ফেশ্বন ডিজাইনাৰ সংযুক্তা দত্তক শুভেচ্ছা মুখ্যমন্ত্ৰীৰ

dainik janambhumi August 09, 2025

ডিজিটেল ডেস্ক : হাতে বোৱা পাট কাপোৰত প্ৰধানমন্ত্ৰী নৰেন্দ্ৰ মোদীৰ প্রতিচ্ছবিৰ লগতে বিজেপিৰ প্ৰতীক চিহ্ন পদুম ফুলসম্বলিত এখন অগতানুগতিক অংগবস্ত্র প্রধানমন্ত্রী মোদীলৈ প্ৰেৰণ কৰা ফেশ্বন ডিজাইনাৰ সংযুক্তা দত্তক শুভেচ্ছা জনাইছে মুখ্যমন্ত্রী ড° হিমন্ত বিশ্ব শর্মাই। সামাজিক মাধ্যমত মুখ্যমন্ত্ৰীয়ে উল্লেখ কৰে যে অসমৰ বস্ত্ৰশিল্প, বিশেষকৈ পাট-মুগা বস্ত্ৰৰ সমাদৰ দেশ-বিদেশত নিশ্চিতকৈ বৃদ্ধি পাইছে। দেশৰ এগৰাকী প্রসিদ্ধ ফেশ্বন ডিজাইনাৰ সংযুক্তা দত্তই নিজস্ব ধৰণে কাম কৰি এই প্ৰসাৰত সহায়ৰ হাত আগবঢ়াই অহাৰ কথা আমি সময়ে সময়ে জানিবলৈ পাওঁ, যাক লৈ আমি সদায় গৌৰৱবোধ কৰোঁ। 

শেহতীয়াকৈ দেশৰ যশস্বী প্ৰধানমন্ত্ৰী নৰেন্দ্ৰ মোদীলৈ সন্মান জনাই তেওঁ পাটৰ কাপোৰত বিশ্বনেতাগৰাকীৰ প্ৰতিকৃতি অংকন কৰিছে। এয়া প্ৰকৃতাৰ্থত জনতাৰ হৃদয় জয় কৰা নেতাগৰাকীৰ প্ৰতি জনতাৰ মৰমৰ প্রকাশ। সংযুক্তা দত্তৰ চিন্তা আৰু সৃষ্টিৰ শলাগ লৈ অসমৰ পৰিচয় স্বৰূপ বস্ত্ৰশিল্পৰ দিশত কাম কৰি থকা দত্তক মুখ্যমন্ত্রীয়ে শুভেচ্ছা জনায়। অসমৰ ৰেচম শিল্পক ইতিমধ্যে বিশ্ব দৰবাৰলৈ নিয়া সুনিপুণ শিল্পীসকলৰ ভিতৰত অন্যতম আন্তর্জাতিক খ্যাতিসম্পন্ন ফেশ্বন ডিজাইনাৰ তথা অসম কন্যা সংযুক্তা দত্ত। হাতে বোৱা পাটৰ অংগবস্ত্ৰত ছিল্ক-গুণা ব্যৱহাৰেৰে প্ৰধানমন্ত্ৰী মোদীৰ লগতে পদুম ফুলৰ প্ৰতিচ্ছবি চিহ্নিত কৰাৰ লগতে কাঁ ফিল্ম ফেষ্টিভেলত ৰেড কার্পেটত ইতিমধ্যে অসম কন্যা দত্তই প্ৰস্তুত কৰা হাতে বোৱা ৰেচমী বস্ত্ৰ পৰিধান কৰি আন্তঃৰাষ্ট্ৰীয় খ্যাতিসম্পন্ন ছুপাৰ মডেল মিকা অক্টভিয়া হেন্ড্রড্ৰ' আৰু ভেলেৰিয়া হেজৰটেনাছে উজলাই তুলিছিল অসমৰ আপুৰুগীয়া বস্ত্ৰসম্ভাৰ। 

বৃহস্পতিবাৰৰ ৰাষ্ট্ৰীয় হস্ততাঁত দিৱসৰ দিনটোতে এইগৰাকী আন্তর্জাতিক খ্যাতিসম্পন্ন ফেশ্বন ডিজাইনাৰ তথা অসম কন্যা সংযুক্তা দত্তই এক ইতিহাস ৰচিলে। ৰাষ্ট্ৰীয় হস্ততাঁত দিৱসৰ দিনটোতে প্রধানমন্ত্রী মোদীলৈ অসম কন্যা তথা আন্তর্জাতিক খ্যাতিসম্পন্ন ফেশ্বন ডিজাইনাৰ সংযুক্তা দত্তই উপহাৰ হিচাপে প্ৰেৰণ কৰা কাৰ্যই ৰাষ্ট্ৰীয় পৰ্যায়ত বিশেষ চর্চা লাভ কৰিছে। উল্লেখযোগ্য যে প্রধানমন্ত্রী মোদীলৈ প্ৰেৰণ কৰা হাতে বোৱা পাট-কাপোৰৰ অংগবস্ত্ৰখনত দুই মূৰত দুশাৰী প্ৰধানমন্ত্ৰী মোদীৰ প্ৰতিচ্ছবি আছে আৰু ইয়াৰ মাজত স্থান দিয়া হৈছে বিজেপিৰ প্ৰতীক চিহ্ন পদুম ফুল।

Share This