ভনীয়েকৰ বিয়ালৈ সাত দিন থকা সময়তে আকস্মিক মৃত্যুক সাবটিলে ভাতৃয়ে

Kakali Deka February 28, 2025

ডিজিটেল ডেস্কঃ ভনীয়েকৰ বিয়ালৈ মাজত আছিল মাত্ৰ সাতটা দিন। ইতিমধ্যে বিয়াৰ বাবে সম্পূৰ্ণ হৈ উঠিছিল সকলো যা-যোগাৰ। কিন্তু হঠাতে পৰিয়ালটোলৈ নামি আহিল ঘোৰ অমানিশা। আকস্মিকভাৱে মৃত্যু ঘটিল একমাত্ৰ উপাৰ্জনক্ষম ব্যক্তিগৰাকীৰ। এই ঘটনা বাক্সা জিলাৰ ভাৰত-ভূটান সীমান্তৰ উত্তৰকুছিৰ। 

উত্তৰকুছিৰ কৃষ্ণ বাহাদুৰ লামাই ভনীয়েকৰ বিয়াৰ বাবে আহিছিল একৈশ দিনৰ ছুটীত। অসম আৰক্ষীৰ ২৮ নং বেটেলিয়নত কৰ্মৰত কৃষ্ণ বাহাদুৰ লামাই ভনীয়েকৰ বিয়াৰ বাবে সম্পূৰ্ণ কৰি তুলিছিল সকলো যা-যোগাৰ। কিন্তু যোৱা ২৬ ফেব্ৰুৱাৰীত আকস্মিকভাৱে অসুস্থ হৈ পৰে কৃষ্ণ বাহাদুৰ লামা। 

পৰিয়ালৰ লোকে প্ৰথম অৱস্থাত ডাঃ ৰবি বড়ো অসামৰিক চিকিৎসালয়ত ভৰ্তি কৰে যদিও অৱস্থা গুৰুতৰ হোৱাত গুৱাহাটী চিকিৎসা মহাবিদ্যালয় হস্পিটেললৈ প্ৰেৰণ কৰে। কিন্তু দুৰ্ভাগ্যজনকভাৱে আদবাটতে মৃত্যুক আঁকোৱালি লয়। যাৰ ফলত এতিয়া উত্তৰকুছিৰ ঘৰখনত সৃষ্টি হৈছে শোকৰ বন্যা। 

শোকত ভাগি পৰিছে পৰিয়ালৰ লোক। নিজৰ ভনীয়েকৰ বিয়াৰ প্ৰস্তুতি চলাই হঠাতে চিৰদিনৰ বাবে আঁতৰি গ'ল কৃষ্ণ বাহাদুৰ লামা। উপভোগ কৰিবলৈ নাপালে ভনীয়েকৰ বিয়া। আজি পুৱা অসম আৰক্ষী বেটেলিয়নজনৰ মৃতদেহটো ঘৰ আহি পোৱাৰ পাছত ৰাইজৰ উপস্থিতিত সম্পন্ন কৰে অন্ত্যেষ্টিক্রিয়া।

Share This