আজি মুকলি হ'ল জাগীভকতগাঁৱৰ নতুন দলং

Kakali Deka February 01, 2025

ডিজিটেল ডেস্ক: ওৰ পৰিল মৰিগাঁও জিলাবাসীৰ দীৰ্ঘদিনীয়া সমস্যাৰ।আজি মুকলি হ'ল জাগীভকতগাঁৱৰ নতুন দলং।কপিলী নৈৰ ওপৰত নিৰ্মাণ কৰা হৈছে দলংখন।মৰিগাঁও জিলাৰ এক দীর্ঘদিনীয়া সমস্যাৰ  ওৰ পেলাই আজি যাতায়াত-যোগাযোগ ব্যৱস্থাত নতুন সংযোজন ঘটাই ৰাইজৰ বাবে জাগী ভকতগাঁৱৰ নিৰ্মীয়মাণ কপিলী নৈৰ ওপৰত নৱনিৰ্মিত দলংখন ৰাইজৰ বাবে মুকলি কৰে মুখ্যমন্ত্রী ড° হিমন্ত বিশ্ব শর্মাই।

নৱনিৰ্মিত দলংখন উদ্ধোধনৰ পাছতেই জিলাখনৰ যাতায়াত-যোগাযোগ ব্যৱস্থা অতি সুচল হৈ পৰিল। ইয়াক লৈ ৰাইজৰ মাজত সৃষ্টি হৈছে প্ৰবল উৎসাহ।উল্লেখযোগ্য যে মৰিগাঁও সদৰ আৰু জাগীৰোড সংযোগী পথত থকা জাগীভকত গাঁৱৰ কপিলী নৈৰ ওপৰৰ আওপুৰণি দলংখনে সৰ্বসাধাৰণৰ যাতায়াতৰ ব্যৱস্থাত সমস্যাৰ সন্মুখীন হৈ আছিল।প্রায় ১৫ বছৰ পূৰ্বে দলংখনৰ নিৰ্মাণ কাৰ্য আৰম্ভ কৰিছিল যদিও দীৰ্ঘদিন ধৰি দলংখনৰ নিৰ্মাণ কাৰ্য স্থবিৰ হৈ পৰাত দলংখনৰ নিৰ্মাণ কাৰ্য খৰতকীয়া কৰিবলৈ জিলাখনৰ বিভিন্ন দল-সংগঠনে বিভিন্ন সময়ত আন্দোলনৰ কাৰ্যসূচীও গ্রহণ কৰিছিল। ইয়াৰ মাজতে  জাগীৰোড সমষ্টিৰ বিধায়ক তথা মন্ত্ৰী পীয়ূষ হাজৰিকাৰ তৎপৰতাত দলংখনৰ নিৰ্মাণ কাৰ্যই নতুন গতি লাভ কৰাত ৰাইজে শলাগ লয়।আনহাতে মুখ্যমন্ত্রী ড° শর্মাই দলংখন ৰাইজৰ বাবে উৎসৰ্গা কৰাৰ পাছতে এখন ৰাজহুৱা সভাতো ভাষণ আগবঢ়ায়। 

পুৰণি দলংখনৰ সমান্তৰালকৈ নিৰ্মাণ কৰা দলংখন উদ্বোধন হোৱাত জিলাখনৰ ৰাইজে যাতায়াতৰ ক্ষেত্রত দীর্ঘদিন ধৰি ভোগ কৰি অহা আহুকালৰ অন্ত পৰে। জাগীৰোড-মৰিগাঁও সংযোগী পথৰ কপিলী নৈৰ ওপৰত থকা ভকতগাঁও দলংখন প্রায় ৮০ কোটি টকা ব্যয় সাপেক্ষে নিৰ্মাণ হৈছে।কেইবাদশক ধৰি ঠেক দলং হিচাপে যথেষ্ট আহুকালৰ সৃষ্টি কৰিছিল কপিলী নৈৰ এই দলংখনে। এটা দিশৰ পৰা চাৰিচকীয়া বাহন আহিলে ইটো দিশৰ দলঙৰ মূৰতে ৰৈ দিব লাগিছিল আন আন বাহনসমূহ। অতি কম দিনত নির্মাণ সম্পূর্ণ হৈ উঠা এই দলঙে এতিয়া সুচল কৰিব।

Share This