অগপই বিজেপিৰ সংগ নেৰে

dainik janambhumi July 23, 2025

ডিজিটেল ডেস্ক : অগপই বিজেপিৰ সংগ নেৰে। সুখে-দুখে দুয়োটা দল একেলগেই থাকিব। মঙলবাৰে নতুন দিল্লীত বিজেপিৰ ৰাষ্ট্ৰীয় সভাপতি জগত প্রকাশ নড্ডাক সাক্ষাৎ কৰি এই বার্তা দিলে অগপৰ শীর্ষ নেতৃত্বই। আঞ্চলিক দলটোৰ সভাপতি অতুল বৰা, কার্যকৰী সভাপতি কেশৱ মহন্ত, দুই সাংসদ ক্রমে বীৰেন্দ্র প্রসাদ বৈশ্য আৰু ফণীভূষণ চৌধুৰীক লৈ গঠিত দলটোৱে বিজেপিৰ সভাপতিগৰাকীক দেখা কৰি ৰাজ্যৰ ৰাজনৈতিক পৰিস্থিতিৰ সন্দর্ভত আলোচনা কৰে।

জানিব পৰা মতে বৈঠকত অগপৰ নেতৃত্বই অনাগত বিধানসভাৰ নিৰ্বাচন দুয়োটা দলে একত্রিতভাৱে খেলাৰ প্রতিশ্রুতি দিয়াৰ লগতে ৰাজ্য চৰকাৰখনে কৰি অহা কাম-কাজৰো এক খতিয়ান দাঙি ধৰে। উল্লেখযোগ্য যে প্রায় এটা দশক ধৰি বিজেপিৰ মিত্ৰ দল ৰূপে নির্বাচন খেলি অহা অগপই অনাগত বিধানসভাৰ নিৰ্বাচনৰ বাবে ইতিমধ্যে ৰাজ্যজুৰি দলীয় কাম-কাজ আৰম্ভ কৰিছে। প্রতিখন জিলাতে সভা-সমিতি অনুষ্ঠিত কৰি আঞ্চলিক দলটোৱে নিজৰ সাংগঠনিক ভেটি সবল কৰাৰ চেষ্টা চলাইছে। আনহাতে ৰাজ্যিক বিজেপিৰ নেতৃত্বয়ো অগপৰ সৈতে মিত্রতা অক্ষুণ্ণ থাকিব বুলি বিভিন্ন সময়ত প্রকাশ কৰি আহিছে। এনে সময়তে কালি নতুন দিল্লীত অগপৰ নেতৃত্বই বিজেপিৰ ৰাষ্ট্ৰীয় সভাপতিগৰাকীক দেখা কৰা কাৰ্য লক্ষণীয় হৈ পৰিছে।

ইফালে অগপৰ সভাপতি অতুল বৰাই এই সাক্ষাৎ সৌজন্যমূলক আছিল বুলি উল্লেখ কৰি কয়, 'বিজেপি নেতৃত্বাধীন এন ডি এ মিত্রশক্তিৰ দীর্ঘদিনীয়া অংশীদাৰ হিচাপে অসম গণ পৰিষদে অসমৰ সৰ্বাংগীণ উন্নয়ন, সমৃদ্ধি ত্বৰান্বিত কৰা আৰু জনসাধাৰণৰ সামগ্রিক কল্যাণৰ বাবে নতুন উদ্যমেৰে কাম কৰি আহিছে। বিজেপি-অগপ মিত্রজোঁটে অসমৰ সৰ্বস্তৰৰ জনসাধাৰণৰ আশা-আকাংক্ষাক গুৰুত্বসহকাৰে লৈ ৰাজ্যখনত স্থায়ী শান্তি, প্রগতি আৰু সমৃদ্ধি সুনিশ্চিত কৰাৰ বাবে দৃঢ়তাৰে একেলগে কাম কৰি যোৱাৰ সংকল্প লৈছোঁ।'

Share This