ইণ্ডিয়া বুক অব্ ৰেকৰ্ডৰ অধিকাৰী হ'ল ৮৭ ফুটৰ সু-বৃহৎ জাপি

Dainik janambhumi February 01, 2025

ডিজিটেল ডেস্ক: অসম সাহিত্য সভাৰ ৭৭সংখ্যক পাঠশালা অধিৱেশনৰ বাবে প্ৰস্তুত কৰি উলিওৱা জাপিয়ে ইণ্ডিয়া বুক অব্ ৰেকৰ্ডছৰ অধিকাৰী হ'বলৈ সক্ষম হয়। উল্লেখযোগ্য যে সমগ্ৰ অসম তথা দেশৰ ভিন্ন প্ৰান্তৰ সাহিত্যপ্রেমীক আদৰিবলৈ অধিৱেশনৰ প্ৰদৰ্শনী উপ-সমিতিয়ে প্রস্তুত কৰি উলিয়াইছে অসমীয়া সংস্কৃতিৰ অন্যতম চানেকি হিচাপে পৰিচিত ৮৭ ফুট পৰিসৰৰ এটা সু-বৃহৎ জাপি।ইণ্ডিয়া বুক অব্ ৰেকৰ্ডছৰ অধিকাৰী তপন দত্ত উপস্থিত হৈ সু-বৃহৎ জাপিটোক ইণ্ডিয়া বুক অব্ ৰেকৰ্ডছৰ অধিকাৰী হোৱা বুলি আনুষ্ঠানিকভাবে ঘোষণা কৰাৰ লগতে প্রমাণ-পত্ৰ প্ৰদান কৰে। বিশিষ্ট সাহিত্যিক তথা অসম সাহিত্য সভাৰ প্ৰাক্তন উপ-সভাপতি মৃণালিনী দেৱীয়ে ফিতা কাটি উদ্বোধন কৰা অনুষ্ঠানত ভাষণত দেৱীয়ে অসমীয়া ভাষাই ধ্রুপদী ভাষাৰ মর্যাদা লাভ কৰাৰ সময়তে অসম সাহিত্য সভাৰ পাঠশালা অধিৱেশনত এনেধৰণৰ থলুৱাভাৱে নিৰ্মাণ কৰি উলিওৱা জাপিয়ে অসমীয়া সংস্কৃতিক এক অনন্য ৰূপত প্রতিফলিত কৰা বুলি মন্তব্য কৰে।প্ৰতিগৰাকী অসমীয়াই যদি থলুৱা সংস্কৃতি, সভ্যতাৰ ক্ষেত্ৰত গুৰুত্ব প্রদান নকৰে তেন্তে অনাগত সময়ত ধ্রুপদী ভাষাৰ মৰ্যাদা পালেও অনাগত সময়ত অসমীয়া ভাষাৰ সংকট প্রতীয়মান হ'ব বুলি তাৎপৰ্যপূৰ্ণ মন্তব্য কৰি আদৰণী সমিতিৰ প্ৰদৰ্শনী উপ-সমিতিৰ এনে প্রয়াসৰ শলাগ জ্ঞাপন কৰে। 

প্ৰদৰ্শনী সমিতিৰ সম্পাদক সমুদ্র পাটগিৰীয়ে আঁত ধৰা আৰু কাৰ্যকৰী সভাপতি ধনজিৎ দাসে সহযোগ আগবঢ়োৱা অনুষ্ঠানত বিশিষ্ট অতিথি হিচাপে উপস্থিত থাকি মন্ত্রী জয়ন্ত মল্ল বৰুৱা আৰু অসম চৰকাৰৰ পঞ্চায়ত আৰু গ্রামোন্নয়ন বিভাগৰ সচিব মুনীন্দ্ৰ শৰ্মাই জাপি প্ৰত্যক্ষ কৰি অভিভূত হৈ পৰাৰ লগতে আদৰণী সমিতিৰ এনেধৰণৰ পদক্ষেপৰ শলাগ লোৱাৰ লগতে অনাগত দিনত সাহিত্য সভাৰ বাবে এক নিদর্শন হৈ ৰ'ব বুলি মন্তব্য কৰে। প্রণিধানযোগ্য যে পাঠশালাৰ সু-সন্তান তথা সম্প্রতি আমেৰিকা নিৱাসী বিজ্ঞানী ড° ভাস্কৰ চৌধুৰীয়ে জাপিটো নিৰ্মাণৰ বাবে সমগ্ৰ খৰচ বহন কৰা আজিৰ এই উন্মোচনী অনুষ্ঠানত উপস্থিত থাকি জাতীয় জীৱনৰ অন্যতম অনুষ্ঠান অসম সাহিত্য সভাৰ দৰে অনুষ্ঠানত উপস্থিত থাকিবলৈ পাই নিজকে ধন্য হোৱা বুলি মন্তব্য কৰে। 

অৰুণাচল প্ৰদেশৰ পৰা অনা ১৫০০টা টকৌ গছৰ পাতেৰে নিৰ্মাণ কৰা জাপিটো সাহিত্য সভাৰ পাঠশালা অধিৱেশনৰ এক অন্যতম আকৰ্ষণৰ বিন্দু হৈ পৰিছে। জাপিটো প্রত্যক্ষ কৰিবলৈ প্ৰথম দিনাই দর্শনার্থীৰ অভূতপূর্ব ভিৰ পৰিলক্ষিত হয়। জাপি নিৰ্মাণৰ বাবে নলবাৰী জিলাৰ মুগকুছিৰ ডি বি জাপি উদ্যোগৰ ১০জনীয় স্থানীয় শিল্পীৰ এটা দলে ২০ দিন ধৰি দিনে নিশাই প্ৰস্তুত কৰা এই বৃহ জাপিটোৰ টকৌপাতবোৰ অৰুণাচলৰ পৰা প্ৰতিটো পাতত ২০ টকাকৈ দি আনিব লগা হৈছে বুলি শিল্পীসকলে জানিবলৈ দিছে। জাপি নিৰ্মাণৰ লগ জড়িত হৈ থকা নলবাৰী জিলাৰ কেশৱ বৈশ্য, হিতেশ্বৰ বৈশ্য, প্রতাপ কলিত মুকুট দাস, নিপুল ৰাজবংশী, সুভাষ বৈশ্য, বুবুল কলিতা, অমৰেন্দ্ৰ বৈশ দ্বিপেন কলিতা আৰু কামেশ্বৰ কলিতাই এই বৃহৎ জাপিটো প্ৰস্তুত কৰি যথে সুখ অনুভৱ কৰা বুলি ব্যক্ত কৰাৰ লগতে জাপিটো নির্মাণত বৃহৎ সংখ্যক অসমৰ থলুৱা বাঁহ ব্যৱহাৰ কৰা হৈছে।

Share This