বিদেশৰ বজাৰত সমাদৰ দৰঙৰ কৃষকৰ জৈৱিক পদ্ধতিৰে উৎপাদিত পাচলিৰ

dainik janambhumi July 28, 2025

ডিজিটেল ডেস্কঃ কৃষিপ্রধান জিলা দৰঙৰ খাৰুপেটীয়া অঞ্চলৰ পাচলি উৎপাদনৰ ক্ষেত্ৰত সমগ্ৰ উত্তৰ-পূৰ্বাঞ্চলতে এক সুকীয়া পৰিচয় আছে। এই অঞ্চলৰ দুই-এক প্রগতিশীল যুৱ কৃষকৰ তৎপৰতাত ইয়াত জৈৱিকভাৱে উৎপাদিত পাচলিয়ে সম্প্রতি লণ্ডনৰ বজাৰতো সমাদৰ লাভ কৰিছে। তেনে এজন আদর্শ যুৱ কৃষকৰ নাম হবিবুৰ ৰহমান। খাৰুপেটীয়াৰ বিহুদিয়া গাঁৱৰ যুৱক। কৃষকৰ পৰিয়ালত জন্ম হোৱা হবিবুৰে হাইস্কুল শিক্ষান্ত পৰীক্ষাৰ দেওনা পাৰ কৰিয়েই পৰিয়ালৰ উপাৰ্জনত অৰিহণা যোগোৱাৰ উদ্দেশ্যে কৃষক পিতৃআব্দুল কালামৰ আদৰ্শ অনুসৰণ কৰি ২০১৩ চনত পাচলি খেতি আৰম্ভ কৰে। প্ৰায় দুবছৰ তেওঁ এই খেতিৰ সৈতে জড়িত হৈ থাকে।

কিন্তু ইয়াৰ পৰা তেওঁ লাভৰ মুখ দেখা দূৰৈৰে কথা লোকচানৰহে সন্মুখীন হয়। ঠিক এনে সময়তে অসম কৃষি বিপণন পৰিষদৰ খাৰুপেটীয়া কাৰ্যালয়ৰ উদ্যোগত গুৱাহাটীৰ চান্দমাৰিত 'কৃষকৰ দোকান' নামেৰে এক পাচলি বিক্ৰী কেন্দ্ৰ আৰম্ভ কৰা হয়। হবিবুৰে ইয়াত কাম কৰাৰ সুযোগ লাভ কৰে। ইয়াৰ সৈতে জড়িত হৈ থাকোঁতে তেওঁ জৈৱিকভাৱে উৎপাদিত পাচলিৰ বজাৰৰ চাহিদাৰ বিষয়ে জানিব পাৰে। তাত প্রায় দুটা বছৰ কাম কৰাৰ পাছতে হবিবুৰে ঘৰলৈ উভতি আহি জৈৱিক পদ্ধতিৰে পাচলি উৎপাদন কৰা আৰম্ভ কৰে। ইয়াতো তেওঁ প্রথমাৱস্থাত উপযুক্ত বজাৰৰ অভাৱৰ সম্মুখীন হয়। এনে সময়তে তেওঁ উৎপাদিত পাচলিৰ বজাৰ বিচাৰি আৰু লগতে যুৱ প্ৰজন্মক জৈৱিক পদ্ধতিৰে পাচলি উৎপাদনৰ অভিজ্ঞতাৰ বিষয়ে জনাবলৈ ফে'চবুকত প'ষ্ট দিবলৈ ধৰে।

প্রত্যাশিতভাবে এই প'ষ্টৰ প্ৰতি Dubri online shopping, Farmvilla, Local Farma App আদি বিভিন্ন প্রতিষ্ঠান, ব্যক্তিৰ পৰা সঁহাৰি লাভ কৰে। উৰহী, কেপছিকাম, বিন, গাজৰ, বিলাহী, নেমু আদি জৈৱিকভাৱে উৎপাদিত পাচলিৰ এখন প্ৰয়োজনীয় বজাৰ লাভ কৰে। ছ'চিয়েল মিডিয়াৰ আপডেটবোৰ পাই ডিব্ৰুগড়, যোৰহাট, মাজুলী, নগাঁও আদি অসমৰ বিভিন্ন স্থানৰ কৃষক, ছাত্র-ছাত্রী আনকি মহাৰাষ্ট্ৰৰ কৃষি মন্ত্ৰীও হবিবুৰৰ খেতি পথাৰ চাবলৈ বিহুদিয়া গাঁও পায়হি। এনে কথাবোৰে যুৱ কৃষক হিচাপে হবিবুৰক যথেষ্ট উৎসাহিত কৰে। এইখিনি সময়তে ডিব্ৰুগড়ৰ এজন বন্ধুৰ জৰিয়তে দৰং জিলা কৃষি বিজ্ঞান কেন্দ্ৰৰ সৈতে হবিবুৰৰ যোগসূত্ৰ স্থাপন হয়। তেওঁলোকৰ পৰা প্ৰযুক্তিগত প্রয়োজনীয় পৰামৰ্শ লাভ কৰি হবিবুৰে দুগুণ উদ্যমেৰে পাচলি খেতিৰ উপৰি উদ্যান শস্যৰ উৎপাদনত মনোনিৱেশ কৰে।

ইয়াৰ ফলস্বৰূপে ২০১৭ চনৰ ছেপ্টেম্বৰ মাহত গুৱাহাটীৰ খানাপাৰাত অনুষ্ঠিত হোৱা আন্তঃৰাষ্ট্ৰীয় কৃষি-উদ্যানশস্য প্রদর্শনীত প্ৰদৰ্শন কৰা হবিবুৰৰ আপেল বগৰীয়ে শ্রেষ্ঠ উৎপাদনৰ বঁটা লাভ কৰে। তাৰ পাছত আৰু হবিবুৰে পাছলৈ উভতি চোৱা নাই। ২০১৮ চনত হবিবুৰৰ পথাৰত উৎপাদিত উৰহী, লেচেৰা মাহ, গাজৰ আদি পাচলি প্ৰথমবাৰৰ বাবে ডুবাইলৈ ৰপ্তানি কৰা হয়। পৰৱৰ্তী সময়ত হবিবুৰৰ পথাৰত জৈৱিকভাবে উৎপাদিত পাচলিয়ে কেইবাবাৰো ডুবাইৰ বজাৰ দখল কৰে। এনে সময়ত অগ্রণী কৃষি-কৰ্মৰ জৰিয়তে হবিবুৰে নাবাৰ্ডৰ সংস্পৰ্শলৈ আহে। ২০২১ চনত এই ৰাষ্ট্ৰীয় বেংকিং প্রতিষ্ঠানৰ পৃষ্ঠপোষকতাত হবিবুৰৰ উদ্যোগতে স্থানীয় পাঁচ শতাধিক কৃষকক একত্রিত কৰি তেওঁলোকৰ উৎপাদিত পাচলিৰ উচিত মূল্য নিশ্চিত কৰাৰ লক্ষ্যৰে সেউজমুখী কৃষক উৎপাদক গোট নামৰ এটা কোম্পানী গঠন কৰা হয়।

কৃষক গোটৰ দ্বাৰা উৎপাদিত উৰহী আৰু কাজি নেমু কাইগাৰ এক্সিম প্রাঃ লিঃৰ সহায়ত ইতিমধ্যে লণ্ডনলৈ ৰপ্তানি কৰা হৈছে। হবিবুৰে শেহতীয়াকৈ আধুনিক প্রযুক্তিগত নাৰ্ছাৰী এখন স্থাপন কৰিছে য'ত উন্নত জাতৰ পাচলিৰ পুলি উপলব্ধ। তদুপৰি শীতলীকৰণ ব্যৱস্থাৰ অভাৱত কেঁচা পাচলি যাতে নষ্ট নহয় বা খাদ্য সংশাধন প্রক্রিয়াৰে মূল্য সংযোজিত কৰিব পৰা যায়, তাৰ প্ৰচেষ্টাও কৃষক উৎপাদক কোম্পানীৰ জৰিয়তে অব্যাহত ৰখা বুলি উদ্যোগী কৃষক হবিবুৰ ৰহমানে জনায়।

Share This