২০ ফেব্ৰুৱাৰীত দিছপুৰ ঘেৰাও

Dainik janambhumi February 10, 2025

ডিজিটেল ডেস্ক: গুৱাহাটীৰ ৮৫ হাজাৰ পৰিয়ালক ভূমি পট্টা প্ৰদানৰ দাবীত পুনৰ আন্দোলন ঘোষণা কৰিলে ভূমি অধিকাৰ সংগ্রাম সমিতিয়ে। অহা ২০ ফেব্ৰুৱাৰীত সংগঠনটোৱে ভূমি পট্টাৰ পৰা বঞ্চিত হৈ থকা মহানগৰবাসীক পট্টা প্ৰদানৰ দাবীত দিছপুৰ ঘেৰাও কৰিব। 

ইতিমধ্যে এই আন্দোলন ঘোষণা কৰি বঞ্চিতৰ লগতে অন্য সকলো জনসাধাৰণকে আন্দোলন কাৰ্যসূচীত অংশগ্রহণ কৰিবলৈ প'ষ্টাৰিং আৰু দেৱাল লিখনেৰে আহ্বান জনাইছে। উল্লেখযোগ্য যে ৰাজ্য চৰকাৰৰ বসুন্ধৰা ৩.০ সংস্কৰণৰ গাইডলাইন অনুসৰি পাহাৰবাসীয়ে ভূমি পট্টা লাভ নকৰিব। চৰকাৰৰ এই নির্দেশনাৰ পাছতে পট্টাহীন জনসাধাৰণ জাঙুৰ খাই উঠিছে। পাহাৰৰ ভূমিত পট্টা প্রদান নকৰিবলৈ চৰকাৰে লোৱা সিদ্ধান্তক জনগণ-বিৰোধী আখ্যা দিছে দীর্ঘদিন ধৰি মহানগৰবাসীৰ ভূমি পট্টাৰ দাবীত সংগ্রাম কৰি অহা ভূমি অধিকাৰ সংগ্ৰাম সমিতিয়ে। 

সংগঠনটোৱে গুৱাহাটীৰ পাহাৰ অঞ্চলত দীর্ঘদিন ধৰি বসবাস কৰি অহা লোকসকলক পট্টা প্রদান কৰিবলৈ চৰকাৰক দাবী জনায়। প্রণিধানযোগ্য যে বসুন্ধৰা ২.০ৰ সময়ত আৱেদন কৰাৰ পাছতো পট্টা লাভ নকৰা লোকসকলেও বসুন্ধৰা ৩.০-ত পট্টা লাভ নকৰে। আগৰবাৰ আৱেদন কৰাৰ বাবে এইবাৰ আনকি তেওঁলোকক পুনৰ আৱেদন কৰাৰ অধিকাৰৰ পৰাও বঞ্চিত কৰা বুলি সংগঠনটোৱে অভিযোগ কৰে।

Share This