৪টা অগ্নি পৰীক্ষাৰে হ'ব বিজেপিৰ প্ৰাৰ্থী বাছনি 

Dainik janambhumi February 11, 2025

ডিজিটেল ডেস্ক: ২০২৬ চনত অনুষ্ঠিত হ'ব লগীয়া বিধানসভা নির্বাচনত বিজেপিৰ প্রার্থিত্ব প্রত্যাশীসকলে কঠোৰ পৰীক্ষাত অৱতীৰ্ণ হ'ব লাগিব। আনকি মন্ত্রী, বিধায়কসকলেও এই পৰীক্ষা দিব লাগিব। গেৰুৱা দলটোৱে গোপনে অনুষ্ঠিত কৰিব লগীয়া এই পৰীক্ষাত সফল হোৱাসকলেহে এইবাৰ প্ৰাৰ্থিত্ব লাভ কৰিব। গেৰুৱা দলটোৰ এটা শীর্ষ সূত্রই এই কথা জানিবলৈ দি প্রকাশ কৰা মতে এই পৰীক্ষা হৈছে নিৰ্বাচনৰ পূৰ্বে প্ৰতিটো সমষ্টিতে গোপনে চলাব লগীয়া সমীক্ষা। চলিত বর্ষত এনে তিনিটা সমীক্ষা আৰু বিধানসভা নিৰ্বাচনৰ তিনি মাহৰ পূৰ্বে অন্তিমটো সমীক্ষা অনুষ্ঠিত হ'ব। এই সমীক্ষা অনুসৰিহে দলটোৱে প্রার্থিত্ব প্রদান কৰিব। যিমান ডাঙৰেই নেতা নহওক কিয় সমীক্ষাৰ ফলাফল যদি সপক্ষে নাযায় তেনেহ'লে তেওঁক প্রার্থিত্ব প্রদান কৰা নহয়।

তৃতীয়বাৰৰ বাবে অসমত শাসনলৈ অহাৰ স্বাৰ্থতে প্রার্থিত্ব প্রদানৰ ক্ষেত্ৰত বিজেপিয়ে এইবাৰ কঠোৰ স্থিতি গ্রহণ কৰিব বুলি জানিবলৈ দি সূত্রটোৱে লগতে প্ৰকাশ কৰা মতে প্রার্থিত্ব প্ৰদানৰ ক্ষেত্ৰত যি চাৰিটা সমীক্ষা চলোৱা হ'ব, ইয়াৰে এটা সমীক্ষা আৰ এছ এছে নিজাববীয়াকৈ চলাব। আনহাতে এটা সমীক্ষা বিজেপিয়ে আৰু আন দুটা সমীক্ষা ব্যক্তিগত সংস্থাৰ দ্বাৰা চলোৱা হ'ব। চলিত বর্ষত তিনিটা সমীক্ষা চলোৱাৰ অন্তত অন্তিমটো সমীক্ষা অহা বৰ্ষৰ জানুৱাৰী মাহত অর্থাৎ নির্বাচন অনুষ্ঠিত হোৱাৰ আগে আগে অনুষ্ঠিত হ'ব বুলি উল্লেখ কৰি সূত্ৰটোৱে স্পষ্টভাৱে কয় যে অসমত কিদৰে হেটত্রিক কৰিব পৰা যায়, তাৰ বাবে এতিয়াৰে পৰাই গেৰুৱা দলটোৱে ৰণ কৌশল প্ৰস্তুত কৰি উলিয়াইছে। কেন্দ্ৰীয় নেতৃত্বৰ নিৰ্দেশ অনুসৰি ইতিমধ্যে প্রতিজন মন্ত্ৰী, বিধায়কৰ লগতে দলীয় নেতাক গাঁৱলৈ গৈ কাম কৰাৰ বাবে নির্দেশ দিছে মুখ্যমন্ত্রী ড° হিমন্ত বিশ্ব শর্মাই।

 আনকি অহা অক্টোবৰ মাহৰ ভিতৰত নিজ নিজ সমষ্টিত সকলো চৰকাৰী আঁচনি ৰূপায়ণৰ কাম সমাপ্ত কৰাৰ বাবেও তেওঁ মন্ত্রী-বিধায়কসকলক নির্দেশ দিয়া হৈছে। প্রতিজন যোগ্য হিতাধিকাৰীয়ে যাতে চৰকাৰী আঁচনিৰ সুবিধা লাভ কৰে, সেয়া নিশ্চিত কৰিবলৈকো কোৱা হৈছে। এনে পৰিস্থিতিত অক্টোবৰৰ পাছৰে পৰাই ৰাজ্যখনত এক নির্বাচনকেন্দ্ৰিক পৰিৱেশ সূচনা হোৱাৰ সম্ভাৱনা আছে। সূত্ৰটোৰ মতে অক্টোবৰ মাহৰ পাছতেই দলটোৱে প্ৰস্তুত কৰিব প্ৰতিটো সমষ্টিৰে প্ৰাৰ্থীৰ পেনেলো। এই প্রার্থীৰ পেনেলৰ পৰাই সমীক্ষাৰ ফলাফল অনুসৰি দলীয় প্রার্থিত্ব প্রদান কৰা হ'ব। প্রণিধানযোগ্য যে বিগত লোক সভা নিৰ্বাচনৰ সময়তো গেৰুৱা দলটোৱে নিজাকৈ চাৰিটা সমীক্ষা চলাইছিল। ইয়াৰ উপৰি আৰ এছ এছেও নিজাকৈ এটা সমীক্ষা চলাইছিল। উক্ত সমীক্ষাৰ ভিত্তিতহে প্রার্থিত্ব দিয়া হৈছিল। আনকি সমীক্ষাৰ ফলাফল অনুকূল নোহোৱাৰ বাবেই কেন্দ্ৰীয় মন্ত্ৰী হোৱাৰ পাছতো ডিব্ৰুগড়ৰ সাংসদ ৰামেশ্বৰ তেলীক, ডিফুৰ সাংসদ হৰেন সিং বে আৰু গুৱাহাটীৰ সাংসদ কুইন ওজাক প্রার্থিত্ব প্রদান কৰা হোৱা নাছিল। এনে পৰিস্থিতিত বিধানসভা নির্বাচনৰ পূৰ্বে কাক প্রার্থিত্ব প্রদান কৰিব, তাক লৈ দলটোৱে চলাব লগীয়া সমীক্ষাৰ ওপৰতে এতিয়া গেৰুৱা দলটোৰ মন্ত্ৰী, বিধায়ককে ধৰি নেতাসকলৰ ভৱিষ্যৎ নিৰ্ভৰ কৰিছে। কিয়নো গোপনে চলিব লগীয়া এই পৰীক্ষাত উত্তীর্ণ হোৱাসকলেহে লাভ কৰিব ২০১৬ চনৰ বিধানসভা নিৰ্বাচনৰ বিজেপিৰ প্ৰাৰ্থিত্ব।

Share This