জীয়াই থকাৰ হেঁপাহ হেৰুৱাই আই টি ইঞ্জিনিয়াৰ যুৱতীৰ চৰম সিদ্ধান্ত

Kakali Deka June 13, 2025

ডিজিটেল ডেস্কঃ জীয়াই থকাৰ হেঁপাহ হেৰুৱাই এগৰাকী যুৱতীয়ে কৰিলে আত্মহত্যা। যুৱতীগৰাকী পেছাত এগৰাকী আই টি ইঞ্জিনিয়াৰ আছিল। মহাৰাষ্ট্ৰৰ পুনেৰ হিঞ্জেৱাড়ীত ঘটিছে এই ঘটনা। আৱাসগৃহৰ ২১ নং মহলাৰ পৰা জঁপিয়াই আত্মহত্যা কৰে যুৱতীগৰাকীয়ে। আত্মহত্যা কৰা যুৱতীগৰাকীৰ নাম অভিলাষা ভৌচাহেব কোঠিম্বিৰে।

এগৰাকী আই টি ইঞ্জিনিয়াৰ হিচাপে সুন্দৰকৈ নিজৰ পৰিচয় গঢ়ি তুলিছিল অভিলাষাই। ২৫ বছৰীয়া অভিলাষাৰ চৰম সিদ্ধান্তত পৰিয়ালৰ লোক দুখত ভাগি পৰিছে।

আৰক্ষী বিষয়াসকলে জনোৱা মতে, ঘটনাৰ দিনটোত পুৱা প্ৰায় ৪-৩০ বজাত হিঞ্জেৱাড়ীৰ ক্রাউন গ্ৰীনছ ছ’চাইটিত উপস্থিত হয় অভিলাষা। চি চি টিভিৰ ফুটেজত দেখিবলৈ পোৱা গৈছে যে অভিলাষাই মুখত কাপোৰ বান্ধি ২১ নং মহলাৰ নিজৰ এপাৰ্টমেণ্টলৈ লিফটত উঠি যোৱা  আৰু পুৱা প্ৰায় ৪-৪২ বজাত অট্টালিকাৰ পৰা জঁপিয়াই দিয়ে।

তেওঁৰ কোঠাৰ পৰা উদ্ধাৰ হোৱা এখন ছুইচাইড নোটত লিখা আছে- ‘মোক ক্ষমা কৰিব। মই নিজৰ ইচ্ছামতে এই কাম কৰি আছোঁ। মোৰ আৰু জীয়াই থকাৰ কোনো ইচ্ছা নাই।' প্ৰাৰম্ভিক তদন্তত দেখা গৈছে যে তেওঁ হয়তো হতাশাত ভুগি আছিল।

মৰণোত্তৰ পৰীক্ষাৰ প্ৰতিবেদনত নিশ্চিত কৰা হৈছে যে তেওঁৰ শৰীৰৰ অংগত গুৰুতৰভাৱে আঘাত পাইছে। হিঞ্জেৱাড়ী থানাৰ জ্যেষ্ঠ আৰক্ষী পৰিদৰ্শক কানহাইয়া থোৰাটে নিশ্চিত কৰিছে যে এই গোচৰত আকস্মিক মৃত্যুৰ প্ৰতিবেদন দাখিল কৰা হৈছে। তেওঁ আৰু কয় যে প্ৰাৰম্ভিক তদন্তৰ সময়ত ফাউল প্লে' বা সন্দেহজনক কাৰ্যকলাপৰ কোনো লক্ষণ দেখা পোৱা নাছিল।

 

উৎস প্ৰাগ নিউজ ডিজিটেল

Share This