১৫ আগষ্টৰ পাছত ধনৰ সোঁত ব'ব, দুৰ্বল বিধায়কৰ সম্ভাৱনাও উজ্জ্বল হ'ব

dainik janambhumi July 21, 2025

ডিজিটেল ডেস্ক : ২০২৬ৰ বিধানসভাৰ নিৰ্বাচনত কপাল ফুলিব এইবাৰ নতুন মুখক অগ্রাধিকাৰ
দিয়েই শাসনাধিষ্ঠিত দলটো সাজু হ'ব '২৬-ৰ নিৰ্বাচনৰ বাবে। সোণাপুৰত দেওবাৰে সমাপ্ত হোৱা বিজেপিৰ বহু চৰ্চিত চিন্তন বৈঠকৰ অন্তত এই কথা স্পষ্ট কৰি দিলে মুখ্যমন্ত্রী ড° হিমন্ত বিশ্ব শর্মাই। মুখ্যমন্ত্রীজনে কয় যে নতুন মুখ আহিবই আৰু নতুন মুখ অহাৰ ৰাস্তা কোনেও বন্ধ কৰিব নোৱাৰে। মাত্র কিমান নতুন মুখ আহিব সেয়া সময়তহে দেখা যাব বুলি মন্তব্য কৰি মুখ্যমন্ত্ৰীজনে কয় যে বহু বিধায়কে টিকট নাপায়, বহুতে নিজেই নির্বাচন নেখেলিব, বহুতৰ সমষ্টিয়েই নাইকিয়া হ'ল, সমষ্টি পুনৰ নিৰ্ধাৰণৰ ফলত বহু সমষ্টি এছ চি আৰু এছ টি হ'ল। গতিকে, এনে পৰিস্থিতিত নতুন মুখে প্রাধান্য পাবই বুলি তেওঁ কয়। অৱশ্যে, যিসকল বিধায়কৰ বৰ্তমান সমষ্টিত সংকটময় অৱস্থা চলি আছে অথচ নির্বাচন খেলি বিজেপিৰ টিকটত জয়ী হ'বলৈও প্রচণ্ড হেঁপাহ আছে সেইসকলকো এটা ভাল সুযোগ দিছে মুখ্যমন্ত্রীজনে। দেওবাৰে তেওঁ কয় যে যিসকল বিধায়ক বর্তমান ১০ শতাংশ অৱস্থাতহে আছে সেইসকলৰ সমষ্টিতো ৩২ হাজাৰ পৰিয়ালে অৰুণোদয় পাব।

৩০ হাজাৰ মহিলাই উদ্যমিতা আঁচনি পাব, ৩০ কোটি টকাৰ ৰাস্তা হ'ব আৰু ৭০০/৮০০ যুৱকে মুখ্যমন্ত্ৰীৰ আত্মনিৰ্ভৰশীল আঁচনি লাভ কৰিব। এই আঁচনিসমূহৰ সফল ৰূপায়ণ ১০ শতাংশ অৱস্থাত থকা বিধায়কজনৰ যোগ্যতা ৫০ শতাংশলৈ বঢ়াই দিব বুলি তাৎপর্যপূর্ণ মন্তব্য কৰি মুখ্যমন্ত্রীজনে কয় যে আগষ্টৰ পৰা হ'বলগীয়া চৰকাৰী আঁচনিসমূহৰ সফল ৰূপায়ণৰ ওপৰতে নিৰ্ভৰ কৰিব মন্ত্ৰী-বিধায়কৰ টিকটৰ ভৱিষ্যৎ। মুখ্যমন্ত্রীজনে স্পষ্টকৈ কয় যে একো আঁচনি এতিয়ালৈকে দিয়াই নাই আৰু দিম দিম কৈয়েই প্রথম লোক সভা আৰু তাৰ পাছত পঞ্চায়ত নিৰ্বাচনত জয়লাভ কৰিলে। বিগত ৪ বছৰ ধৰি পুঁজি জমা কৰি এতিয়া আঁচনি দিব পৰা অৱস্থা হ'ল বুলি উল্লেখ কৰি মুখ্যমন্ত্ৰীয়ে কয় যে দিম দিম বুলি কৈ থকা আঁচনিবোৰ আগষ্টৰ পৰা দিয়া আৰম্ভ হ'ব। 

১৫ আগষ্টৰ পৰা যেতিয়া চৰকাৰী আঁচনিৰ ধনৰ সোঁত ব'বলৈ আৰম্ভ কৰিব এই ধন আৰু অন্যান্য সা-সুবিধাবোৰ যাতে সঠিক মানুহৰ হাতত পৰেগৈ তাৰ বাবে মুখ্যমন্ত্রীজনে একপ্ৰকাৰ আজিয়েই দায়বদ্ধ কৰি দিলে '২৬-ৰ টিকটৰ আশাত থকা বিজেপিৰ মন্ত্ৰী-বিধায়কসকলক। আৰু তেওঁ নিশ্চিত যে আন নহ'লেও আকৌ টিকট পোৱাৰ আশাতে মন্ত্রী-বিধায়কসকলে সর্বোচ্চ উজাৰি দিব। সেয়েহে, মুখ্যমন্ত্রীজনে আজি দৃঢ়তাৰে কয় যে অনাগত দিনত ৰাইজৰ অধিক আস্থা জয় কৰি শাসকীয় দলটো '২৬-ৰ নিৰ্বাচনৰ বাবে প্রস্তুত হ'ব।

Share This