ভাগৱত শিৰত লৈ হৰিনামৰ অমৃত নদী বোৱালে লক্ষাধিক ভক্তই

dainik janambhumi February 09, 2025

ডিজিটেল ডেস্ক: বৰ অসমৰ স্বৰ্ণিল কৃষ্টি-সংস্কৃতি প্রতিভাত কৰি শ্ৰীমন্ত শংকৰদেৱ সংঘৰ ৯৪সংখ্যক বাৰ্ষিক অধিৱেশন উপলক্ষে উলিওৱা বিশাল ভাগৱত ভ্ৰমণ আৰু বাৰেৰহণীয়া সাংস্কৃতিক শোভাযাত্রাই জনতাক আপ্লুত কৰে। মহাপুৰুষ শ্ৰীমন্ত শংকৰদেৱৰ ধৰ্ম দর্শন, সাহিত্য-সংস্কৃতি ৰূপৰেখাৰ অনুৰূপ কাৰকসমূহ প্ৰতিফলিত হোৱা শোভাযাত্ৰাটোত অসমৰ বিভিন্ন ঠাইৰ বহু জাতি-জনগোষ্ঠীৰ লগতে লক্ষাধিক ভকত-বৈষ্ণৱে অংশগ্ৰহণ কৰে। 

পতাকা উত্তোলন কৰাৰ পাছতে পদাধিকাৰ ভৱেন্দ্ৰ নাথ ডেকাই অস্থায়ী নামঘৰৰ পৰা ভাগৱত আনি শোভাযাত্রাটো আৰম্ভ কৰে। মহাপুৰুষ শংকৰদেৱে জাতি-জনগোষ্ঠীক একেলগে লৈ বৰ অসমৰ ভেটি গঢ়াৰ দৰে আজিৰ শোভাযাত্রাটোত নগা, দেউৰী, মিচিং, ডিমাচা আদি সকলো জাতি-জনগোষ্ঠীৰে কৃষ্টি সংস্কৃতি প্রতিফলিত কৰা হয়। প্রথমে পথ পৰিষ্কাৰ বাহনে পৰিষ্কাৰ কৰাৰ পাছত দবা-কাঁহ-শংখৰ বাহনত মংগলধ্বনি পৰিৱেশন কৰে। যোৰহাট জিলা সংস্কৃতি শাখাৰ গাণিকা দলে পৰিৱেশন কৰে গায়ন-বায়ন। অসমীয়া কৃষ্টি নামঘৰ সুন্দৰকৈ তৈয়াৰ কৰি তাতে স্থাপন কৰে 'ভাগৱত'। 'মৎস্য বাহন', 'তাল সমলয়', 'ব্রহ্মা-প্ৰহ্লাদৰ স্তুতি নৃসিংহক', 'মৃদঙীয়া দল', 'ঠেঙাল কছাৰী কৃষ্টি', 'ধ্ৰুৱৰ বিষ্ণু দৰ্শন', 'ঝুমইৰ নৃত্য', 'স্বর্ণ মৃগ চক্রান্ত', 'উদ্ধৱ-শ্রীকৃষ্ণৰ আলাপ', 'মিচিং জনগোষ্ঠীৰ নৃত্য', 'হনুমন্তৰ শ্ৰীৰাম ভক্তি', 'ভোৰতাল নৃত্য', 'শুক পৰীক্ষিতৰ ভাগৱত কথা', 'নগা জনগোষ্ঠীৰ নৃত্য', 'দেউৰী জনগোষ্ঠীৰ নৃত্য', 'জিকিৰ', 'ভীষ্মৰ শৰশয্যা', 'সোণোৱাল কছাৰীৰ নৃত্য', 'আহোম কৃষ্টি', 'শংকৰদেৱ- মাধৱদেৱৰ কথন', 'নেপালী কৃষ্টি', 'বিহু', 'শিপিনী সম্ভাৰ', 'দিহানাম', 'মুখা শিল্প', 'ময়ূৰ চালি নৃত্য', 'বালী- সুগ্ৰীৱৰ যুদ্ধ', 'হালোৱা প্ৰদৰ্শন', 'জিকিৰ দল' আদি বিভিন্ন কৃষ্টি-সংস্কৃতি প্রতিফলিত কৰি উলিওৱা বাৰেৰহণীয়া সাংস্কৃতিক শোভাযাত্ৰাই জনসাধাৰণৰ মন পুলকিত কৰি তোলে।

পুৱা মূল অধিৱেশনস্থলীৰ পৰা ৰাষ্ট্ৰীয় ঘাইপথৰ পানীচকুৱা সেৱা পথেৰে শোভাযাত্ৰাটো আগুৱাই গৈ চাৰিঙীয়া তিনিআলিয়েদি বৰভেটি পথেৰে আগুৱাই বেজগাঁও হৈ পুনৰ ঘাইপথত উঠি একে পথেৰে অধিৱেশনস্থলীলৈ ঘূৰি আহে। ভাগৱত ভ্ৰমণ আৰু বাৰেৰহণীয়া শোভাযাত্রাস্থলীত কেইবা লক্ষাধিক ভক্ত, বৈষ্ণৱ উপস্থিত হৈ সুন্দৰ পৰিৱেশৰ সৃষ্টি হয়। শোভাযাত্রাটোত এশিঙীয়া গঁড়, মুগা সাজ পৰিহিতা মহিলা আদিও উলিয়ায় আদৰণী সমিতিয়ে। মহাপুৰুষ শ্ৰীমন্ত শংকৰদেৱৰ আদৰ্শ প্রতিফলিত কৰি উলিওৱা শোভাযাত্রাটোৱে লক্ষ লক্ষ জনতাৰ মন পুলকিত কৰে।

Share This