উচ্চতৰ মাধ্যমিকত ওপঙি আছে 'দক্ষতা' পাঠ্যক্ৰমৰ ১৬টা বিষয়

dainik janambhumi June 30, 2025

ডিজিটেল ডেস্ক : অসম ৰাজ্যিক বিদ্যালয় শিক্ষা পৰিষদে উচ্চতৰ মাধ্যমিক শাখাত 'দক্ষতা শিক্ষা' প্ৰৱৰ্তন কৰিছে যদিও এই ব্যৱস্থা বুমেৰাং হৈ পৰাৰ সম্ভাৱনাহে দেখা গৈছে। কোৱলিফিকেশ্যন ফ্রেমৱৰ্কৰ (এন এছ কিউ এফ) সংগতি নেশ্যনেল স্কীল ৰাখি ২০২৫ শৈক্ষিক বৰ্ষৰ পৰা নিয়োগৰ সুচলতাৰ প্ৰতি লক্ষ্য ৰাখি দক্ষতা শিক্ষাৰ বাবে ১৬টা বিষয় অন্তর্ভুক্ত কৰা হৈছে। দক্ষতাভিত্তিক বিষয় দিয়া হৈছে যদিও বিদ্যালয়ত নাই আন্তঃগাঁথনি, নাই অর্হতাসম্পন্ন প্রশিক্ষিত শিক্ষক, নাই স্থানীয় ভাষাৰ পাঠ্যপুথি। আঞ্চলিক ভাষাত পাঠ্যক্ৰম প্ৰস্তুতকৰণৰ ক্ষেত্রত বিদ্যালয় শিক্ষা পৰিষদ, মাধ্যমিক শিক্ষা সঞ্চালকালয়ে নির্লিপ্ত ভূমিকা গ্ৰহণ কৰাৰ অভিযোগ উত্থাপন হৈছে। 

জানিব পৰা মতে, বৃত্তিমূলক শিক্ষা আৰু নিয়োগৰ সুচলতাৰ প্ৰতি লক্ষ্য ৰাখি উচ্চতৰ মাধ্যমিকৰ পাঠ্যক্ৰমত দক্ষতাভিত্তিক বিষয়সমূহ বাধ্যতামূলক হিচাপে অন্তর্ভুক্ত কৰা হৈছে। কিন্তু আঞ্চলিক ভাষাৰ পাঠ্যপুথিৰ অভাৱ আৰু এই পাঠ্যক্রমসমূহ ফলপ্রসূভাৱে পঢ়ুৱাবলৈ প্রশিক্ষিত স্নাতকোত্তৰ শিক্ষকৰ অভাৱৰ বাবে দক্ষতা শিক্ষা বাধাৰ সম্মুখীন হোৱাৰ অভিযোগ উঠিছে। এন এছ কিউ এফৰ সংগত পাঠ্যক্রমত যি ১৬টা দক্ষতাভিত্তিক বিষয় আছে তাৰ ভিতৰত অন্তর্ভুক্ত হোৱা বিষয়বোৰ হৈছে আই টি-আই টি ই এছ, সৌন্দর্য আৰু সুস্থতা, পোছাক, গৃহসজ্জা আৰু ঘৰুৱা সামগ্ৰী, স্বাস্থ্য সেৱা, অটোমোটিভ, কৃষি আৰু ফুলৰ খেতি, ইলেক্ট্রনিক্স, খুচুৰা বাণিজ্য, ভ্রমণ, পর্যটন আৰু আতিথ্য, ব্যক্তিগত নিৰাপত্তা, কৃষি ডেইৰী, শক্তি, খাদ্য প্ৰক্ৰিয়াকৰণ, মিডিয়া আৰু মনোৰঞ্জন, টেলিকম, আৰু শাৰীৰিক শিক্ষা। ৰাষ্ট্ৰীয় শিক্ষা নীতি- ২০২০ৰ সৈতে সংগতি ৰাখি এই প্রচেষ্টা গ্রহণ কৰা হৈছে যদিও আঞ্চলিক ভাষা যেনে অসমীয়া, বাংলা, হিন্দী, বড়ো আদি ভাষাত পাঠ্যপুথি প্রস্তুত হোৱা নাই। বিদ্যালয়সমূহত দক্ষতা বিষয়ত পাঠদান কৰিবলৈ প্রশিক্ষিত শিক্ষকো নাই বুলি জানিব পৰা গৈছে। অসমৰ বৈচিত্র্যময় ভাষিক জনসংখ্যাৰ বাবে একাধিক আঞ্চলিক ভাষাত শিক্ষা প্রদান কৰি আহিছে। কিন্তু নতুনকৈ প্ৰৱৰ্তিত এন এছ কিউ এফৰ পাঠ্যপুথিসমূহ কেৱল ইংৰাজী ভাষাত উপলব্ধ। ফলত আঞ্চলিক ভাষাত শিক্ষাৰ্থীৰ ফলপ্রসূ শিক্ষণত বাধাৰ সৃষ্টি হৈছে। এই দক্ষতাভিত্তিক বিষয়সমূহ পঢ়ুৱাবলৈ, বিশেষভাৱে প্রশিক্ষিত স্নাতকোত্তৰ শিক্ষকৰ অভাৱ স্কুলে স্কুলে প্রতিফলিত হৈছে। 

সূত্র অনুসৰি, অসমৰ অধিকাংশ উচ্চতৰ মাধ্যমিক বিদ্যালয় আৰু ২২খন কস্তুৰবা গান্ধী বালিকা বিদ্যালয়ত দক্ষতা শিক্ষা প্ৰৱৰ্তন কৰা হৈছে যদিও বিষয়সমূহৰ ওপৰত অৰ্হতা থকা বিশেষজ্ঞ শিক্ষকৰ অভাৱ এক স্থায়ী সমস্যা হৈ পৰিছে। আঞ্চলিক ভাষাত পাঠ্যপুথি আৰু প্রশিক্ষিত শিক্ষকৰ অভাৱত শিক্ষাৰ্থীৰ ওপৰত তীব্র চাপ পৰিছে বুলি জানিব পৰা গৈছে। বিষয়সমূহ সৰলভাৱে বুজিবলৈ পাঠ্যপুথিৰ অনুবাদ কৰি যোগান ধৰাৰ ক্ষেত্ৰতো বিদ্যালয় শিক্ষা পৰিষদে গা-এৰা দিয়া স্থিতি লোৱাৰো অভিযোগ হৈছে। পৰিষদত পর্যাপ্ত সংখ্যক বিষয়া আৰু কৰ্মচাৰীৰে গঠিত একাডেমিক শাখা আছে। কিন্তু তেওঁলোকক দক্ষতাভিত্তিক বিষয়ৰ পাঠ্যপুথি অনুবাদৰ বাবে ব্যৱহাৰ কৰা হোৱা নাই। অসমত ড্রপআউটৰ হাৰ হ্ৰাস কৰাৰ লক্ষ্যৰে দক্ষতা শিক্ষাৰ পাঠ্যক্রম সংযোজন কৰা হৈছে যাতে আৰু শিক্ষার্থীক বিশ্বব্যাপি প্রতিযোগিতাৰ বাবে প্ৰস্তুত কৰিব পৰা যায়। কিন্তু অসমত আঞ্চলিক ভাষাৰ পাথ্যপুথি আৰু প্রশিক্ষিত শিক্ষকৰ অভাৱে এই উদ্দেশ্যসমূহক সফল কৰি তুলিব নে বুমেৰাংহে হৈ পৰিব সেই লৈ প্ৰশ্নৰ অৱতাৰণা হৈছে।

Share This