মানৱ-স্বাস্থ্যৰ ভাবুকি হৈ পৰিছে নকল ঔষধ, ব্যৱসায়ত ৩৫ সহস্ৰাধিক অনলাইন ফাৰ্মাচী

Dainik Janambhumi January 19, 2025

ডিজিটেল ডেস্ক : ভাৰতকে ধৰি সমগ্ৰ বিশ্বতে দ্ৰুতগতিত প্ৰসাৰিত হৈছে নকল ঔষধৰ বজাৰ৷ ইয়াৰ ফলত ৰোগীয়ে এনে ঔষধ সেৱন কৰিলেও স্বাস্থ্যৰ উন্নতি নহয়, বৰং স্বাস্থ্যৰ ক্ষতিহে কৰে৷ বিশেষকৈ অনলাইন কোম্পানীসমূহে ব্যাপক ৰূপত নকল ঔষধৰ ব্যৱসায় চলাই আছে৷ এই তথ্য প্ৰকাশ পাইছে এখন প্ৰতিবেদনত৷ প্ৰতিবেদনখনত উল্লেখ কৰা অনুসৰি সমগ্ৰ বিশ্বত ৩৫ হাজাৰতকৈ অধিক অনলাইন ফাৰ্মাচী অবৈধভাৱে চলাই থকা হৈছে৷ এই অবৈধ ফাৰ্মাচীসমূহে নকল ঔষধৰ যোগান ধৰে৷

আমেৰিকাত নকল ঔষধ প্ৰতিৰোধ সম্পৰ্কীয় এখন বাৰ্ষিক প্ৰতিবেদনত এই কথা কোৱা হৈছে৷ এলায়েন্স ফৰ ছেফ অনলাইন ফাৰ্মাচী গ্লবেল ফাউণ্ডেশ্যনৰ প্ৰতিবেদনখনত ভাৰত আৰু চীনৰ দৰে এছিয়াৰ দেশসমূহৰ ৩৬টা আগশাৰীৰ অনলাইন পাইকাৰী ঔষধ বিক্ৰেতাৰ নাম উল্লেখ কৰা হৈছে৷ এই কোম্পানীবোৰ নকল ঔষধ বিক্ৰীকে ধৰি যিকোনো ধৰণেৰে নকল ঔষধৰ সৈতে জড়িত হৈ আছে৷ অনলাইনত ঔষধ বিক্ৰী কৰা ৯৬% কোম্পানীয়ে ফাৰ্মাচীৰ বাবে থকা আইন উলংঘা কৰি অহা বুলি প্ৰতিবেদনখনত উল্লেখ কৰা হৈছে৷ এই কোম্পানীবোৰে চিকিৎসকৰ প্ৰেছক্ৰিপশ্যন নোহোৱাকৈয়ে ঔষধৰ যোগান ধৰে৷ ফাউণ্ডেশ্যনে চলোৱা সমীক্ষাৰ বিষয়ে উল্লেখ কৰি প্ৰতিবেদনখনত কোৱা হৈছে যে অনলাইনযোগে ঔষধ ক্ৰয় কৰা প্ৰতি চাৰিজন ব্যক্তিৰ এজনে ইয়াক নকল বুলি কয়৷ এই নকল ঔষধে স্বাস্থ্যৰ ক্ষতি কৰে বুলিও কোৱা হৈছে৷ যোৱা বছৰ আমেৰিকাত নকল ঔষধ সেৱন কৰি জ্ঝজন লোকৰ মৃত্যু হৈছিল৷ মন কৰিব লগীয়া যে একাংশ ফাৰ্মাচীতো জ্বৰ, বহুমূত্ৰ, ৰক্তচাপৰ পৰা আৰম্ভ কৰি কেঞ্চাৰলৈকে বিভিন্ন ৰোগৰ নকল ঔষধ বিক্ৰী কৰি অহা হৈছে৷ উল্লেখযোগ্য যে এছ’চেমে এখন প্ৰতিবেদনত উল্লেখ কৰিছিল যে ভাৰতৰ বজাৰত বিক্ৰী কৰি থকা প্ৰায় ২৫ণ ঔষধ নকলী৷ ভাৰতত প্ৰায় ৩৫২ কোটি টকাৰ নকল ঔষধৰ বজাৰ চলি আছে৷ বিশ্ব স্বাস্থ্য সংগঠনৰ মতে, বিশ্বত এই বজাৰখন প্ৰায় ১৬.৬০ লাখ কোটি টকাৰ৷

তেলেংগানাত যোৱা বছৰ কেইবা কোটি টকাৰ নকল ঔষধ জব্দ কৰা হৈছিল৷ তেলেংগানা ড্ৰাগ্‌ছ কণ্ট্ৰল এড্‌মিনিষ্ট্ৰেশ্যনে কৰা অনুসন্ধানৰ পৰা জানিব পৰা মতে, কেইবাটাও আগশাৰীৰ কোম্পানীৰ নকল ঔষধ উৎপাদন কৰা হৈছে৷ এই ঔষধবোৰৰ অধিকাংশ চকৰ গুড়ি বা  মাকৈৰ গুড়িৰ দৰে সামগ্ৰীৰে প্ৰস্তুত কৰা হৈছে৷ এমক্সিচিলিন কেপছুলৰ ভিতৰত পেৰাচিটামল পোৱা গৈছে৷ এই ঔষধসমূহ উত্তৰাখণ্ডৰ কাশীপুৰ আৰু উত্তৰ প্ৰদেশৰ গাজিয়াবাদৰ পৰা কুৰিয়াৰৰ জৰিয়তে তেলেংগানালৈ প্ৰেৰণ কৰা হৈছিল৷ উত্তৰ প্ৰদেশৰ আগ্ৰাৰ এটা কাৰখানাৰ পৰা প্ৰায় ৮০ কোটি টকাৰ নকল ঔষধ জব্দ কৰা হৈছে৷ এই ঔষধবোৰৰ ভিতৰত কেঞ্চাৰ, বহুমূত্ৰ ৰোগ, এলাৰ্জী, টোপনি অহা ঔষধ আৰু বিভিন্নধৰণৰ এণ্টিবায়’টিকো আছে৷ গাজিয়াবাদৰ এটা গুদামৰ পৰাও বৃহৎ পৰিমাণৰ নকল ঔষধ জব্দ কৰা হৈছিল৷ আনহাতে, সোণিপতৰ এটা কাৰখানাৰ পৰা ভাৰত, আমেৰিকা, ইংলেণ্ড, বাংলাদেশ আৰু শ্ৰীলংকাৰ আগশাৰীৰ সাতটা আগশাৰীৰ কোম্পানীৰ নামত থকা ২০টাতকৈ অধিক ব্ৰেণ্ডৰ নকলী ঔষধ জব্দ কৰা হৈছিল৷

আনহাতে, কেঞ্চাৰৰ চিকিৎসাত দিয়া কেম’থেৰাপীত ব্যৱহাৰ কৰা ঔষধৰ প্ৰায় চাৰি কোটি টকাৰ নকল ঔষধ জব্দ কৰা হয়৷ এই ব্ৰেণ্ডেড ইন্‌জেকশ্যনৰ খালী বটল প্ৰায় প্ত হাজাৰ টকাত ক্ৰয় কৰি ইয়াক এশ টকাৰ এণ্টিফাংগাল ঔষধ ফ্লুক’নাজল ভৰাই বজাৰত ব্ৰেণ্ডৰ দাম অনুসৰি প্ৰতিটোত ৰ-৩ লাখ টকাত বিক্ৰী কৰা হৈছিল৷ দিল্লী পুলিচে প্ৰকাশ কৰা অনুসৰি ৰাষ্ট্ৰীয় ৰাজধানীৰ কেইবাখনো নামী-দামী চিকিৎসালয়ো নকল ঔষধৰ ব্যৱসায়ত জড়িত৷

Share This