বৰ্ণিল শোভাযাত্ৰাত উজলিব 'বৰ অসম'

dainik janambhumi February 03, 2025

ডিজিটেল ডেস্ক: জনসমুদ্ৰত পৰিণত হৈছে অসম সাহিত্য সভাৰ সপ্তসপ্ততিতম পাঠশালা অধিৱেশনৰ লগতে নাট্যনগৰী, শিক্ষানগৰী পাঠশালা। লক্ষ লক্ষ সাহিত্যপ্রেমীৰ উপস্থিতিয়ে আজি সাহিত্য সভাৰ পাঠশালা অধিৱেশনথলীক প্ৰদান কৰে এক অনন্য মাত্রা। 

পাঠশালাৰ আনন্দৰাম বৰুৱা একাডেমিৰ সমীপৰ ২৭নং ৰাষ্ট্ৰীয় ঘাইপথত অসম সাহিত্য সভাৰ নৱ-নির্বাচিত সভাপতি ড° বসন্ত কুমাৰ গোস্বামীক আদৰিবলৈ অপেক্ষাৰত জনতাই গায়ন-বায়ন, তাল-খোলৰ মনজুৰোৱা শব্দ, ঢুলীয়াৰ ঢোলৰ চেও তথা বিভিন্ন নাম-প্ৰসংগৰে অধীৰ অপেক্ষাত ৰৈ থাকে বজালীৰ শতাধিক সাংস্কৃতিক দলে শান্তি-সমৃদ্ধিৰ অন্যতম প্রতীক শোভাযাত্রা শুৱনি কৰা দুটি হাতীক সন্মুখত লৈ। কিছুসময় ধৰি মন-প্রাণ পুলকিত কৰা বিভিন্ন বাদ্যযন্ত্ৰৰে আকাশ-বতাহ ৰজনজনাই থকা এক মাহেন্দ্র ক্ষণত জনসমুদ্ৰৰ মাজত হঠাতে জিলিকি উঠে শুভ্র জাতীয় পোছাক পৰিহিত অসমৰ সৰ্ববৃহৎ জাতীয় অনুষ্ঠান অসম সাহিত্য সভাক আকৌ এক নতুন ৰূপত সমৃদ্ধ কৰিবলৈ আগবাঢ়ি অহা নৱ-নির্বাচিত সভাপতি ড° বসন্ত কুমাৰ গোস্বামী। অগণন ৰাইজৰ বিপুল হর্ষধ্বনি আৰু মহিলাৰ উৰুলিৰ মাজত ২৭নং ৰাষ্ট্ৰীয় ঘাইপথৰ কাষতে অস্থায়ীভাৱে নিৰ্মাণ কৰা মঞ্চলৈ আদৰি নিয়া হ'ল অসম সাহিত্য সভাৰ নৱ-নির্বাচিত সভাপতি ড° গোস্বামীক। 

অসম সাহিত্য সভাৰ সম্পাদক ড° উপেন্দ্রজিৎ শৰ্মাই আঁত ধৰা এই মাহেন্দ্র ক্ষণত গোস্বামীক আদৰণি জনায় সপ্তসপ্ততিতম অসম সাহিত্য সভাৰ পাঠশালা অধিৱেশনৰ উদযাপন সমিতিৰ সভাপতি তথা মন্ত্ৰী ৰঞ্জিত কুমাৰ দাসে। ইয়াৰ পাছত বর্ণিল সাংস্কৃতিক শোভাযাত্রা উদ্বোধন কৰিবলৈ অহা পদ্মভূষণ, অকাদেমি ৰত্ন, নৃত্যাচাৰ্য ৯২ বছৰীয়া যতীন গোস্বামীকো গামোচা-জাপি আৰু অসম সাহিত্য সভাৰ প্রতীকেৰে আদৰণি জনোৱা হয়। বয়সে হাৰ মনাব নোৱৰা নৃত্যাচাৰ্য গোস্বামীয়ে অসম সাহিত্য সভাৰ পতাকা জোকাৰি বৰ্ণিল শোভাযাত্ৰা মুকলি কৰাৰ আগেয়ে উপস্থিত ৰাইজক সম্বোধন কৰি কয়, 'পাঠশালাৰ ৰাইজ মোৰ বাবে নতুন নহয়, এইখন নাট্যনগৰীতে অসমৰ বহুতো স্বনামধন্য নাট্যশিল্পীক মই লগ পাবলৈ সক্ষম হৈছোঁ। অসম সাহিত্য সভাৰ দৰে এটা বৃহৎ অনুষ্ঠানৰ শোভাযাত্ৰা মুকলি কৰিবলৈ পাই মই নিজকে ধন্য মানিছোঁ। এই বৃহৎ জাতীয় অনুষ্ঠানটোৰ বহুত বিতর্ক আছে যদিও সভাই অসমীয়া ৰাইজক ভাষা-সংস্কৃতিৰে সমৃদ্ধ কৰি থৈ যোৱাৰ বাবে বিতৰ্কবোৰ সময়ৰ বালিত তল পৰি যায়। এই ছেগতে বর্ষীয়ান গোস্বামীয়ে অসমীয়া ভাষা-সাহিত্যৰ গুৰি ধৰি থকা অসম সাহিত্য সভাৰ উত্তৰোত্তৰ কামনা কৰে। আনহাতে, উদযাপন সমিতিৰ সভাপতি ৰঞ্জিত কুমাৰ দাসে সকলোকে আদৰণি জনাই পাঠশালা অধিৱেশন সফল হোৱাৰ কামনা কৰে। উক্ত অনুষ্ঠানৰ পাছতে দীর্ঘদিনীয়া প্রচেষ্টা তথা পৰিকল্পনাৰে সমৃদ্ধ এই বিশাল সাংস্কৃতিক শোভাযাত্রাত উপ-সমিতিৰ সভাপতি ডাঃ কুলেন্দ্র কাকতী, কাৰ্যকৰী সভাপতি সুৰজিৎ পাটগিৰী, সম্পাদকদ্বয় ড° কুলদীপ পাটগিৰী আৰু পার্শ্ব পাটগিৰীক সম্বর্ধনা জনোৱা হয়। ইয়াৰ পাছত অসম আৰু অসমীয়াৰ স্বর্ণিল সংস্কৃতি, অসমীয়া সাহিত্যৰ অপৰূপ সৌন্দৰ্য প্ৰকাশৰ নিমিত্তে আয়োজিত এই বর্ণাঢ্য সাংস্কৃতিক শোভাযাত্রাতে আদৰণি জনোৱা হয় অসম সাহিত্য সভাৰ নৱ-নির্বাচিত সভাপতিজনক। 

এখন বনহংসৰ আর্হিত নিৰ্মিত বাহনৰ এটা শুভ্র ছাতিৰ তলত নৱ-নিৰ্বাচিত সভাপতি ড° গোস্বামীক বহুওৱা হয় আৰু তেওঁক সংগ দিয়ে অসম সাহিত্য সভাৰ সপ্তসপ্ততিতম দ্বি-বার্ষিক পাঠশালা অধিৱেশনৰ আদৰণী সমিতিৰ সভাপতি ৰঞ্জিত কুমাৰ দাসে। সন্মুখত দুই গজেন্দ্ৰই শোভাবর্ধন কৰা শোভাযাত্ৰাত ভাগৱত যাত্রা, ঢুলীয়া, অসম সাহিত্য সভাৰ প্রতীকপট যাত্রা, ৭৭গৰাকী মহিলাৰ কলহ লৈ যাত্রা, ৭৭গৰাকী কৃষক, গায়ন-বায়নৰ দল, লোকবাদ্যৰ দল, অসম সাহিত্য সভা আৰু অসমীয়া সাহিত্যৰ ইতিহাস, সামৰিক বাহিনী, বজালীৰ শ্বহীদ, কামৰূপী লোকগীত, মঞ্চ-নাট্য-কলাৰ গৌৰৱোজ্জ্বল সাক্ষী বজালীৰ ভ্ৰাম্যমাণ থিয়েটাৰ, বজালীৰ মাৰোৱাৰী সংস্কৃতি, নাও খেল, বজালীৰ বঙালী সংস্কৃতি, বিয়ানাম, তোলনী বিয়াৰ গীত আৰু জপা থোৱা, আইনাম, থলুৱা বেণ্ডপার্টি, থলুৱা মুছলমানসকলৰ সংস্কৃতি, পুতলা নাচ, অসমীয়া বিয়া, দোলা, বজালীৰ দুগ্ধ বিপ্লৱ, অসমৰ আধ্যাত্মিক আৰু পৰম্পৰাগত সংস্কৃতি, সত্ৰীয়া নৃত্য, মহাপুৰুষ শ্ৰীমন্ত শংকৰদেৱ, মহাপুৰুষ শ্ৰীশ্ৰীমাধৱদেৱ, মহাপুৰুষ শ্ৰীশ্ৰীহৰিদেৱ, শ্ৰীশ্ৰীদামোদৰদেৱ, সত্ৰীয়া সংস্কৃতিৰ বিশিষ্ট আংগিক ভাওনা, দেওধনী নৃত্য, কৈৱৰ্ত জাল মৰা, কেওট সংস্কৃতি, আহোম সংস্কৃতি, তিৱা সংস্কৃতি, বড়ো সংস্কৃতি, অসমীয়া গাঁও, বিহু নৃত্য, ডিমাচা সংস্কৃতি, মিচিং সংস্কৃতি, নেপালী সংস্কৃতি, গাৰো সংস্কৃতি, চাহ বাগিচাৰ সংস্কৃতি, কাৰ্বি সংস্কৃতি, মৰাণ সংস্কৃতি, কোচ-ৰাজবংশী, চুতীয়া, উত্তৰ-পূব ভাৰতৰ প্ৰতীকী উপস্থাপন, ভুটান, বজালীৰ শিক্ষানুষ্ঠান আদিকে ধৰি প্ৰায় শতাধিক কৃষ্টি-সংস্কৃতিৰ লগতে বজালীৰ দুই ধর্মীয় পীঠস্থান ডুবিৰ পৰিহৰেশ্বৰ দোৱালয়, ভোগেশ্বৰ মন্দিৰ, বজালীৰ জালিখাটাৰ ২০০ বছৰীয়া সুবিশাল বটবৃক্ষ আদিৰ এক মেটমৰা সম্ভাৰেৰে এক সম্পূর্ণ ব্যতিক্ৰমী ৰূপ উপস্থাপন হয় এই বর্ণিল সাংস্কৃতিক শোভাযাত্রাত। আনহাতে, এই সুবিশাল সাংস্কৃতিক শোভাযাত্রাত চুবুৰীয়া ৰাষ্ট্ৰ ভূটানৰ পৰা অহা এটা সাংস্কৃতিক দলে অংশগ্ৰহণ কৰি সোণত সুৱগা চৰায়। প্রায় পাঁচ কিল'মিটাৰজোৰা এই সাংস্কৃতিক শোভাযাত্রা ভট্টদেৱ ক্ষেত্ৰত উপস্থিত হোৱাৰ লগে লগে লক্ষাধিক জনগণে মূল মঞ্চলৈ আদৰি আনে নৱ-নির্বাচিত সভাপতিগৰাকীক।

Share This