কাজিৰঙা ৰাষ্ট্ৰীয় উদ্যানত ১৭টা প্ৰজাতিৰ কাছৰ সন্ধান

dainik janambhumi January 27, 2026

ডিজিটেল ডেস্ক : কাজিৰঙা ৰাষ্ট্ৰীয় উদ্যান আৰু বাঘ সংৰক্ষিত বনাঞ্চলে ভাৰত কাছ সংৰক্ষণ কাৰ্যসূচীৰ (আই টি চি পি) সহযোগত ব্ৰহ্মপুত্ৰ নদীৰ কাষত একেৰাহে পঞ্চমবাৰৰ বাবে বাৰ্ষিক জৰীপ চলাই জলজ সৰীসৃপৰ বৈজ্ঞানিক মূল্যায়ন সম্পন্ন কৰে। য'ত মিঠা পানীৰ কাছ আৰু ভূ-প্রকৃতিৰ কাছৰ ওপৰত বিশেষ গুৰুত্ব আৰোপ কৰা হয়। ২৪জানুৱাৰীত কাজিৰঙা ৰাষ্ট্ৰীয় উদ্যান আৰু বাঘ সংৰক্ষিত বনাঞ্চলত ৰাষ্ট্ৰীয় পর্যটন দিৱসৰ প্ৰাক্ষণত আয়োজিত TRAINING WORKSHOP ON NATURAL WORLD HERITAGE SITESত এই সমীক্ষা প্রতিবেদন প্রকাশ কৰে সুস্মিতা কৰে। 

কাজিৰঙা ৰাষ্ট্ৰীয় উদ্যান তথা ব্যাঘ্র সংৰক্ষিত বনাঞ্চলৰ ক্ষেত্ৰ সঞ্চালকে জানিবলৈ দিয়া মতে, ব্রহ্মপুত্র নদীখন অঞ্চলটোৰ জৈৱ বৈচিত্র্যৰে চহকী লগতে মিঠা পানীৰ জৈৱ বৈচিত্র্যৰ হটস্পট আৰু কচ্ছপ অগ্রাধিকাৰ এলেকা হিচাপে বিশ্বজুৰি স্বীকৃতি লাভকৰাৰ উপৰি বৃহৎ সংখ্যক নদী নিৰ্ভৰশীল সম্প্ৰদায়ৰ জীৱনৰেখা হিচাপে স্বীকৃতি লাভ কৰিছে। কেৱল কাজিৰঙাৰ ভূ-প্রকৃতিতে নথিভুক্ত হোৱা ৩২টা প্ৰজাতিৰ ভিতৰত ১৭টা প্ৰজাতিৰ মিঠা পানীৰ কচ্ছপ আৰু কচ্ছপৰ আশ্রয় পোৱা যায়। ১৪-১৮ জানুৱাৰীলৈ কৰা ৰেপিড নাও জৰীপত কাজিৰঙা বাঘ সংৰক্ষিত বনাঞ্চলৰ মাজেৰে বৈ যোৱা ব্ৰহ্মপুত্ৰ নদীৰ ১৭৪ কিল'মিটাৰ অংশ সামৰি লোৱা হৈছিল আৰু ৮৭৬টা হার্ডশ্বেল কচ্ছপ আৰু ৬৯টা কোমল শ্বেল কচ্ছপকে ধৰি সাতটা প্ৰজাতিৰ অন্তৰ্গত মুঠ ৯৪৫টা মিঠা পানীৰ কচ্ছপ নথিভুক্ত কৰা হৈছে। ব্ৰহ্মপুত্ৰত্র অৱবাহিকাৰ স্থানীয় সংকটজনকভাবে বিপন্ন প্রজাতিৰ কৃষ্ণ কোমল কচ্ছপ (Nilssonia nigricans) বাসস্থান হেৰুওৱা, চিকাৰ, অতিমাত্ৰা শোষণৰ ফলত ভয়াৱহ ভাবুকিৰ সন্মুখীন হৈছে যদিও কাজিৰঙা ৰাষ্ট্ৰীয় উদ্যান আৰু নাগশংকৰ মন্দিৰত সংৰক্ষণৰ প্ৰচেষ্টাই আশাৰ সঞ্চাৰ আনিছে। 

বিশ্বনাথ জিলাৰ নাগশংকৰ মন্দিৰত-কচ্ছপ সংৰক্ষণৰ স্বীকৃতিপ্রাপ্ত আৰ্হি-কাছ মিত্ৰ নামৰ স্থানীয় লোকসকলে ব্লেক ছফ্টশ্বেলকে ধৰি ১৩টা প্ৰজাতিৰ কচ্ছপৰ আতিথ্য থকা মন্দিৰৰ পুখুৰী এটা ৰক্ষা কৰি আহিছে। কাছ মিত্ৰ নামৰ স্থানীয় লোকে নেউল, সাপ আদি প্ৰাণীৰ দ্বাৰা ভাবুকি কঢ়িয়াই অনা কাছৰ কণী সংগ্ৰহ কৰি কৃত্রিমভাৱে পোৱালি জগাই পুনৰ পানীত মেলি দিয়াৰ লগতে পোৱালি এৰি দিয়াৰ আগতে নৱজাতকৰ যত্ন লয়। বন বিভাগ আৰু টি এছ এ ফাউণ্ডেশ্যন ইণ্ডিয়াৰ সৈতে অংশীদাৰিত্বৰে কাজিৰঙাৰ বিশ্বনাথ বন্যপ্রাণী বিভাগে প্রকল্পটো আৰম্ভ হোৱাৰ পৰাই ৬০০ৰো অধিক কচ্ছপক পুনৰ সংস্থাপন কৰিছে। শেহতীয়াকৈ ২২০ টাতকৈও অধিক পোৱালিক চিলডুবি আৰু ৰৌমাৰী বিলৰ দৰে উপযুক্ত জলাশয়ত মুকলি কৰি দিছে।

Share This