অসম চৰকাৰৰ কেবিনেটত গুৰুত্বপূৰ্ণ সিদ্ধান্ত ; জাগীৰোডৰ প্ৰকল্পৰ নাম হ'ব Ratan Tata Electronic City

Rashmi March 06, 2025

ডিজিটেল ডেস্কঃ অসম কেবিনেটে জাগীৰোডত আগন্তুক অৰ্ধপৰিবাহী প্ৰকল্পৰ নাম টাটা গ্ৰুপৰ প্ৰাক্তন অধ্যক্ষ প্ৰয়াত ৰতন টাটাৰ নামেৰে নামকৰণ কৰাৰ সিদ্ধান্ত গ্ৰহণ কৰিছে।

অসমৰ মুখ্যমন্ত্ৰী ড° হিমন্ত বিশ্ব শৰ্মাই সোমবাৰে কেবিনেট বৈঠকৰ অন্তত সাংবাদিকৰ আগত এই কথা জনাই কয় যে ৰতন টাটা আৰু টাটা গ্ৰুপে অসমলৈ আগবঢ়োৱা অৱদানক স্বীকৃতি দিবলৈ সমগ্ৰ অৰ্ধপৰিবাহী প্ৰকল্পটোৰ নাম ৰতন টাটা ইলেক্ট্ৰনিকছ চিটি জাগীৰোড নামেৰে নামাকৰণ কৰা হ’ব।

শেহতীয়াকৈ সমাপ্ত হোৱা এডভান্টেজ আছাম ২.০ শীৰ্ষ সন্মিলনৰ সফলতাৰ কাৰণ টাটা গ্ৰুপৰ আগন্তুক অৰ্ধপৰিবাহী প্ৰকল্পৰ বাবেও মুখ্যমন্ত্ৰীগৰাকীয়ে কয়।

উৎস: প্ৰাগ নিউজ ডিজিটেল

মৰিগাঁৱৰ জাগীৰোডত নিৰ্মাণ হ’বলগীয়া টাটা ছেমি কণ্ডাক্টৰ এছেম্বলি এণ্ড টেষ্ট প্ৰাইভেট লিমিটেড (টি এছ এ টি) প্ৰতিদিনে ৪.৮ কোটি চিপ উৎপাদন কৰিব পৰা এক ইউনিট। আনুমানিক ২৭ হাজাৰ কোটি টকা ব্যয়েৰে জাগীৰোডত নিৰ্মাণ হ’বলগীয়া অৰ্ধপৰিবাহী ইউনিটটো ভাৰতৰ অন্যতম বৃহৎ অৰ্ধপৰিবাহী নিৰ্মাণ স্থান হ’ব আৰু ইয়াৰ জৰিয়তে অসমত ৩০ হাজাৰ প্ৰত্যক্ষ কৰ্মসংস্থাপনৰ সুযোগ পোৱাৰ সম্ভাৱনা আছে।

চাহ, আতিথ্য উদ্যোগ, ইলেক্ট্ৰনিকছ উৎপাদন, সেউজ শক্তি আৰু কেন্সাৰ কেয়াৰত বিনিয়োগকে ধৰি এই পৰ্যন্ত অসমলৈ টাটা গ্ৰুপে অপৰিসীম অৱদান আগবঢ়াইছে।

উল্লেখযোগ্য যে টাটা গ্ৰুপৰ অধ্যক্ষ নটৰাজন চন্দ্ৰশেখৰণে শেহতীয়াকৈ এডভান্টেজ আছাম ২.০ৰ সময়ত অসম ভ্ৰমণৰ সময়ত টাটাৰ সৈতে অসমৰ ঘনিষ্ঠ সম্পৰ্কৰ কথা সোঁৱৰাই কয় যে স্বচ্ছতা আৰু স্বচ্ছ শাসনৰ ক্ষেত্ৰত অসম চৰকাৰে নিৰ্ধাৰণ কৰা মাপকাঠীসমূহৰ প্ৰতি লক্ষ্য ৰাখি টাটা গ্ৰুপে সেউজ অৰ্থনীতিৰ দিশত ২৭০০০ কোটি টকা বিনিয়োগ কৰিব ৷

ইয়াৰ উপৰি সোমবাৰে অনুষ্ঠিত কেবিনেট বৈঠকত অসম চৰকাৰে পান আই আই টি প্ৰাক্তন ছাত্ৰ সন্থাৰ সহযোগত দহটা দক্ষতা কেন্দ্ৰ স্থাপনৰ সিদ্ধান্তও গ্ৰহণ কৰে। আনুমানিক ৯০ কোটি টকা ব্যয় সাপেক্ষে নিৰ্মাণ হ’বলগীয়া এই কেন্দ্ৰটোৰ বাবে পান আই আই টি প্ৰাক্তন ছাত্ৰ সন্থাৰ পৰা ৮০ কোটি টকাৰ পুঁজিৰ সহায় লোৱা হ’ব, বাকী ১০ কোটি টকা অসম চৰকাৰে ব্যয় কৰিব। এই দহটা দক্ষতা কেন্দ্ৰৰ পৰা পাছ আউট হোৱা ছাত্ৰ-ছাত্ৰীক চাকৰি প্ৰদানৰ দায়িত্বও পান আই আই টি প্ৰাক্তন ছাত্ৰ সন্থাই গ্ৰহণ কৰিব।

চুমি, বিশাল, দীপাংকৰৰ কেলেংকাৰিৰ নতুন তথ্য ফাদিল