ব আৰু আগন্তুক দুর্গা পূজাৰ আগতে বি টি আৰত চৰকাৰ গঠন হ'ব বুলি জানিবলৈ দিয়ে। 

শনিবাৰৰ এই বিজয় সংকল্প সভাত ভাৰতীয় জনতা পার্টিৰ ৰাজ্যিক সভাপতি তথা সাংসদ দিলীপ শইকীয়া, অসম চৰকাৰৰ মন্ত্ৰী তথা ওদালগুৰি জিলাৰ অভিভাৱক মন্ত্রী পীযূষ হাজৰিকা, ছিপাঝাৰ সমষ্টিৰ বিধায়ক ড° পৰমানন্দ ৰাজবংশী, ওদালগুৰি জিলাৰ বিজেপিৰ সভাপতি সুনীল বসুমতাৰী, বি টি আৰৰ কার্যবাহী সদস্য তথা মুদৈবড়ী সমষ্টিৰ পাৰিষদ দিগন্ত বৰুৱা প্ৰমুখ্যে কেইবাজনো ৰাজ্যিক আৰু জিলা পৰ্যায়ৰ নেতা উপস্থিত থাকে। কলাইগাঁৱৰ নিকটৱৰ্তী ৰণথলী ষ্টেডিয়ামত অনুষ্ঠিত হোৱা সভাখনত ছয় সহস্রাধিক বিভিন্ন বুথ সমিতিৰ সদস্যৰ লগতে ৰাইজ উপস্থিত থাকে। ইয়াৰ পাছতে মুখ্যমন্ত্ৰীয়ে ছেৰফাং সমষ্টিৰ আন এখন বিজয় সংকল্প সভাতে অংশগ্রহণ কৰে।

Share This