ডাঙৰীৰ ধাদুম পথাৰত 'দেওকৰ্চন ' পৰিভ্ৰমী পক্ষীৰ বিচৰণ 

dainik janambhumi March 07, 2025

ডিজিটেল ডেস্কঃ তিনিচুকীয়া জিলাৰ ডাঙৰী অঞ্চলৰ ধাদুম পথাৰত আপুৰুগীয়া দেওকচন চৰায়ে বিচৰণ কৰা দেখা পাই পক্ষী নিৰীক্ষকৰ দল ঢপলিয়াই অহা দেখা গৈছে। ব্লেক নেক ক্রেন থলুৱাভাৱে দেওকৰ্চন নামেৰে জনাজাত এইবিধ পৰিভ্ৰমী পক্ষীক অসমত ইয়াৰ পূৰ্বে ২০২১ চনত প্রথমে মানস ৰাষ্ট্ৰীয় উদ্যান আৰু দ্বিতীয়বাৰ ধাদুম পথাৰত দেখা বুলি তথ্য পোৱা গৈছে।

আকাৰত প্ৰায় সাধাৰণ কৰ্চন পক্ষীৰ সমানেই যদিও মূৰৰ ৰং ক'লা থকা এই 'দেওকর্চন' পক্ষী তৃতীয়বাৰৰ বাবে ধাদুম পথাৰত বিচৰণ কৰা দেখা গৈছে। দেওকচন পক্ষীৰ আগমনৰ খবৰে স্বাভাৱিকতে প্রকৃতি প্রেমী উৎফুল্লিত হৈ পৰা পৰিলক্ষিত হৈছে। এই পক্ষীবিধ প্রকৃততে কোন দেশৰ স্থায়ী বাসিন্দা এই বিষয়ে সঠিক তথ্য নাই যদিও সাগৰৰ পৃষ্ঠৰ পৰা ২৯৫০-৪৯০০ মিটাৰ উচ্চতাত ভাৰত, চিন আৰু ভুটানৰ বিশেষ কিছু এলেকাত ইয়াক দেখা পোৱাৰ লগতে তিব্বত আৰু ভূটানত বংশবিস্তাৰ কৰে বুলি জানিব পৰা গৈছে।

সম্প্ৰতি ধাদুম পথাৰত দেওকৰ্চন চৰাইৰ বিচৰণৰ খবৰ সামাজিক মাধ্যমত প্ৰচাৰ হোৱাত বিগত কেইবাদিন পুৱাৰ ভাগত দেশী-বিদেশী পক্ষী নিৰীক্ষকে ভিৰ কৰা দেখা গৈছে। দেও কৰ্চনৰ উপৰি ধাদুম পথাৰখন কনুৱা, কৰ্চন, পানীডুবি, ফুটুকী হাঁহ, কেইবা প্ৰজাতিৰো কণামুচৰি, শামুকভঙা, বৰটোকোলাকে ধৰি বিভিন্ন প্রজাতিৰ স্থানীয় আৰু পৰিভ্ৰমী চৰাইৰ বিচৰণ স্থলী। সাধাৰণতে জলাশয় আদি স্থানতহে পৰিভ্ৰমী পক্ষীৰ বিচৰণথলী হোৱা দেখা যায় যদিও ধান কটাৰ পাছৰে পৰা ধাদুম পথাৰখনৰ লগতে গাতে লাগি থকা চিৰিং পথাৰখনো পৰিভ্ৰমী পক্ষীৰ বাবে আকর্ষণীয় হোৱাৰ মূলতে এই স্থানৰ মাটিৰ গঠন বুলি অভিজ্ঞ লোকৰ পৰা জানিব পৰা গৈছে। পথাৰ দুখন দ হোৱাৰ হেতুকে খৰালিতো আর্দ্রতা অক্ষুণ্ণ হৈ থাকে।

তদুপৰি এই মাটিত যথেষ্ট পৰিমাণে চক  মিহলি হৈ থকাৰ বাবেও পৰিভ্ৰমী পক্ষীৰ বাবে আকর্ষণীয় বুলি জানিব পৰা গৈছে। এইক্ষেত্ৰত গৱেষণাৰ থল আছে বুলিও স্থানীয় ৰাইজে ব্যক্ত কৰিছে।

Share This