ডিব্ৰুগড়-গুৱাহাটী-শিলচৰত ২৪ ঘন্টা খোলা থাকিব দোকান 

dainik janambhumi March 21, 2025

ডিজিটেল ডেস্ক : ৰাজ্যৰ অর্থনীতি বৃদ্ধিৰ উদ্দেশ্যে এক ঐতিহাসিক সিদ্ধান্ত গ্রহণ কৰা হয় ডিব্ৰুগড়ত অনুষ্ঠিত কেবিনেটত। মুখ্যমন্ত্রী হিমন্ত বিশ্ব শৰ্মাৰ অধ্যক্ষতাত অনুষ্ঠিত অসম কেবিনেটে কালি গুৱাহাটী, ডিব্ৰুগড় আৰু শিলচৰত দোকান আৰু ব্যাৱসায়িক প্রতিষ্ঠানসমূহৰ চৌবিশ ঘণ্টীয়া কার্যকলাপত অনুমোদন জনায়। অর্থাৎ ২৪ ঘণ্টাই ব্যাৱসায়িক প্ৰতিষ্ঠানৰ গৰাকীয়ে ইচ্ছা কৰিলে দোকান-পোহাৰ খোলা ৰাখিব পাৰিব। অৱশ্যে এগৰাকী কৰ্মচাৰীক সপ্তাহত ৪৮ ঘণ্টাহে কামত নিয়োজিত কৰিব পাৰিব বুলি মুখ্যমন্ত্রী ড° হিমন্ত বিশ্ব শর্মাই সংবাদমেলত জনায়। এই ঐতিহাসিক সিদ্ধান্তই এতিয়ালৈকে প্রচলিত হৈ থকা ব্যৱসায়সমূহৰ পৰম্পৰাগত সাপ্তাহিক বন্ধৰ নিয়ম নাইকিয়া কৰিছে। নতুন নীতি এই তিনিখন প্রধান নগৰৰ পৌৰ নিগম এলেকাৰ ভিতৰত কাৰ্যকৰী কৰা হ'ব। 

আনহাতে, অসমৰ অন্য চহৰসমূহত ব্যাৱসায়িক প্রতিষ্ঠান নিশা ২ বজালৈকে খোলা ৰখাৰ অনুমতি দিয়া হ'ব। গ্রামাঞ্চলত প্রতিষ্ঠানসমূহ নিশা ১১ বজালৈকে খোলা ৰাখিব পাৰিব। অৱশ্যে সুৰাৰ দোকান আৰু বাৰৰ ক্ষেত্ৰত এই নিয়ম প্রযোজ্য নহ'ব। '২৪ ঘণ্টা দোকান-পোহাৰ খোলা ৰখাৰ এই পদক্ষেপে অসমত এক সমৃদ্ধিশালী ব্যাৱসায়িক পৰিৱেশ সৃষ্টি কৰিব আৰু আমাৰ যুৱক-যুৱতীৰ বাবে অধিক কর্মসংস্থানৰ সুযোগ প্রদান কৰিব। তথাপি আমি শ্রম আইন কঠোৰভাৱে পালন কৰাটো নিশ্চিত কৰিবলৈ প্রতিশ্রুতিবদ্ধ। দোকানৰ মালিকসকলে নিশ্চিত কৰিব লাগিব যে কোনো কৰ্মচাৰীয়ে সপ্তাহত ৪৮ ঘণ্টাতকৈ বেছি বা একেলগে ৯ ঘণ্টাতকৈ বেছি কাম নকৰে। ২৪ ঘণ্টাৰ কাৰ্যকলাপৰ বাবে ব্যৱসায়ীসমূহে বিভিন্ন কৰ্মচাৰীৰ সৈতে তিনিটা শ্বিফ্ট কাৰ্যকৰী কৰিব লাগিব,' মুখ্যমন্ত্ৰীয়ে ডিব্ৰুগড়ত মুখ্যমন্ত্ৰীৰ সচিবালয়ত অনুষ্ঠিত কেবিনেট বৈঠকৰ শেষত সংবাদমাধ্যমৰ লোকসকলক সম্বোধন কৰি এইদৰে কয়'। আন এক গুৰুত্বপূৰ্ণ ঘোষণাত মুখ্যমন্ত্ৰীয়ে প্রকাশ কৰে যে অৰুণাচল প্রদেশত বাস কৰা মৰাণ সম্প্ৰদায়ৰ লোকসকল, যিসকলৰ উৎপত্তি অসমত, তেওঁলোকক অসমৰ স্থায়ী বাসিন্দাৰ প্ৰমাণ পত্ৰ (পি আৰ চি) প্রদান কৰা হ'ব। এই পদক্ষেপ বহু বছৰৰ বঞ্চনাৰ পাছত আহিছে, কাৰণ অৰুণাচল চৰকাৰে এই ব্যক্তিসকলক পি আৰ চি প্ৰদান কৰা নাছিল, যাৰ ফলত তেওঁলোকে বিভিন্ন সুবিধা লাভৰ পৰা বঞ্চিত হৈছিল। 'মই এই বিষয়ত অৰুণাচল প্ৰদেশৰ মুখ্যমন্ত্ৰীৰ সৈতে আলোচনা কৰি আছিলোঁ। পি আৰ চি প্রদান কৰি আমি নিশ্চিত কৰিব বিচাৰোঁ যে মৰাণ সম্প্রদায়ে চাকৰিৰ সুযোগ লাভ কৰিব পাৰে, লগতে অসমৰ চিকিৎসা আৰু ইঞ্জিনীয়াৰিং মহাবিদ্যালয়সমূহত আসন সুৰক্ষিত কৰিব পাৰে', শৰ্মাই উল্লেখ কৰে। 

মুখ্যমন্ত্ৰীয়ে ডিব্ৰুগড় জিলাৰ নামৰূপত এটা নতুন ব্রাউনফিল্ড এম'নিয়া-ইউৰিয়া প্ৰকল্প স্থাপনৰ অনুমোদন প্রদান কৰাৰ বাবে প্রধানমন্ত্রী নৰেন্দ্ৰ মোদীক কৃতজ্ঞতাও প্রকাশ কৰে। আনুমানিক ১০,৬০১.৪০ কোটি টকা ব্যয়ৰে নিৰ্মাণ হ'বলগীয়া এই প্ৰকল্পৰ বাৰ্ষিক উৎপাদন ক্ষমতা ১২.৭ লাখ মেট্রিক টন ইউৰিয়া হ'ব। এই প্রকল্পটোৱে কৃষি খণ্ডক উৎসাহিত কৰাৰ লগতে অসমৰ লোকসকলৰ বাবে অসংখ্য কর্মসংস্থানৰ সৃষ্টি কৰিব। ৰাজ্যৰ বিকাশৰ প্ৰতি প্ৰধানমন্ত্ৰীৰ অটল সমর্থনৰ বাবে আমি তেওঁক ধন্যবাদ জনাইছোঁ শর্মাই কয়। তেওঁ আৰু কয় যে এন এইচ এমত চাকৰি কৰাসকলে একে বিভাগতে স্থায়ী চাকৰিৰ বাবে আৱেদন কৰিলে তেওঁলোকৰ বয়সৰ ঊর্ধ্বতম সীমা নাথাকিব। চৰকাৰী বিদ্যালয় পৰিত্যক্ত অৱস্থাত থাকিলে সেই বিদ্যালয়ৰ ভূমি শিক্ষা বিভাগৰ পৰা জিলা আয়ুক্তৰ হাতলৈ যাব। আনহাতে, জোনাই বিধানসভা সমষ্টিত চিমেন চি চি টঙানি উন্নয়ন খণ্ড এটা নতুনকৈ সংযোজন কৰা হ'ব বুলিও ঘোষণা কৰে। ইফালে, মৰাণ, মটক, কমতাপুৰ কাউন্সিলত নতুন সংশোধনৰ কেবিনেটে সিদ্ধান্ত লয়। ডেভেলপমেন্ট কাউন্সিলে নিজৰ নিৰ্ধাৰিত বাজেটতকৈ অধিক টকাৰ কাম কৰিব নোৱাৰিব। প্রাথমিক বিদ্যালয়ৰ প্ৰধান শিক্ষকৰ পদ ৫০গৰাকী শিক্ষার্থী থাকিলেই সৃষ্টি কৰা হ'ব বুলি ঘোষণা কৰে। আন এক গুৰুত্বপূৰ্ণ সিদ্ধান্ত মর্মে অসমৰ প্ৰথমগৰাকী অ-কংগ্ৰেছী মুখ্যমন্ত্ৰী গোলাপ বৰবৰাৰ জন্ম শতবার্ষিকী বছৰজুৰি পালন কৰা হ'ব। ২৯ আগষ্টৰ পৰা এই পদক্ষেপ আৰম্ভ হ'ব। লগতে অসমত এটা ৰাজ্যিক অনুষ্ঠান বৰবৰাৰ নামত নামকৰণ কৰা হ'ব। শিৱসাগৰৰ ৰংঘৰত সৃষ্টি হোৱা কৃত্রিম বানৰ সমাধানৰ বিষয়েও কালিৰ কেবিনেটত আলোচনা কৰা হয়। এই বছৰতে ডিব্ৰুগড়ত কেবিনেট ভৱন হোৱাৰ উপৰি অধ্যক্ষ গৃহ আৰু বিধায়কৰ হোষ্টেল নিৰ্মাণ কৰা হ'ব বুলি মুখ্যমন্ত্রীয়ে জনায়। কামৰূপ আৰু বঙাইগাঁৱৰ দুখন‌ বনাঞ্চলক সংৰক্ষিত বনাঞ্চল ঘোষণা কৰা হ'ব বুলি ঘোষণা কৰে। কালিৰ সংবাদমেলত মুখ্যমন্ত্ৰীৰ লগত কেবিনেট মন্ত্রী ক্রমে পীয়ূষ হাজৰিকা, বিমল বৰা, প্রশান্ত ফুকন আৰু জয়ন্ত মল্ল বৰুৱা উপস্থিত আছিল।

Share This