শৃংখল চলিহাক সাময়িকভাৱে বিশ্রাম 'বীৰ লাচিত সেনা'ৰ

dainik janambhumi August 09, 2025

ডিজিটেল ডেস্ক : শিৱসাগৰ তথা উজনিৰ পৰা মিঞা খেদা আন্দোলন অব্যাহত থকাৰ সময়তে শুকুৰবাৰে বীৰ লাচিত সেনাৰ কেন্দ্ৰীয় প্রশাসনিক সচিব শৃংখল চলিহাক সংগঠনটোৰ পৰা এমাহৰ বাবে বিশ্রাম দিয়া হৈছে। বীৰ লাচিত সেনাৰ কেন্দ্ৰীয় মুখ্য সচিব ৰন্টু পানীফুকনে শৃংখল চলিহালৈ প্ৰেৰণ কৰা এক নির্দেশনা-পত্ৰত এই কথা প্রকাশ কৰিছে। শুকুৰবাৰৰ পৰা কাৰ্যকৰী হোৱাকৈ অহা ৮ ছেপ্টেম্বৰ পৰ্যন্ত সাময়িক বিশ্রামত থাকিব লাগিব শৃংখল চলিহা। 

এইখিনি সময়ত সামাজিক মাধ্যম, সংবাদ মাধ্যম আৰু সংগঠনৰ সকলো কাৰ্যসূচীৰ পৰা বিৰত থকাৰ নিৰ্দেশ প্রদান কৰিছে বীৰ লাচিত সেনাৰ মুখ্য সচিব গৰাকীয়ে। উক্ত নির্দেশনা-পত্ৰৰ যোগেদি এইখিনি সময়ত পৰিয়ালৰ সৈতে সময় অতিবাহিত কৰাৰ পৰামৰ্শ প্রদান কৰিছে শৃংখল চলিহাক। উল্লেখযোগ্য যে শেহতীয়াকৈ কেতবোৰ বিতর্কিত মন্তব্য কৰাৰ বাবে শৃংখল চলিহাক নিয়ন্ত্ৰণ কৰিবলৈ ৰাইজৰ দলৰ সভাপতি অখিল গগৈয়ে ৰন্টু পানীফুকনলৈ এক পত্ৰ প্ৰেৰণ কৰিছিল। 

আনহাতে, মিঞা খেদা আন্দোলনৰ নামত হিন্দু-মুছলমানৰ মাজত সংঘাত সৃষ্টি কৰাৰ পৰিৱেশ ৰচনা কৰা বুলিও চলিহাৰ বিৰুদ্ধে শিৱসাগৰত অভিযোগ উত্থাপিত হৈছিল। এনে প্রেক্ষাপটত শৃংখল চলিহাক আগন্তুক এটা মাহৰ বাবে সংগঠনটোৱে বিশ্রাম দিয়াৰ কথাই বহু তাৎপর্য বহন কৰিছে। ইফালে, দৈনিক জনমভূমিৰ সৈতে হোৱা টেলিফোনিক বার্তালাপত ৰণ্ট পানীফুকনে শৃংখল চলিহাৰ স্বাস্থ্যজনিত কিছু কাৰণৰ বাবে পৰিয়ালৰ সৈতে আলোচনা কৰি এমাহৰ বাবে এই নির্দেশনা-পত্ৰ প্ৰেৰণ কৰা হৈছে বুলি জানিবলৈ দিছে।

Share This