নম্ৰতাৰ মৃত্যুৰে সাঙোৰ খাইছে বিধায়ক-পুত্ৰৰ নাম

dainik janambhumi June 06, 2025

ডিজিটেল ডেস্কঃ গুৱাহাটী উচ্চ ন্যায়ালয়ৰ অধিবক্তা তথা গোলাঘাটৰ যুৱতী নম্রতা বৰাৰ মৃত্যুৰ ঘটনাত এইবাৰ সাঙোৰ খাইছে এ আই ইউ ডি এফৰ যুৱ নেতাৰ নাম। মেঘালয়ত সূর্যোদয় চাবলৈ গৈ পথ দুর্ঘটনাত নিহত নম্রতা বৰাৰ অস্বাভাৱিক মৃত্যুৰ ঘটনাক পৰিকল্পিত হত্যাকাণ্ড বুলি সন্দেহ কৰি পৰিয়ালে তদন্ত বিচাৰি অনুৰোধ কৰিলে ৰাজ্যৰ মুখ্যমন্ত্ৰী আৰু ডি জি পিক।

 আনহাতে, ঘটনাৰ তদন্ত বিচাৰি পৰিয়ালে মেঘালয়ৰ উপৰি অসমৰ আৰক্ষী থানাত পৃথকে এজাহাৰ দাখিল কৰে। উল্লেখযোগ্য যে বন্ধুৰ সৈতে শ্বিলঙলৈ ফুৰিবলৈ গৈ মৃত্যুক সাবটি ল'ব লগা হোৱা অধিবক্তা নম্রতা বৰাৰ ঘটনাই নতুন মোৰ লৈছে। নিশা আকস্মিকভাৱে ঘৰৰ পৰা ওলাই গৈ মেঘালয়ত দুর্ঘটনাত পতিত হোৱা ঘটনাত নাম সাঙোৰ খাইছে এজন এ আই ইউ ডি এফ দলৰ যুৱ নেতাৰ নাম। দলটোৰ যুৱ নেতা আনায়াতুল ৱাদুদৰ গাড়ীত যোৱা যুৱতীগৰাকী দুৰ্ঘটনাত পতিত হোৱাৰ পাছত বিপদগ্রস্ত অৱস্থাতে এৰি পলায়ন কৰিছিল। 

উল্লেখযোগ্য যে আনায়াতুল ৱাদুদ হ'ল এ আই ইউ ডি এফ দলৰ বিধায়ক হাফিজ বছিৰ আহমেদ কাছিমীৰ পুত্র। বিলাসীপাৰা পশ্চিম সমষ্টিৰ বিধায়ক কাছিমীৰ পুত্ৰ আনায়াতুল ৱাদুদ আকৌ এ আই ইউ ডি এফ দলৰ যুৱ বাহিনীৰো কাৰ্যকৰী সভাপতি। 

উল্লেখযোগ্য যে কালি পুৱতি নিশা মেঘালয়ৰ ৰি-ভই জিলাৰ চাংৱাংলা অঞ্চলত এক ভয়াৱহ পথ দুর্ঘটনা সংঘটিত হৈছিল। দুর্ঘটনাটোত গোলাঘাটৰ কমাৰগাঁৱৰ ২৫ বছৰীয়া নম্রতা বৰাৰ মৃত্যু হৈছিল। কিন্তু সকলো কথা গম পোৱাৰ পাছত এই দুর্ঘটনাক সহজভাৱে ল'ব পৰা নাই মৃত নম্রতা বৰাৰ পৰিয়ালে। পৰিকল্পিতভাৱে এই ঘটনা সংঘটিত কৰাৰ সন্দেহ কৰি ঘটনা সন্দৰ্ভত তদন্ত কৰাৰ বাবে মৃত নম্রতা বৰাৰ ভাতৃ ঋষভানন্দন বৰাই মেঘালয়ৰ ৰি-ভই জিলাৰ নংপো আৰক্ষী থানাত এখন এজাহাৰ দাখিল কৰিছে। লগতে অভিযুক্ত হিচাপে এজাহাৰত মৃগাংক বৰা, প্রজ্ঞা দিহিঙীয়া, আনায়াতুল বাদুদ আৰু গায়ত্ৰী বৰাৰ নাম উল্লেখ কৰা হৈছে। তেওঁ এজাহাৰ সম্পর্কত উল্লেখ কৰে যে কাৰ ভুলৰ বাবে তেওঁৰ ভগ্নীৰ মৃত্যু হ'ল তাৰ তদন্ত বিচাৰিছে। দুর্ঘটনাটো হোৱাৰ পাছত ভগ্নীক মৃগাংক বৰা আৰু প্ৰজ্ঞা দিহিঙীয়াই হস্পিটেললৈ লৈ গৈছিল। কিন্তু লগত থকা আনায়াতুল বাদুদ আৰু গায়ত্রী বৰা আঁতৰি গৈছিল। ভগ্নীৰ মৃত্যুৰ ঘটনাৰ আঁৰত ৰহস্য থকাৰ সন্দেহ কৰি তদন্ত বিচাৰি এজাহাৰ দিয়া বুলি তেওঁ প্রকাশ কৰে। বাহনখনত থকাকেইজনৰ বিৰুদ্ধে আইনী ব্যৱস্থা গ্ৰহণৰ বাবে তেওঁ আৰক্ষীক অনুৰোধ জনোৱা বুলিও প্রকাশ কৰে। 

আনহাতে, নিহত যুৱতীগৰাকীৰ পৰিয়ালে আজি অনলাইনযোগে দিছপুৰ থানাতো এজাহাৰ দাখিল কৰে। এই এজাহাৰত কেইবাটাও গুৰুত্বপূৰ্ণ অভিযোগ কৰা হৈছে। প্রাপ্ত তথ্য অনুসৰি যোৱা ৩ জুনৰ নিশা প্রায় ১-৩০ বজাত এগৰাকী বান্ধৱীয়ে নম্রতালৈ ফ'ন কৰাৰ পাছত প্রজ্ঞা বৰা, মৃগাংক বৰুৱা, গায়ত্ৰী বৰুৱা আৰু আনায়াতুল ৱাদুদৰ সৈতে নম্রতা গুৱাহাটীৰ পৰা মেঘালয়লৈ বুলি ওলাই যায়। কিন্তু ৪ তাৰিখে পুৱতি নিশা গুৱাহাটীলৈ ওভতাৰ পথত এক দুর্ঘটনাত পতিত হৈ নম্ৰতাৰ মৃত্যু হোৱাৰ খবৰ পৰিয়ালে লাভকৰে। কিন্তু দুর্ঘটনাটো সংঘটিত হোৱাৰ পাছতে বন্ধুকেইজনক এৰি আনায়াতুলে গাড়ী লৈ পলায়ন কৰাৰ অভিযোগ উঠিছে। তাৰ পাছতে মৃগাংক বৰুৱা আৰু প্রজ্ঞা বৰাই ৰাজপথেৰে গৈ থকা এখন পৰ্যটকৰ বাহন ৰখাই নম্রতাক নংপো অসামৰিক চিকিৎসালয়ত ভৰ্তি কৰায় যদিও তাতে চিকিৎসকে তেওঁক মৃত ঘোষণা কৰে। ইয়াৰ পাছতে নংপো আৰক্ষীয়ে বিষয়টো সন্দৰ্ভত সোধা-পোছাৰ বাবে পলায়ন কৰা গাড়ীৰ গৰাকী আনায়াতুলক ফ'ন কৰি থানালৈ মাতে। তেতিয়াই আনায়াতুলে ইছমাইল হক চৌধুৰী নামৰ আন এজন ব্যক্তিয়ে বাহনখন চলোৱা বুলি নংপো আৰক্ষীৰ আগত হাজিৰ কৰায়। লগতে বাহনখনে ৰখাই থোৱা ট্রাকত খুন্দা মৰা বুলি আৰক্ষীৰ আগত প্রকাশ কৰে। কিন্তু তেওঁলোকৰ বাহনখনৰ সন্মুখভাগ ক্ষতিগ্রস্ত হোৱাৰ কোনো চিন নথকাৰ লগতে মাত্র বাহনখনৰ বাওঁফালৰ পিছৰ দৰ্জাখনহে ভাগি যোৱাটো স্পষ্ট হৈ আছিল। ইয়াকে লৈ এতিয়া সমগ্র ঘটনাত সন্দেহ প্রকাশ কৰিছে নম্ৰতাৰ পৰিয়ালে। 

আনহাতে, নম্ৰতাৰ সৈতে বিধায়ক পুত্ৰৰ কি সম্পর্ক আছিল সেই বিষয়ে পৰিয়ালৰ লোক এতিয়াও জ্ঞাত নহয় বুলি জানিবলৈ দিয়ে। প্রণিধানযোগ্য যে তেওঁলোকে এ এছ-০১-ই ভি-৯৫৭৮ নম্বৰৰ হুণ্ডাই আল্কাজাৰ বাহনখনত উঠি শ্বিলঙলৈ গৈছিল। গোলাঘাট জিলাৰ কমাৰগাঁৱৰ বাসিন্দা নম্রতাই গুৱাহাটীৰ ৰুক্মিণীগাঁৱৰ নেহা এপার্টমেণ্টৰ এটা ফ্লেটত আন দুগৰাকী বান্ধৱীৰ সৈতে ভাৰা লৈ আছিল। জে বি আইন মহাবিদ্যালয়ৰ পৰা এল এল বি ডিগ্রী লৈ নাই মহানগৰীত অধিবক্তাৰ কেৰিয়াৰ আৰম্ভ কৰিছিল। দুর্ঘটনাটোৰ খবৰ পোৱাৰ পাছতে ৰি-ভই জিলাৰ উপ-পৰিদৰ্শক পি উমিয়াপ ঘটনাস্থলীত উপস্থিত হৈ সমস্ত ঘটনাৰ বুজ লয়। তেওঁ কয় যে বাহনখনত দৰং জিলাৰ ছিপাঝাৰৰ ইছমাইল হক চৌধুৰী (৩৩) চালকৰ আসনত আছিল। বাহনখনত থকা আন পাঁচজন যাত্রী হ'ল গুৱাহাটীৰ আনায়াতুল ৱাদুদ (৩৯), মঙলদৈৰ গায়ত্ৰী বৰা (২৫), চৰাইদেউৰ প্ৰজ্ঞা দিহিঙীয়া (২৯), গোলাঘাটৰ মৃগাংক বৰা (২৬) আৰু গোলাঘাটৰ নম্রতা বৰা (২৫)। দুর্ঘটনাটোত মূৰত গুৰুতৰভাৱে আঘাত পোৱা নম্রতা বৰাক নংপোৰ চিভিল হস্পিটেললৈ নিয়া হয় যদিও চিকিৎসকে মৃত ঘোষণা কৰে। ইফালে, আৰক্ষী ঘটনাস্থলীত উপস্থিত হোৱাৰ পূৰ্বেই দুর্ঘটনাগ্রস্ত বাহনখন অসমলৈ লৈ যোৱা বুলি তেওঁ প্রকাশ কৰে। মেঘালয় আৰক্ষীয়ে লগে লগে অসম আৰক্ষীক ঘটনা সন্দৰ্ভত খবৰ দিয়ে আৰু আনায়াতুল দুর্ঘটনাগ্রস্ত গাড়ীখন লৈ গুৱাহাটীত উপস্থিত হোৱাৰ লগে লগে বশিষ্ঠ এলেকাত আৰক্ষীয়ে গাড়ীখন জব্দ কৰে। ইফালে, দুৰ্ঘটনাৰ খবৰ পোৱাৰ পাছত পিতৃয়ে টেলিফ'নযোগে কন্যা নম্রতাৰ লগত থকা প্ৰজ্ঞা দিহিঙীয়াৰ সৈতে কথা পতাৰ সময়ত তেওঁলোক বৰাপানীত সূর্যোদয়ৰ দৃশ্য চাবলৈ গৈছিল বুলি প্রকাশ কৰে। কিন্তু পলম হোৱাৰ বাবে তেওঁলোকে আদবাটৰ পৰাই ঘূৰিবলৈ লৈছিল আৰু সেই সময়তে তেওঁলোকৰ গাড়ীখন দুর্ঘটনাত পতিত হোৱা বুলি প্রকাশ কৰিছিল। দুৰ্ঘটনাৰ খবৰ পোৱাৰ পাছতে নম্ৰতাৰ পৰিয়ালৰ লোকে গুৱাহাটীত থকা নম্ৰতাৰ সম্বন্ধীয় এগৰাকী যুৱতীৰ সৈতে যোগাযোগ কৰিছিল। তেওঁ গৈ পুৱাই নম্রতাৰ ফ্লেটত উপস্থিত হৈছিল। ৩জনী যুৱতী থকা সেই ফ্লেটটোত আছিল ৩টা বেডৰূম। প্ৰতিগৰাকীয়ে ক'ৰবালৈ গ'লে নিজৰ বেডৰূমটো বন্ধ কৰি যায়। কিন্তু সেইদিনা নম্রতাৰ কোঠাৰ দুৱাৰ খোলা আছিল। খোলা দুৱাৰেৰে কোঠাত প্ৰৱেশ কৰি তেওঁ নম্রতাই ব্যৱহাৰ কৰা আইফ'নটোও এৰি থৈ যোৱা প্ৰত্যক্ষ কৰিছিল। এই কথায়ো ঘটনাটো অধিক ৰহস্যঘন কৰি তুলিছে

Share This