চাইবাৰ চক্ৰৰ পৰা ৯৩ লাখ টকা উদ্ধাৰ মৰিগাঁও আৰক্ষীৰ

Rashmi August 04, 2025

ডিজিটেল ডেস্কঃ আপুনি যদি চাইবাৰ চক্ৰৰ প্ৰৱঞ্চনাৰ বলি হৈছে লগে লগে পলম নকৰি  ফ'ন কৰক ১৯৩০ লৈ। অসম আৰক্ষীৰ চাইবাৰ চেলে মুকলি কৰা এই নম্বৰত ফ'ন কৰি চাইবাৰ চক্ৰই একাউণ্টৰ পৰা লৈ যোৱা ৯৩ লাখ টকা ঘুৰাই পালে এজন ব্যৱসায়ীয়ে। 

আপুনিও পৰিব পাৰে চাইবাৰ চক্ৰৰ প্ৰৱঞ্চনাৰ জালত। হঠাত আপোনাৰ একাউণ্ট খালী কৰি চাইবাৰ চক্ৰই লৈ যাব পাৰে সকলো জমা ধন। কিন্তু এনে সময়ত বেংকৰ পৰা তেনে মেছেজ লাভ কৰা মাত্ৰকে পলম নকৰি ফ'ন কৰক অসম আৰক্ষীৰ চাইবাৰ চেলৰ ১৯৩০ নম্বৰত। আপোনাৰ তৎপৰতাৰ বাবে ঘূৰাই পাব পাৰে চাইবাৰ চক্ৰই লৈ যোৱা ধন। 

এনে এজন ভুক্তভোগীৰ তৎপৰতাত মৰিগাঁও আৰক্ষীয়ে বৃহৎ পৰিমাণৰ ধন সফলতাৰে ঘূৰাই আনিবলৈ সক্ষম হৈছে। ভুক্তভোগীৰ তৎপৰতাৰ বাবেই মৰিগাঁও আৰক্ষীয়ে চাইবাৰ অপৰাধীৰ কবলৰ পৰা উদ্ধাৰ কৰিবলৈ সক্ষম হৈছে  ৯৩ লাখ টকা । ঘটনাৰ বিবৰণি মতে  পীযোশ ক্ৰান্তি দে' নামৰ মৰিগাঁৱৰ এজন ব্যৱসায়ী কৰ্মচাৰীক টুপি পিন্ধাই  উত্তৰ প্ৰদেশৰ এটা চাইবাৰ চক্ৰই ৫ মে' তাৰিখে কৌশলেৰে সৰকাই নিছিল ৯৬ লাখকৈ টকা।

জাগীৰোডৰ এইজন ব্যৱসায়ী পীযোশ ক্ৰান্তি দে'ৰ একাউণ্টেণ্টৰ পৰা কৌশলেৰে চাইবাৰ অপৰাধী চক্ৰটোৰ সদস্যই নিজকে পীযোশ ক্ৰান্তি  দে' বুলি কৈ Whatsapp মেছেজত কথা পাতিছিল। WhatsApp ৰ ডিপিত  ব্যৱহাৰ কৰিছিল দে'ৰ ফটো। মেছেজত কথা পাতি বিশ্বাস জন্মাই লুটি নিছিল ৯৬ লাখ টকা। কিন্তু দে'য়ে বেংকৰ পৰা মেছেজ লাভ কৰা মাত্ৰকে ঘটনাৰ বুজ লৈ তৎক্ষণাৎ ১৯৩০ত ফ'ন কৰাৰ লগতে স্থানীয় আৰক্ষীক জনায়। লগে লগে মৰিগাঁও আৰক্ষীয়ে ক্ষিপ্ৰতাৰে তদন্ত আগবঢ়াই অৱশেষত ৯৬ লাখ টকাৰ ৯৩  লাখ টকা ওভতাই আনিবলৈ সক্ষম হয়। পগ্ৰেছিভ ফাৰ্তিছেম প্ৰাইভেট লিমিটেডৰ মেনেজিং ডাইৰেক্টৰ পীযোশ ক্ৰান্তি দে'য়ে আজি মৰিগাঁৱত উপস্থিত হৈ আৰক্ষীৰ এই সফলতাক প্ৰশংসা কৰাৰ লগতে দৃঢ়তাৰে কয় - এনে চক্ৰৰ প্ৰৱঞ্চনাৰ বলি হ'লে তৎক্ষনাৎ আৰক্ষীৰ কাষ চাপিবলৈ ।


উৎস : প্ৰাগ নিউজ ডিজিটেল

Share This