বিষক্ৰিয়াৰ ফলত ১২টা দুষ্প্ৰাপ্য শগুনৰ মৃত্যু! ৪টাৰ অৱস্থা সংকটজনক

Kakali Deka March 13, 2025

ডিজিটেল ডেস্কঃ কামৰূপ জিলাত বুধবাৰে ১২টা হিমালয়ান শগুন মৃত অৱস্থাত উদ্ধাৰ হয়। ইয়াৰ উপৰি চাৰিটা শগুন মৃত্যুৰ যন্ত্ৰণাত ছটফটাই থকা অৱস্থাত উদ্ধাৰ কৰা হয়। ইয়াৰে দুটা পূৰ্ণবয়স্ক আৰু দুটা পোৱালি। দুটাক তাৎক্ষণিক যত্ন লোৱাৰ বিপৰীতে আন দুটা সংকটজনক অৱস্থাত থকা শগুনক চিকিৎসাৰ বাবে ৰাণীৰ শগুন সংৰক্ষণ আৰু প্ৰজনন কেন্দ্ৰ (ভি চি বি চি)লৈ লৈ যোৱা হয়।

লাহৰীঘাটৰ ৰেঞ্জ অফিচাৰ নয়ন জ্যোতি দাসে জনোৱা মতে, শগুন উদ্ধাৰৰ প্ৰশিক্ষণপ্ৰাপ্ত সহকৰ্মীসকলে শগুণকেইটাক বমি কৰোৱাই সহায় কৰিছিল, যাৰ ফলত কিছু সকাহ পোৱা গৈছিল। জাজী গাঁৱত এই দুষ্প্ৰাপ্য প্ৰজাতিৰ শগুনকেইটা মৃত অৱস্থাত উদ্ধাৰ হয়। আমি গাঁওবুঢ়াৰ পৰা তথ্য লাভ কৰি অতি সোনকালে সেই স্থানত উপস্থিত হ’লোঁ। তাত উপস্থিত হোৱাৰ লগে লগে আমি ইয়াৰে ১২টা মাটিত মৃত অৱস্থাত পৰি থকা দেখিলোঁ আৰু বাকীকেইটা সংকটজনক অৱস্থাত আছিল। আমি নমুনা সংগ্ৰহ কৰিছো, আৰু অধিক বিশ্লেষণৰ বাবে ফৰেনছিক লেবলৈ প্ৰেৰণ কৰিছো।"

বিষয়াগৰাকীয়ে লগতে কয় যে এই বছৰ এইটোৱেই প্ৰথম ঘটনা। স্থানীয় গাঁৱৰ লোকসকলে প্ৰায়ে পশুধন (বেছিভাগেই ছাগলী)ৰ প্ৰতি ভাবুকি কঢ়িয়াই অনা বিপথগামী কুকুৰক হত্যা কৰিবলৈ প্ৰাণীৰ মৃতদেহত বিষাক্ত দ্ৰব্য ছটিয়াই দিয়ে, ফলত প্ৰাণীৰ মৃতদেহটো বিষাক্ত হৈ পৰে। দুৰ্ভাগ্যজনকভাৱে এই বিষাক্ত মৃতদেহবোৰে শগুনকো আকৰ্ষণ কৰে আৰু তাকে ভক্ষণ কৰাৰ ফলত মৃত্যুক সাবটি লয়।

দাসে কয়, "আমি বন্যপ্ৰাণী সুৰক্ষা আইনৰ অধীনত এটা গোচৰ ৰুজু কৰিছো আৰু ইতিমধ্যে আমি দায়ী ব্যক্তিসকলক গ্ৰেপ্তাৰ কৰাৰ প্ৰক্ৰিয়াত আগবাঢ়িছো। অনাগত দিনত আমি এই চৰাইবোৰৰ প্ৰয়োজনীয়তাৰ বিষয়ে ৰাইজক জ্ঞান দিবলৈ এক সজাগতা কাৰ্যসূচী গ্ৰহণ কৰিম, যিহেতু শগুন প্ৰকৃতিৰ জামাদাৰ।"

 

 

উৎস প্ৰাগ নিউজ ডিজিটেল

Share This