ঢেকীয়াজুলিৰ এখন ঘৰত শ্বৰ্ট চাৰ্কিটৰ ফলত ভয়ংকৰ অগ্নিকাণ্ড

Kakali Deka March 04, 2025

ডিজিটেল ডেস্কঃ শোণিতপুৰ জিলাৰ ঢেকীয়াজুলিৰ চিৰাজুলিৰ দেৱব্ৰত মহন্তৰ বাসগৃহত ভয় অগ্নিকাণ্ড৷ শ্বৰ্ট চাৰ্কিটৰ ফলতে বিধ্বংসী অগ্নিকাণ্ডটি সংঘটিত হোৱাৰ সন্দেহ৷ আনুমানিক ডেৰ কোটি টকাৰ সা-সম্পত্তিৰ ক্ষয়ক্ষতি৷

বিধ্বংসী অগ্নিকাণ্ডৰ ফলত নিমিষতে জ্বলি শেষ হ'ল পৰিয়ালটিৰ আৱাসগৃহ। দপদপকৈ জ্বলি উঠে জুই আৰু কথমপিহে পৰিয়ালৰ লোকসকলৰ প্ৰাণ ৰক্ষা পৰে৷ কম সময়ৰ ভিতৰতে জুইৰ লেলিহান শিখাই পৰিয়ালটোৰ বাসগৃহৰ আটাইকেইটা কোঠা আগুৰি ধৰে৷ লগে লগে পৰিয়ালটোৰ সদস্যসকলৰ মাজত হাহাকাৰ লাগে আৰু যেনেতেনে নিজক ৰক্ষা কৰি বাহিৰলৈ ওলাই আহিবলৈ সক্ষম হোৱা পৰিয়ালটোৱে উপায়বিহীন হৈ সহায় বিচাৰি চিঞৰ-বাখৰ কৰে৷ পৰিয়ালৰ সদস্যই অগ্নি নিৰ্বাপক বাহিনীৰ লগতো যোগাযোগ কৰে৷ পাছত প্ৰতিবেশীসকল আহি পৰিয়ালটোৰ বাসগৃহত উপস্থিত হৈ কম পৰিমাণৰ বয়-বস্তুহে ঘৰৰ বাহিৰ কৰিব পাৰে৷ 

ইতিমধ্যে জুইত জাহ গ’ল পৰিয়ালটোৰ বহু সা-সম্পত্তি৷ কিছু পলমকৈ অগ্নিনিৰ্বাপক বাহিনীৰ লোক ঘটনাস্থলীলৈ আহি জুই নিৰ্বাপণ কৰে৷ শ্বৰ্ট চাৰ্কিটৰ ফলতেই এই অগ্নিকাণ্ড সংঘটিত হোৱাৰ সন্দেহ কৰা হৈছে৷ পৰিয়ালৰ লোকে জনোৱা মতে অগ্নিকাণ্ডটোৰ ফলত আনুমানিক ডেৰকোটি টকাৰ সা-সম্পত্তি হানি হৈছে৷

উৎস: প্ৰাগ নিউজ ডিজিটেল

 

Share This