উৰিয়ামঘাটৰ ৰেংমা বনাঞ্চলৰ ৪,০০০টা পৰিয়ালক উচ্ছেদ

dainik janambhumi August 03, 2025

ডিজিটেল ডেস্ক : গোলাঘাট জিলাৰ ৰেংমা সংৰক্ষিত বনাঞ্চলত চলি থকা বৃহৎ পৰিসৰৰ উচ্ছেদ অভিযানৰ প্ৰথম পর্যায় শনিবাৰে সফলতাৰে সম্পন্ন হয়। বিদ্যাপুৰ আৰু ২ নম্বৰ মধুপুৰত পৰিচালিত অন্তিম দিনটোৰ অভিযান সম্পূৰ্ণৰূপে শান্তিপূর্ণভাৱে আৰু প্ৰতিৰোধ নোহোৱাকৈ সম্পন্ন হয়। এই পাঁচদিনীয়া অভিযানত বিদ্যাপুৰ, পিঠাঘাট, সোণাৰিবিল টোপ, ২নং আৰু ৩নং দয়ালপুৰ, ৩নং দলনীপথাৰ, খেৰবাৰী, আনন্দপুৰ, ২নং মধুপুৰ গাঁৱৰ বহু সংখ্যক অবৈধ অধিকৃত অঞ্চলৰ হাজাৰ হাজাৰ বিঘা সংৰক্ষিত বনভূমি পুনৰুদ্ধাৰ কৰা হয় আৰু শতাধিক অবৈধ কাঠামো ভাঙি পেলোৱা হয়। শনিবাৰে প্রথম পৰ্যায়ৰ সফল উচ্ছেদ অভিযানৰ সামৰণি পৰাৰ পাছত বিদ্যাপুৰত অনুষ্ঠিত কৰা এক সংবাদমেলত বিশেষ মুখ্য সচিব এম কে যাদবে জনাই যে এই অভিযানৰ জৰিয়তে এতিয়ালৈকে প্রায় ১০ হাজাৰ বিঘা বনভূমি উদ্ধাৰ কৰা হৈছে আৰু ৪ হাজাৰৰো অধিক অবৈধ আন্তঃগাঁথনি অপসাৰণ কৰা হৈছে। 

তেওঁ লগতে উল্লেখ কৰে যে বাকী থকা বেদখল অঞ্চলসমূহৰ মূল্যায়ন আৰু পৰৱৰ্তী পৰ্যায়ৰ কাৰ্যসূচী প্ৰস্তুত কৰাৰ বাবে একাধিক অঞ্চলত ইতিমধ্যে বিশদ ভূমি জৰীপ কাৰ্য চলি আছে। তেওঁ স্পষ্টভাৱে জনাই দিয়ে যে দৈয়াং সংৰক্ষিত বনাঞ্চলৰ মেৰাপানীৰ নেঘেৰিবিল অঞ্চলত অৱস্থিত ২০৫টা পৰিয়ালক উচ্ছেদৰ বাবে জাননী জাৰি কৰা হৈছে আৰু অহা ৮ আগষ্টৰ পৰা এই উচ্ছেদ কাৰ্য আৰম্ভ হ'ব। সৰুপথাৰ সমষ্টিৰ বিধায়ক বিশ্বজিৎ ফুকনে ঘোষণা কৰে যে ৩ আগষ্টত দক্ষিণ নামবৰ সংৰক্ষিত বনাঞ্চলৰ কিছু অংশত পুনৰ উচ্ছেদ অভিযান চলিব। বিশেষকৈ গেলাজান আৰু ৩নং ৰজাপুখুৰী অঞ্চলসমূহক লক্ষ্য কৰি এই উচ্ছেদ চলিব। তেওঁ মুখ্যমন্ত্রী, বিশেষ মুখ্য সচিব, গোলাঘাট জিলা প্রশাসন, আৰু নগালেণ্ড চৰকাৰৰ সমন্বিত সহায়ৰ বাবে গভীৰ কৃতজ্ঞতা জ্ঞাপন কৰে। লগতে উল্লেখ কৰে যে ৰেংমা সংৰক্ষিত বনাঞ্চলখনে ভৱিষ্যতে ইক' টটুৰিজমৰ এক অন্যতম গন্তব্যস্থান হিচাপে পৰিগণিত হ'ব আৰু এই অভিযান অবৈধ কার্যকলাপ ৰোধৰ ক্ষেত্ৰত গুৰুত্বপূর্ণ ভূমিকা পালন কৰিব বুলি আশা কৰে।

গোলাঘাট জিলা আয়ুক্ত পুলক মহন্তই কয় যে সংশ্লিষ্ট সকলো বিভাগৰ সমন্বিত প্ৰচেষ্টাৰ ফলত এই প্রথম পৰ্যায়ৰ অভিযান শান্তিপূর্ণ আৰু সাফল্যমণ্ডিত হৈ উঠিছে। তেওঁ লগতে কয় যে ভূমি পৰ্যায়ৰ পৰ্যবেক্ষণ আৰু সুচিন্তিত ক্ষেত্ৰ পৰ্যায়ৰ পৰিকল্পনাই এই সফলতা নিশ্চিত কৰাৰ ক্ষেত্ৰত মুখ্য ভূমিকা গ্রহণ কৰিছে। জ্যেষ্ঠ আৰক্ষী অধীক্ষক ৰাজেন সিঙে সমগ্র অভিযান চলা কালত আইন-শৃংখলা বজাই ৰাখিবলৈ চি আৰ পি এফ আৰু অসম আৰক্ষীসহ সকলো আইন প্রয়োগকাৰী সংস্থাক প্রশংসা জনায়। তেওঁ সদৰী কৰে যে অভিযানৰ পূৰ্বে এই অঞ্চলসমূহত অস্ত্র-শস্ত্র, গোলাবাৰুদ আৰু নিষিদ্ধ সামগ্ৰী উদ্ধাৰ কৰা হৈছিল। লগতে কিছুমান সন্দেহজনক ব্যক্তিক গ্রেপ্তাৰো কৰা হৈছে যিয়ে উচ্ছেদ অভিযানৰ প্ৰয়োজনীয়তা আৰু সফলতা অধিক শক্তিশালী কৰি তোলে। 

উল্লেখযোগ্য যে বিশেষ মুখ্য সচিব এম কে যাদৱ, আৰক্ষী মহাপৰিদৰ্শক অখিলেশ কুমাৰ সিং, প্রধান মুখ্য বন সংৰক্ষক, জিলা আয়ুক্ত পুলক মহন্ত, জ্যেষ্ঠ আৰক্ষী অধীক্ষক ৰাজেন সিংকে ধৰি আৰক্ষী, বন বিভাগ আৰু জিলা প্ৰশাসনৰ জ্যেষ্ঠ বিষয়াসকলৰ নেতৃত্বত সমগ্ৰ অভিযান সুচাৰুৰূপে সম্পন্ন হয়। পুনৰ উদ্ধাৰ কৰা বনভূমিসমূহক এতিয়া বনানীকৰণ আৰু প্ৰাকৃতিক বাসস্থান পুনৰুদ্ধাৰ কাৰ্যসূচীৰ অধীনত অনা হ'ব। লগতে ভবিষ্যতে যিকোনো ধৰণৰ অবৈধ অধিক্রমণ ঘটিলে, বন সংৰক্ষণ আইন অনুসৰি কঠোৰ আইনী ব্যৱস্থা গ্রহণ কৰা হ'ব বুলি চৰকাৰৰ পৰা স্পষ্টভাৱে জনোৱা হৈছে।

Share This