মাশ্বৰূম খেতিৰে সমৃদ্ধিশালী হৈছে ধুবুৰীৰ তাপসী মণ্ডল

Kakali Deka March 13, 2025

ডিজিটেল ডেস্কঃ গ্ৰাম্য অৰ্থনীতিৰ ভেঁটি সবল কৰি তুলিব পৰা এক খেতি হ'ল মাশ্বৰূম বা কাঠফুলা। এই মাশ্বৰূম (Mushroom) সকলোৰে বাবে অতি আৱশ্যকীয় উপাদানেৰে পৰিপূৰ্ণ খাদ্য। কিয়নো ইয়াত পুষ্টিকৰ গুণ বহু পৰিমাণে অন্তনিৰ্হিত হৈ থাকে। আটাইতকৈ ডাঙৰ কথা অতি কম মূলধনত এই খেতি কৰিব পৰা যায়।

ধুবুৰীৰ অসম-পশ্চিম বংগ সীমান্তৰ জিনকাটা নামৰ দুৰ্গম গাঁওখনৰ বাসিন্দা তাপসী মণ্ডল নামৰ মহিলাগৰাকীয়ে মাশ্বৰূম খেতিক এক সমৃদ্ধিশালী জীৱিকালৈ ৰূপান্তৰিত কৰিছে।

মাশ্বৰূম খেতিৰ জৰিয়তে তেওঁ কেৱল আৰ্থিক স্বাধীনতা লাভ কৰাই নহয়, তেওঁৰ সমাজৰ বহুতৰে বাবে প্ৰেৰণাৰ উৎস হৈ পৰিছে।

প্ৰায় দুবছৰ ধৰি মাশ্বৰূম খেতিৰ কামত নিয়োজিত হৈ থকা মণ্ডলে ২০২৪ চনত প্ৰধানমন্ত্ৰী ফৰ্মেলাইজেচন অৱ মাইক্ৰ’ ফুড প্ৰচেছিং এণ্টাৰপ্ৰাইজ (পিএমএফএমই) আঁচনিৰ জৰিয়তে আৰ্থিক সাহায্য লাভ কৰিছিল।

এই সাফল্যৰ দ্বাৰা অসমৰ গ্ৰাম্য অঞ্চলত আৰ্থিক স্বাধীনতা আৰু সামাজিক প্ৰগতিৰ বাবে চেষ্টা কৰা বহু মহিলাৰ বাবে আশাৰ ৰেঙণি হৈ পৰিছে তাপসী মণ্ডল।

২ লাখ টকাৰ ঋণৰ ফলত তেওঁ উৎপাদন বৃদ্ধি কৰিবলৈ সক্ষম হৈছিল আৰু এতিয়া তেওঁ নিয়মিতভাৱে প্ৰায় ২০-২৫ কিলোগ্ৰাম মাশ্বৰূমৰ খেতি কৰে।

তেওঁৰ ফাৰ্মৰ সতেজ মাশ্বৰূম প্ৰতি কিলোগ্ৰামত ২০০ টকাত বিক্ৰী হয়, আনহাতে শুকান মাশ্বৰূমৰ দাম প্ৰতি কিলোগ্ৰামত ২৫০ টকা।মাশ্বৰূমৰ চাহিদা বৃদ্ধিৰ বাবে তাপসীৰ ব্যৱসায় ক্ৰমাগতভাৱে বৃদ্ধি পাইছে।

মাশ্বৰূম খেতিৰ উপৰিও তাপসী মণ্ডলে মিঠাই, আচাৰ, বিস্কুট, ভূজিয়া, নিমকি আদি বিভিন্ন ধৰণৰ খাদ্য সামগ্ৰী প্ৰস্তুত কৰি আৰু সেইবোৰ বিক্ৰী কৰিও অৰ্থনৈতিক ভাৱে শক্তিশালী হৈছে। তাপসীৰ ফাৰ্মৰ মাশ্বৰূমৰ লগতে তৈয়াৰী এই সামগ্ৰীসমূহে গ্ৰাহকৰ মাজত অপৰিসীম জনপ্ৰিয়তা লাভ কৰিছে।

নিজৰ দক্ষতা পৰিশোধন কৰিবলৈ বিটিআৰৰ বাগৰিবাৰীৰ আৰ্ট অৱ লিভিং ইনষ্টিটিউটৰ সহায়ত দ্য ইউনিভাৰ্চিটি অৱ কোকৰাঝাৰত মাশ্বৰূম খেতিৰ প্ৰশিক্ষণ লয় তাপসীয়ে।

উদ্যমী যাত্ৰাক আৰু এখোজ আগুৱাই লৈ গৈ মণ্ডলে গাঁৱৰ আন ১২ গৰাকী মহিলাৰ সৈতে শ্যাম কানু আত্মসহায়ক গোটৰো প্ৰতিষ্ঠা কৰিছে।

গোটৰ সভানেত্ৰী লিপিকা বৰ্মনৰ নেতৃত্বত তেওঁলোকে খাদ্য উৎপাদন আৰু বিভিন্ন সামাজিক পদক্ষেপত সক্ৰিয়ভাৱে নিয়োজিত হৈ গাঁওখনৰ মহিলা সবলীকৰণত যথেষ্ট অৰিহণা যোগাইছে।

জিনকাটাৰ বাহিৰেও মণ্ডলৰ এই উদ্যোগে হালাকুৰা আৰু গোলকগঞ্জৰ দৰে অঞ্চলত ব্যাপক প্ৰশংসা লাভ কৰিছে।

তাপসী মণ্ডলে মহিলাৰ উন্নয়নৰ ওপৰত চৰকাৰৰ মনোনিৱেশক এক ডাঙৰ প্ৰেৰণা হিচাপে কৃতিত্ব দিছে। তেওঁ কয় যে প্ৰধানমন্ত্ৰী নৰেন্দ্ৰ মোদীৰ এই পদক্ষেপে মহিলাসকলক আত্মবিশ্বাসেৰে স্বাৱলম্বী হ'বলৈ উৎসাহিত কৰিছে।

উৎস প্ৰাগ নিউজ ডিজিটেল