২২ জুনৰ পৰা কামাখ্যাত অম্বুবাচী মেলা

dainik janambhumi June 03, 2025

ডিজিটেল ডেস্ক : আগন্তুক ২২ জুনৰ পৰা মা কামাখ্যাধামত অনুষ্ঠিত হ'ব অম্বুবাচী মেলা। আনহাতে এইবাৰ অম্বুবাচী মেলাৰ পৰিৱৰ্তে মহা অম্বুবাচী মহাযোগ নাম দিয়া হৈছে। ৪.৫৫ কোটি টকা বাজেটেৰে এইবাৰ অনুষ্ঠিত হ'ব মহা অম্বুবাচী মহাযোগ। আনহাতে এইবাৰৰ অম্বুবাচী মেলা ভি আই পি আৰু ভি ভি আই পি মুক্ত হ'ব। সোমবাৰে এইকথা ঘোষণা কৰে পৰ্যটন মন্ত্ৰী ৰঞ্জিত কুমাৰ দাসে। সমাগত অম্বুবাচী মেলাক লৈ অসম পর্যটন। বিভাগ সম্পূর্ণ সাজু হোৱা বুলি উল্লেখ কৰি মন্ত্ৰী দাসে পল্টনবজাৰস্থিত অসম পর্যটন বিভাগৰ কাৰ্যালয়ত অনুষ্ঠিত এক সংবাদমেলত কয় যে এইবাৰৰ অম্বুবাচী সফল কৰিবলৈ ২৪টা বিভাগলৈ নির্দেশনা দিয়া হৈছে। 

তেওঁ কয় যে অহা ২২ জুনৰ পৰা ২৬ জুনলৈ শক্তিপীঠ কামাখ্যাধামত মহা অম্বুবাচী মহাযোগ অনুষ্ঠিত হ'ব। ২২ জুনৰ দুপৰীয়া ২-৫৬ বজাত অম্বুবাচীৰ প্ৰবৃত্তি আৰু ২৬ জুনৰ পুৱতি নিশা ৩ বজাত অম্বুবাচীৰ নিবৃত্তি হ'ব বুলি তেওঁ প্রকাশ কৰে। মন্ত্ৰীজনে কয় যে এইবাৰৰ অম্বুবাচী মেলা অনুষ্ঠিত কৰিবৰ বাবে চৰকাৰে মুঠ ৪.৫৫ কোটি টকা বাজেট ধাৰ্য কৰিছে। আনহাতে এইবাৰৰ মেলা ভি আই পি আৰু ভি ভি আই পিমুক্ত হ'ব বুলিও মন্ত্রীজনে ঘোষণা কৰে। এইবাৰ মহা অম্বুবাচী মেলাত ৭ লক্ষাধিক ভক্তৰ সমাগম হ'ব বুলি মন্ত্ৰী ৰঞ্জিত কুমাৰ দাসে আশা প্রকাশ কৰে। তেওঁ কয় যে যোৱাবাৰ মেলালৈ প্রায় ৭ লাখ ভক্ত-দর্শনাৰ্থীৰ সমাগম হৈছিল। এইবাৰ অধিক বৃদ্ধি পাব বুলি তেওঁ আশা প্রকাশ কৰে। আনহাতে প্ৰতিগৰাকী ভক্ত-দর্শনার্থীকে মাত লগাবলৈ এটা বিশেষ কোষ স্থাপন কৰা হ'ব বুলিও তেওঁ কয়। ইয়াৰ সমান্তৰালভাৱে দেশত ক্ৰমাৎ কভিডৰ সংক্ৰমণ বৃদ্ধি পোৱাৰ কথা উল্লেখ কৰি তেওঁ সময়ত কভিডৰ প্ৰট'কল আহিলে মানিব লাগিব বুলিও কয়। 

মন্ত্রী দাসে অহা ৯ জুনত কামাখ্যাত অম্বুবাচী সম্পর্কীয় সকলো চূড়ান্ত সিদ্ধান্ত গ্রহণ কৰা হ'ব বুলিও প্রকাশ কৰে। অম্বুবাচী সফল কৰিবলৈ ইতিমধ্যে ২৪টা বিভাগলৈ নির্দেশনা দিয়া হৈছে বুলিও তেওঁ কয়। আনহাতে এইবাৰ অম্বুবাচী মেলাত তলৰ গে'টৰ পৰাই ছেণ্ডেল-জোতা নিয়া নিষেধ কৰা হ'ব। ভক্তসকলক অম্বুবাচীৰ সময়ছোৱাত মন্দিৰলৈ জোতা-ছেণ্ডেল পিন্ধি নাযাবলৈয়ো আহ্বান জনাই মন্ত্রী দাসে ভক্তসকলক কেৱল মোজা পিন্ধিহে যাবলৈ আহ্বান জনায়। ভক্তসকলৰ সুবিধা হোৱাকৈ কামাখ্যাৰ মূল গে'টৰ পৰা পথত কার্পেট পাৰি দিয়াৰ লগতে ঠায়ে ঠায়ে খোৱা পানীৰো ব্যৱস্থা কৰা হ'ব বুলি মন্ত্ৰীজনে প্রকাশ কৰে। ভক্তসকলৰ বাবে এতিয়ালৈকে ৪টা শিবিৰৰ ব্যৱস্থা কৰা হৈছে বুলিও তেওঁ কয়। 

আনহাতে এইবাৰ দুটা পথেৰে মেলালৈ যাব পাৰিব বুলি উল্লেখ কৰি মন্ত্ৰীজনে কয় যে বতৰ বেয়া হ'লে পাণ্ডুৰ ৰাস্তা বন্ধ কৰা হ'ব। ইফালে ২৬ আৰু ২৭ জুনত ভক্তই। মেলালৈ যাবৰ বাবে পাছ নাপাব বুলিও তেওঁ ঘোষণা কৰে। উল্লেখযোগ্য যে সোমবাৰে পর্যটন সঞ্চালকালয়ত অম্বুবাচী মেলা সম্পর্কত পৰ্যটন মন্ত্ৰী ৰঞ্জিত দাসৰ অধ্যক্ষতাত এখন পর্যালোচনা বৈঠক অনুষ্ঠিত হয়। বৈঠকত গুৱাহাটী মহানগৰ জিলাৰ প্ৰশাসনিক মুৰব্বী, কামাখ্যা মন্দিৰ পৰিচালনা সমিতিৰ উপৰি গৃহ আৰু পৰিবহণ বিভাগৰ শীৰ্ষ বিষয়ায়ো অংশ গ্ৰহণ কৰে।

Share This