আছুৰ নতুন সাধাৰণ সম্পাদক হিচাপে নিৰ্বাচিত সমীৰণ ফুকন

Kakali Deka January 28, 2025

ডিজিটেল ডেস্ক : অৱশেষত অন্ত পৰিল বহু চৰ্চিত আছুৰ সাধাৰণ সভাৰ।সমীৰণ ফুকনক আছুৰ সাধাৰণ সম্পাদক হিচাপে ঘোষণা কৰা হয়। উল্লেখযোগ্য যে দুদিনীয়া কাৰ্যসূচীৰে শিৱসাগৰৰ ৰংপুৰত অনুষ্ঠিত হৈছে সদৌ অসম ছাত্ৰ সন্থাৰ সাধাৰণ সভা।

আছুৰ সাধাৰণ সম্পাদক শংকৰজ্যোতি বৰুৱাই পদত্যাগ কৰাৰ পিছৰে পৰা খালী হৈ আছিল সদৌ অসম ছাত্ৰ সন্থাৰ সাধাৰণ সম্পাদকৰ পদটো । চাৰ্জুন হাঞ্চেক ভাৰপ্ৰাপ্ত সাধাৰণ সম্পাদকৰ দায়িত্ব দিয়াৰ পিছত এই স্থায়ী পদটোক লৈ বহু জল্পনা-কল্পনা অব্যাহত আছিল।তাৰ মাজতেই এতিয়া ঘোষণা হ'ল নতুন নেতা সমীৰণ ফুকনৰ নাম।

ঐতিহাসিক তলাতল ঘৰৰ প্ৰাংগণত চাওলুং চ্যুকাফা সমন্বয় ক্ষেত্ৰত অনুষ্ঠিত হোৱা সাধাৰণ সভাত সমীৰণ ফুকনক সদৌ অসম ছাত্র সন্থাৰ সাধাৰণ সম্পাদক হিচাপে নিৰ্বাচিত কৰা হয়।ইফালে ছাত্ৰ নেতাগৰাকীৰ নাম ঘোষণা কৰাৰ পিছতেই এক উৎসৱমুখৰ পৰিৱেশে বিৰাজ কৰা পৰিলক্ষিত হৈছে।

ছাত্র প্ৰতিনিধিৰ লগতে শতাধিক দল-সংগঠন, অনুষ্ঠান-প্ৰতিষ্ঠান আৰু ব্যক্তিয়ে নৱনিৰ্বাচিত ছাত্রনেতাগৰাকীক অভিনন্দন আৰু শুভেচ্ছা জ্ঞাপন কৰে ।লগতে সমীৰণ ফুকনৰ নেতৃত্বত অসমৰ পুৰণি ছাত্র সংগঠনটোক এক নতুন গতি প্ৰদান কৰিব বুলি আশা ব্যক্ত কৰে সকলোৱে ।

Share This