এইবাৰ দুই ডজন বিজেপিৰ বিধায়কে নাপাব পাৰে দলীয় প্রার্থিত্ব

dainik janambhumi July 17, 2025

ডিজিটেল ডেস্কঃ অসম বিধানসভাৰ নিৰ্বাচনলৈ মাজত মাথোঁ আঠ মাহ বাকী আছে। ইতিমধ্যে একেৰাহে তৃতীয়বাৰৰ বাবে ৰাজ্যত চৰকাৰ গঠন কৰাৰ বাবে টঙালি বান্ধিছে শাসকীয় দল বিজেপিয়ে। হেটত্রিক অৰ্জনৰ বাবে গেৰুৱা দলটোৱে চলাইছে ইটোৰ পাছত সিটোকৈ সমীক্ষা। এনে অভ্যন্তৰীণ সমীক্ষাৰ পাছতেই এতিয়া দলীয় বিধায়কসকলৰ কাম-কাজক লৈ শংকিত হৈ পৰিছে দলটোৰ শীর্ষ নেতৃত্ব। কিয়নো শেহতীয়াকৈ চলোৱা এক অভ্যন্তৰীণ সমীক্ষাত দলটোৰ বহুসংখ্যক বিধায়কৰে শোচনীয় অৱস্থাৰ কথা পোহৰলৈ আহিছে। এনে পৰিস্থিতিত অনাগত বিধানসভাৰ নিৰ্বাচনত বহুসংখ্যক বিধায়কেই দলীয় প্রার্থিত্বৰ পৰা বঞ্চিত হোৱাৰ আশংকা আছে।

 দলীয় সূত্ৰৰ মতে, ২০২১ চনৰ বিধানসভাৰ নিৰ্বাচনত দলটোৱে প্রায় এক ডজন বিধায়কক প্রার্থিত্ব প্রদান কৰা নাছিল। কিন্তু এইবাৰ এই সংখ্যা দুই ডজনলৈ বৃদ্ধি পাব পাৰে। কিয়নো অভ্যন্তৰীণ সমীক্ষাত বহুসংখ্যক বিধায়কৰ বিৰুদ্ধেই ৰাইজে অসন্তুষ্টি ব্যক্ত কৰিছে। অভিযোগ কৰিছে যে তেওঁলোকৰ পাৰদৰ্শিতা সন্তোষজনক নহয়। বিজেপিৰ মূল ভেটিটোৱেই হৈছে উজনি, মধ্য অসম আৰু বৰাক উপত্যকা। কিন্তু সমীক্ষাৰ ফলাফলে উজনিৰ লগতে বৰাক উপত্যকাত বহুসংখ্যক বিধায়কৰ প্রার্থিত্বলৈ অনিশ্চয়তা কঢ়িয়াই আনিছে। আনহাতে, বয়সৰ বাবেও বহুকেইজন বিধায়কে এইবাৰ দলীয় টিকট লাভনকৰিব। উক্ত সমষ্টিবোৰত নতুন মুখক প্রার্থিত্ব প্রদান কৰা হ'ব পাৰে। চলিত বর্ষত এতিয়ালৈকে ১২৬টা সমষ্টিতে দুটাকৈ সমীক্ষা চলোৱাৰ কথা ব্যক্ত কৰি সূত্ৰটোৱে কয় যে উক্ত সমীক্ষাত তিনিচুকীয়াৰ বিধায়ক তথা প্রাক্তন মন্ত্রী সঞ্জয় কিষাণ, মৰাণৰ চক্ৰধৰ গগৈ, লাহোৱালৰ বিনোদ হাজৰিকা, ডিগবৈৰ সুৰেন ফুকন, দুলীয়াজানৰ তেৰচ গোৱালা, বিহপুৰীয়াৰ অমিয় কুমাৰ ভূঞা, ঢকুৱাখনাৰ নৱ কুমাৰ দলে, সোণাৰিৰ ধৰ্মকান্ত কোঁৱৰ, বিশ্বনাথৰ প্ৰমোদ বৰঠাকুৰ, শিলচৰৰ দীপায়ন চক্ৰৱৰ্তী, উদৰবন্দৰ মিহিৰকান্ত সোম, ডিফুৰ বিদ্যাছিং ইংলেং, বৰচলাৰ গণেশ কুমাৰ লিম্বু, গহপুৰৰ উৎপল বৰা, দিছপুৰৰ অতুল বৰা, ছিপাঝাৰৰ পৰমানন্দ ৰাজবংশী, লামডিঙৰ শিবু মিশ্র, হাজোৰ সুমন হৰিপ্রিয়া, হাওৰাঘাটৰ দৰছিং ৰংহাং আদিকে ধৰি কেইবাগৰাকী বিধায়কৰ পাৰদৰ্শিতা একেবাৰে সন্তোষজনক নহয় বুলি সমীক্ষাত প্রকাশ পাইছে। 

ইয়াৰে ভিতৰত সুমন হৰিপ্ৰিয়াৰ সমষ্টিটো অৱশ্যে সমষ্টি পুনৰ নিৰ্ধাৰণত অনুসূচিত জাতিৰ বাবে সংৰক্ষিত কৰা হৈছে। কিন্তু সুমন হৰিপ্ৰিয়াৰ প্ৰদৰ্শন ইমানেই শোচনীয় যে তেওঁ আন সমষ্টিতো প্রার্থিত্ব পোৱাৰ সম্ভাৱনা বহু পৰিমাণে খীণ। অৱশ্যে বিধানসভাৰ নিৰ্বাচনৰ পূৰ্বে দলটোৱে আৰু কেইবাটাও সমীক্ষা চলাব বুলি জানিবলৈ দি সূত্রটোৱে কয় যে সকলোবোৰ সমীক্ষা চালি-জাৰি চোৱাৰ অন্ততহে প্রার্থিত্ব প্রদানৰ চূড়ান্ত সিদ্ধান্ত গ্রহণ কৰা হ'ব। সেই অনুসৰি অহা ডিচেম্বৰ বা জানুৱাৰীৰ প্ৰথম ভাগৰ ভিতৰত এই সমীক্ষা চলোৱা কাম সমাপ্ত হ'ব। ইয়াৰ পাছত মাৰ্চ মাহত প্ৰাৰ্থীৰ তালিকা চূড়ান্ত কৰা হ'ব। 

উল্লেখযোগ্য যে নিৰ্বাচনৰ প্ৰতি লক্ষ্য ৰাখি মুখ্যমন্ত্রী ড° হিমন্ত বিশ্ব শর্মাই প্রতিজন বিধায়ককে নিজ নিজ সমষ্টিত ২৪ ঘণ্টাই কাম কৰাৰ বাবে নির্দেশ দিছে। যদিহে কাম-কাজ সন্তোষজনক নহয়, তেনেহ'লে প্রার্থিত্ব লাভ নকৰিব বুলিও তেওঁ পৰোক্ষভাৱে স্পষ্ট কৰি দিছে। এনে পৰিস্থিতিত তৃতীয়বাৰ ক্ষমতালৈ অহাৰ স্বাৰ্থত এইবাৰ বিজেপিয়ে প্রার্থিত্ব প্রদানৰ ক্ষেত্ৰত কঠোৰ স্থিতি গ্রহণ কৰিব যে সেয়া এক প্ৰকাৰ স্পষ্ট হৈ পৰিছে। হয়তো এনে কঠোৰ স্থিতিৰ বাবে প্রার্থিত্ব হেৰুৱাব লাগিব বহুসংখ্যক দলীয় বিধায়কে।

Share This