মাহে ৩০০ টকাকৈ দিব মেট্ৰিক পৰীক্ষাৰ্থীক

dainik janambhumi April 02, 2025

ডিজিটেল ডেস্কঃ উদ্যমী মহিলাক লাখপতি বাইদেউলৈ ৰূপান্তৰ কৰাৰ লক্ষ্যৰে ৰাজ্য চৰকাৰে হাতত লোৱা মুখ্যমন্ত্রী মহিলা উদ্যমিতা অভিযানৰ শুভাৰম্ভৰ দিনটোতে মেট্ৰিক পৰীক্ষাত অৱতীর্ণ হ'বলগীয়া শিক্ষার্থীসকলে টিউশ্যন লোৱাত সহায় হোৱাকৈ ছমাহৰ আগৰ পৰা তিনিশ টকাকৈ প্রদান কৰাৰ কথা ঘোষণা কৰে মুখ্যমন্ত্রী ড° হিমন্ত বিশ্ব শর্মাই। আজি বিশ্বনাথ জিলাৰ বিহালীৰ নিউ কেটেলা খেলপথাৰত আয়োজিত এক অনুষ্ঠানত আত্মসহায়ক গোটৰ যোগ্য মহিলালৈ দহ হাজাৰ টকাকৈ চে'ক প্ৰদানৰ আঁচনিখনৰ শুভাৰম্ভ কৰে মুখ্যমন্ত্রী ড° শৰ্মাই।

 

উল্লেখ্য যে এই অভিযানৰ অধীনত গ্রামাঞ্চলত ৩০ লাখ আৰু নগৰাঞ্চলৰ ২ লাখ মহিলা আত্মসহায়ক গোটৰ সদস্যক প্ৰাৰম্ভিক মূলধন হিচাপে এই উদ্যমিতা পুঁজি প্রদান কৰা হ'ব। বিশ্বনাথ চাৰিআলিৰ আৱৰ্ত ভৱন চৌহদত পুৱা গছপুলি ৰোপণেৰে মুখ্যমন্ত্রী ড° শৰ্মাই দিনটোৰ কাৰ্যসূচীৰ শুভাৰম্ভ কৰে। কালি তেওঁ বিশ্বনাথ চাৰিআলিত নতুনকৈ নিৰ্মাণ কৰা আৱর্ত ভৱনত উপস্থিত হৈ নিশা কটায়। আনহাতে আজি গছপুলি ৰোপণৰ সময়ত সাংবাদিকৰে হোৱা কথা-বতৰাত মুখ্যমন্ত্ৰী গৰাকীয়ে কয়, 'আচলতে মোৰ জন্মদিন হ'ল ১ ফেব্ৰুৱাৰী। যেতিয়া মই কামৰূপ একাডেমিত পঢ়িছিলোঁ মেট্রিক দিয়াৰ আগতে আমাৰ বেটছৰ সকলোৰে জন্ম দিন ১ এপ্রিল কৰি দিছিল। সেই কাৰণে মোৰ চৰকাৰী কাগজ-পত্রত জন্মদিন ১ এপ্রিল। আজি ভাল দিন আৰু ভাল দিনটোতে মহিলাসকলক স্বাৱলম্বিতাৰ বাবে ১০ হাজাৰ টকাকৈ আগবঢ়াম।' অত্যাধুনিকভাৱে বিশ্বনাথ জিলাত নির্মাণ কৰা আৱৰ্ত ভৱনৰ দৰে অসমৰ সকলো জিলাতে আৱর্ত ভৱন নিৰ্মাণ কৰিব বুলিও তেওঁ মন্তব্য কৰে।

 

বিশ্বনাথ জিলাত দুদিনীয়া কাৰ্যসূচীৰে উপস্থিত হোৱা মুখ্যমন্ত্রী ড° হিমন্ত বিশ্ব শর্মাই আজি জিলাখনৰ পাভৈত এটা স্বাস্থ্য শিবিৰ উদ্বোধন কৰে। পাভৈৰ স্বাস্থ্য শিবিৰলৈ অহাৰ বাটত পাভৈ প্রাথমিক বিদ্যালয়ৰ ছাত্ৰ-ছাত্ৰীসকলক মৰম যাচিলে মুখ্যমন্ত্রী ড° হিমন্ত বিশ্ব শর্মাই। অভিভাৱকেও জনালে আদৰণি। মামাক ওচৰত পাই উৎফুল্লিত হৈ পৰিল ছাত্ৰ-ছাত্ৰীসকল। ভৰি চুই আশিস ল'লে ছাত্র-ছাত্রীসকলে। পাভৈত উপস্থিত হৈ মুখ্যমন্ত্ৰী গৰাকীয়ে অসম চৰকাৰৰ স্বাস্থ্য আৰু কল্যাণ শিবিৰৰ শুভাৰম্ভণি কৰি কয় যে দেশত ৰোগীৰ সংখ্যা দ্রুতগতিত বৃদ্ধি পোৱাৰ প্ৰতি লক্ষ্য ৰাখি ৰাজ্যখনৰ পঞ্চায়ত আৰু গ্রামাঞ্চলসমূহত আৰু এনে বহু শিবিৰ অনুষ্ঠিত কৰা হ'ব। এই শিবিৰতে জিলাখনৰ দহগৰাকী অৱসৰপ্ৰাপ্ত আশাকর্মীক দুই লাখ টকাৰ এককালীন চে'ক প্রদান কৰে মুখ্যমন্ত্রী ড° শৰ্মাই। ইয়াৰ পাছতে মুখ্যমন্ত্রী গৰাকীয়ে পোনে পোনে ৰাওনা হয় বিহালী সমষ্টিৰ নিউ কেটলা খেলপথাৰলৈ। তাত তেওঁ ৰাজ্যৰ ভিতৰতে প্রথমে মুখ্যমন্ত্রী মহিলা উদ্যমিতা আঁচনিৰ অধীনত সমষ্টিটোৰ ২৩,৩৬৭ গৰাকী উদ্যমী মহিলাক ১০ হাজাৰ টকাৰ চে'ক প্রদান কৰে। ধনৰ সদ্ব্যৱহাৰ কৰা মহিলাক অহা বৰ্ষত ২৫ হাজাৰ টকা প্রদানৰো কথা ঘোষণা কৰে। ইয়াতে মুখ্যমন্ত্ৰীগৰাকীয়ে ঘোষণা কৰে মেট্ৰিক পৰীক্ষাৰ্থীক মাহে ৩০০ টকাকৈ দিয়াৰ গুৰুত্বপূৰ্ণ সিদ্ধান্তটো। ৩০০ টকাটো মেট্রিক পৰীক্ষাৰ্থীক টিউশ্যন ফিজ হিচাপে দিয়া হ'ব বুলিও ঘোষণা কৰে মুখ্যমন্ত্রী ড° হিমন্ত বিশ্ব শর্মাই। উল্লেখযোগ্য যে ২০২৪ চনত অনুষ্ঠিত বিধানসভাৰ উপ- নিৰ্বাচনৰ সময়ত মুখ্যমন্ত্রীয়ে বিহালী সমষ্টিত বিজেপিৰ প্ৰাৰ্থী দিগন্ত ঘাটোৱাৰৰ হৈ নির্বাচনী প্রচাৰ চলাবলৈ আহি মুখ্যমন্ত্ৰীয়ে উপ-নির্বাচনৰ পাছতে আত্মসহায়ক গোটৰ মহিলাকসকলক ১০ হাজাৰ টকাকৈ দিয়াৰ প্ৰতিশ্রুতি দিছিল যদিও বহু পলম হোৱাত বিভিন্ন পক্ষই অভিযোগ কৰিছিল যে মুখ্যমন্ত্ৰীয়ে দিয়া প্রতিশ্রুতি পূৰণ নকৰিলে।

 

এনেবোৰ চৰ্চা চলি থকাৰ মূৰকত মুখ্যমন্ত্ৰীয়ে উপ নির্বাচনত দিয়া প্রতিশ্রুতি পূৰণ কৰিবলৈ আজি উপস্থিত হয় বিহালী সমষ্টিত। বিহালী সমষ্টিত আয়োজন কৰা এখন জনসভাত মুখ্যমন্ত্রী ড° শর্মাই বিহালী সমষ্টিৰ ২৩,৩৬৭ গৰাকী মহিলাক ১০ হাজাৰ টকাৰ একোখন চে'ক প্ৰদান কৰি কেইবাটাও গুৰুত্বপূর্ণ মন্তব্য আগবঢ়ায়। মুখ্যমন্ত্ৰীৰ মন্তব্য- যিসকল সংবাদ মাধ্যমে আমাৰ আই মাতৃসকলক এই ধন নিদিয়ে বুলি প্ৰচাৰ কৰিছিল সেইসকলে এতিয়া উপলব্ধি কৰিব লাগে আৰু আমাৰ আই মাতৃ মহিলাৰ ওচৰত ক্ষমা খুজিব লাগে। লগতে মুখ্যমন্ত্রীয়ে কয় যে বিহালীৰ বৰগাঙৰ পৰাই অসমৰ আই মাতৃসকলক অসম চৰকাৰৰ উদ্যমিতা আঁচনিৰ জৰিয়তে প্রথম অৱস্থাত ১০ হাজাৰ টকা প্ৰদান কৰা হৈছে। এই দহ হাজাৰ টকাৰ লগত কোনো বেংক জড়িত নহয়।

 

এই ১০ হাজাৰ টকা আই-মাতৃসকলক চৰকাৰে প্ৰদান কৰা বুলি উল্লেখ কৰাৰ লগতে মুখ্যমন্ত্ৰীয়ে অহা বছৰ ৩০ লাখ মহিলাই দ্বিতীয় কিস্তি হিচাপে ২৫ হাজাৰ টকা লাভ কৰাৰ লগতে তৃতীয় কিস্তি হিচাপে ৫০ হাজাৰকৈ টকা লাভ কৰিব বুলি মন্তব্য কৰে। ইফালে বিধানসভাত ঘোষণা কৰা তিনিখনকৈ আঁচনি আজি বিহালীত মুখ্যমন্ত্রী হিমন্ত বিশ্ব শৰ্মাই উদ্বোধন কৰে। আনহাতে আজিৰ পৰা প্ৰতি ইউনিট বিদ্যুতত এটকাকৈ বিল ৰেহাই দিয়াৰ লগতে অহা ছেপ্টেম্বৰ, নৱেম্বৰ মাহত আৰু ১ টকাকৈ ৰেহাই দিব বুলিও উল্লেখ কৰে। ইফালে আজিৰ পৰা অসমৰ কৃষকসকলে পূৰ্বৰ প্ৰতি কুইণ্টল ধানৰ দামত ২৫০ টকাকৈ বৃদ্ধি হৈ ২৫৫০ টকা হ'ব বুলি উল্লেখ কৰে। ইফালে কৃষকৰ দ্বাৰা উৎপাদন হোৱা সৰিয়হত চৰকাৰে ৫০০ টকা বৃদ্ধি কৰাত এতিয়াৰ পৰা কৃষকে প্রতি কুইণ্টলত ৬৪৫০ টকা লাভ কৰিব বুলিও মুখ্যমন্ত্রীয়ে প্রকাশ কৰে। আনহাতে সাংবাদিক দিলোৱাৰ হুছেইন মজুমদাৰৰ পৰিয়ালটো মাটি দালালৰ লগত জড়িত হোৱাৰ লগতে তেওঁৰ জ্যেষ্ঠ ভাতৃক পূৰ্বৰ পৰাই অঞ্চলটোত মাটি দালাল বুলি সকলোবে জানে। আনহাতে সাংবাদিক দিলোৱাৰ কোনো সাংবাদিক নহয়, তেওঁ এজন ডাম্পাৰৰ মালিক বুলিও উল্লেখ কৰে মুখ্যমন্ত্ৰীয়ে।

Share This