শিৱসাগৰত বিশাল জোঁৰ সমদল আটাছুৰ

dainik janambhumi August 11, 2025

ডিজিটেল ডেস্ক : ছয় জনগোষ্ঠীক জনজাতিকৰণৰ মৰ্যাদা প্রদানৰ নামত বিজেপিৰ নেতৃত্বাধীন কেন্দ্ৰীয় আৰু অসম চৰকাৰে বাৰম্বাৰ প্ৰৱঞ্চনাৰ বিৰুদ্ধে সদৌ টাই আহোম ছাত্র সন্থা পুনৰ সৰৱ হৈছে। দেওবাৰে সন্ধিয়া শিৱসাগৰত সদৌ টাই আহোম ছাত্র সন্থাই জোঁৰ লৈ সমদল কৰি পৰিৱেশ উত্তাল কৰি তোলে। এই প্রতিবাদী সমদলত কেইবাশতাধিক আটাছু কর্মীয়ে অংশগ্রহণ কৰে। ছয় জনগোষ্ঠীৰ জনজাতিকৰণ, অবৈধ বেদখলকাৰীক উচ্ছেদ তথা খিলঞ্জীয়া লোকক ভূমিপট্টা প্ৰদানৰ দাবীত সদৌ টাই আহোম ছাত্ৰ সন্থা শিৱসাগৰ জিলা সমিতি আৰু মহিলা পৰিষদে এই জোঁৰ সমদলেৰে প্ৰতিবাদ সাব্যস্ত কৰে। বিধানসভাৰ নিৰ্বাচন চমু চাপি অহাৰ লগে লগে সদৌ টাই আহোম ছাত্র সন্থাই জনগোষ্ঠীকৰণৰ দাবীৰে ক্ৰমাৎ সৰৱ হৈ পৰিছে। প্ৰতিবাদকাৰীসকলে বিজেপি চৰকাৰ মুৰ্দাবাদ, বিজেপি চৰকাৰৰ প্ৰৱঞ্চনা নচলিব আদি শ্ল'গানেৰে শিৱসাগৰ চহৰ উত্তাল কৰে। 

ঐতিহাসিক শিৱদ'লৰ সন্মুখৰ পৰা বাহিৰ কৰা জোঁৰ সমদলকাৰীসকল কিছুদূৰ আগবাঢ়োঁতেই আৰক্ষীয়ে বাধা প্রদান কৰে। বিধানসভাৰ নিৰ্বাচনৰ পূৰ্বে শাসকীয় চৰকাৰে ছয় জনগোষ্ঠীকৰণৰ বিষয়টোত গুৰুত্ব প্রদান নকৰিলে আহোম সম্প্ৰদায়ৰ লোকসকলে নিৰ্বাচনত ইয়াৰ উচিত প্রত্যুত্তৰ দিব বুলি সদৌ টাই আহোম ছাত্র সন্থাই হুংকাৰ প্ৰদান কৰে। প্ৰতিবাদকাৰীসকলৰ স্পষ্ট অভিযোগ- প্রতিটো নিৰ্বাচনৰ প্ৰাকক্ষণত সংগঠনৰ নেতাসকলক আলোচনালৈ মাতি ছয় জনগোষ্ঠীক জনজাতিকৰণৰ আশ্বাস প্রদান কৰে যদিও নিৰ্বাচনী বৈতৰণী পাৰ হোৱাৰ পাছতেই এই বিষয়টোলৈ পিঠি দি প্ৰৱঞ্চনা কৰি আহিছে। দেওবাৰে সদৌ টাই আহোম ছাত্ৰ সন্থাৰ কেন্দ্ৰীয় সমিতিৰ সভাপতি বসন্ত গগৈয়ে নিৰ্বাচনৰ সময়ত কেউটা সংগঠনৰ লগত চৰকাৰৰ বাঘা বাঘা মন্ত্রী আলোচনাত মিলিত হৈ বিভিন্ন প্রতিশ্রুতি প্রদান কৰে যদিও নির্বাচনী বৈতৰণী পাৰ হোৱাৰ পাছত পুনৰ প্ৰৱঞ্চনা কৰে। ২০১৪ চনত বৰ্তমানৰ প্রধানমন্ত্রী নৰেন্দ্ৰ মোদীয়ে অসমলৈ আহি বিজেপি ক্ষমতালৈ আহিলেই অসমৰ টাই আহোমকে ধৰি ছয় জনগোষ্ঠীক জনজাতিকৰণ কৰা হ'ব বুলি ৰাজহুৱাকৈ আশ্বাস দিছিল। 

বিজেপিৰ নেতা নৰেন্দ্ৰ মোদীয়ে ইতিপূর্বে তৃতীয়বাৰৰ বাবে দেশৰ প্ৰধানমন্ত্ৰী ৰূপে শপত গ্রহণ কৰিলে। কিন্তু টাই আহোমকে ধৰি ছয় জনগোষ্ঠীৰ জনজাতিকৰণৰ ফাইল ৰঙা ফিতাৰ মেৰপেঁচত আবদ্ধ হ'ল। ইয়াৰ প্ৰতিফল বিজেপিয়ে ২০২৬ চনৰ বিধানসভাৰ নির্বাচনত লাভ কৰিব বুলি ব্যক্ত কৰে। বনভূমি তথা চৰকাৰী ভূমিত হোৱা উচ্ছেদ অভিযান সমর্থন কৰিও অসমীয়া মানুহে ভূমিৰ অধিকাৰ নোপোৱাৰ সন্দৰ্ভত তেওঁ ক্ষোভ প্রকাশ কৰে। বিদেশী ইয়াৰ পৰা যাবই লাগিব যদিও স্বদেশীৰ ওপৰত উৎপাত বা অত্যাচাৰ কেতিয়াও সমর্থন কৰা নহ'ব বুলি আটাছু নেতাগৰাকীয়ে স্পষ্ট কৰি দিয়ে।

Share This