অক্টোবৰত স্থায়ী সত্ৰ আয়োেগ গঠনৰ অনুমোদন ল'ব বিধানসভাই

dainik janambhumi June 12, 2025

ডিজিটেল ডেস্ক : দৰঙৰ ঐতিহাসিক ভক্তিপীঠ খটৰা সত্ৰ বুধবাৰে দৰ্শন কৰে মুখ্যমন্ত্রী ড° হিমন্ত বিশ্ব শর্মাই। বিগত পঞ্চায়ত নিৰ্বাচনৰ সময়ত সত্ৰখনলৈ অহাৰ বাবে দিয়া প্রতিশ্রুতি অনুসৰি আজি ব্যক্তিগত কাৰ্যসূচীৰে সত্ৰখনত উপস্থিত হয় মুখ্যমন্ত্রী ড° হিমন্ত বিশ্ব শর্মা। ১৫৬৮ খ্ৰীষ্টাব্দতে মাধৱদেৱৰ প্ৰিয় শিষ্য লেচাকোণীয়া গোবিন্দ আতাই প্রতিষ্ঠা কৰা ঐতিহাসিক খটৰা সত্ৰখনত মুখ্যমন্ত্রী ড° শর্মা পুৱা ১১ বজাত আহি উপস্থিত হোৱাৰ লগে লগে সত্ৰৰ প্ৰৱেশ দ্বাৰৰ পৰা পৰম্পৰাগত কৃষ্টি গায়ন-বায়ন, খোলবাদনেৰে সত্ৰৰ কীৰ্তন ঘৰলৈ আদৰি নিয়ে। ভিন্ন প্রান্তৰ ভকত, বৈষ্ণৱ আৰু ধৰ্মপ্ৰাণ ৰাইজেৰে উদুলি-মুদুলি হৈ পৰা সত্ৰখনত উপস্থিত হৈয়েই মূল মণিকূটৰ ভিতৰত প্ৰভু শ্ৰীৰাম, লক্ষ্মণ আৰু সীতাৰ বিগ্রহত সেৱা জনায় মুখ্যমন্ত্রী ড° হিমন্ত বিশ্ব শৰ্মাই। 

খটৰা সত্ৰ পৰিচালনা সমিতিৰ সম্পাদক গংগাৰাম বৈশ্যই ঐতিহাসিক সত্ৰখন ১৫৬৮ চনৰ প্রতিষ্ঠাৰে পৰা ইয়াৰ ধৰ্মীয় ঐতিহ্য আৰু পৰম্পৰাৰ লগতে সাংস্কৃতিক পৰম্পৰাৰ ইতিবৃত্ত মুখ্যমন্ত্ৰীৰ আগত দাঙি ধৰাৰ লগতে সত্ৰখনৰ সমস্যাসমূহ অৱগত কৰে। আধ্যাত্মিক পৰিৱেশৰ মাজত মুখ্যমন্ত্রী ড° হিমন্ত খটৰা সত্ৰৰ তৰফৰ পৰা বিপুলভাৱে সম্বর্ধনা জ্ঞাপন কৰা হয়। ভালেমান অনুষ্ঠান-প্রতিষ্ঠানে আদৰণি তথা সম্বর্ধনা জনোৱাৰ উপৰি সত্ৰৰ পৰম্পৰাগত ভিন্ন কৃষ্টি-সংস্কৃতিসমূহ মুখ্যমন্ত্ৰীগৰাকীৰ আগত দর্শন কৰে। ধর্মীয় ৰীতি-নীতিৰে ঐতিহাসিক সত্ৰখন দৰ্শনৰ পাছতে সত্ৰৰ ভোগঘৰত প্ৰস্তুত কৰা ভোগ আৰু মাহ প্ৰসাদ গ্রহণ কৰি মুখ্যমন্ত্রী ড° শৰ্মাই সত্ৰ পৰিচালনা সমিতিৰ লগত চমু আলোচনাত বহে। ইয়াতেই মুখ্যমন্ত্রীয়ে সত্ৰখনৰ মণিকূট আৰু কীৰ্তন ঘৰ পুনৰ নিৰ্মাণৰ উপৰি সত্ৰ সমিতিৰ অনুৰোধ মর্মে সত্ৰৰ উপাৰ্জনৰ বাবে উপায়ুক্তক ১০০০ বিঘা মাটি সত্ৰখনৰ নামত আবণ্টন দিব পৰাকৈ জিলা প্রশাসনক সুবিধাজনক ভূমিৰ ব্যৱস্থা কৰাৰ কথাও কয়। 

মুখ্যমন্ত্রী ড° শর্মাই লগতে সত্ৰসমূহৰ সুৰক্ষিত ভৱিষ্যতৰ স্বাৰ্থত আদালতৰ দৰে ক্ষমতা সম্পন্ন এখন স্থায়ী সত্র আয়োগ গঠনৰ বাবে চৰকাৰে পৰিকল্পনা কৰা বুলি কয়। আনহাতে অহা অক্টোবৰত হ'বলগীয়া বিধানসভাৰ অধিৱেশনত ইয়াৰ অনুমোদন লোৱা হ'ব বুলি মন্তব্য কৰে। ইফালে মুখ্যমন্ত্রীয়ে খটৰা সত্ৰৰ পৰা ওলাই পথৰুঘাটৰ কৃষক শ্বহীদ সমাধিত পুষ্পাঞ্জলি অর্পণ কৰে। আনহাতে জিলাখনৰ ৰাজহুৱা চিকিৎসা খণ্ডত চিকিৎসকৰ অভাৱৰ প্ৰসংগত সাংবাদিকে কৰা প্ৰশ্নৰ উত্তৰত ৰাজ্যত অহা দুই এদিনৰ ভিতৰতে নতুনকৈ চাৰিশ চিকিৎসক নিযুক্তি দিয়া হ'ব বুলি কয়। চিকিৎসা মহাবিদ্যালয়ৰ পৰিৱৰ্তে আন চিকিৎসালয়সমূহত চিকিৎসাৰ দা দৰমহা যথোপযুক্ত নহয় বুলি স্বীকাৰ কৰি চিকিৎসকৰ অভাৱৰ এনে সমস্যাসমূহ দূৰ কৰাৰ বাবে জিলাই জিলাই চিকিৎসা মহাবিদ্যালয় স্থাপনৰ পৰিকল্পনাৰ বিষয়েও তেওঁ সদৰী কৰে।

Share This