ডবকাত বিবাহযাত্ৰীৰ বাহন দুৰ্ঘটনাগ্ৰস্ত! দৰাৰ অৱস্থা সংকটজনক

Kakali Deka February 14, 2025

ডিজিটেল ডেস্কঃ হোজাইৰ নীলবাগানৰ চানাপট্টীত পুৱতিনিশা ভয়ংকৰ পথ দুৰ্ঘটনা সংঘটিত হয়। এখন বিবাহযাত্ৰীৰ বাহন ভয়ংকৰ দুৰ্ঘটনাত পতিত হয়। AS 01 EU 9212 নম্বৰৰ নেক্সন বাহন দুৰ্ঘটনাগ্ৰস্ত।

লংকাৰ গোসাইগাঁৱৰ পৰা জাগীৰোড অভিমুখে গৈ আছিল বিবাহযাত্ৰীৰ বাহনখন। দৰা-কইনাসহ ৫ জন যাত্ৰী আছিল বাহনখনত।

দৰা-কইনাসহ আটাইকেইজন যাত্ৰীয়েই আহত। দৰাৰ নাম শশাংকৰ দাস।

দুৰ্ঘটনাগ্ৰস্ত বাহনখনত আছিল দৰা-কইনাসহ দৰাৰ ভিনিহিয়েক দীপজ্যোতি বিশ্বাস, কইনাৰ আত্মীয় পদ্মা কলিতাসহ অন্য এজন আত্মীয়।

দৰাৰ অৱস্থা সংকটজনক বুলি জানিব পৰা গৈছে। মূৰত গুৰুতৰ আঘাত পাইছে দৰাই। দৰাৰ ভিনিহিয়েকো গুৰুতৰভাৱে আহত হৈছে।

জানিব পৰা মতে চালকৰ আসনত আছিল ভিনিহিয়েক দীপজ্যোতি বিশ্বাস। হোজাই 'হাম' হস্পিটেলৰ পৰা গুৱাহাটীলৈ প্ৰেৰণ কৰা হৈছে দুয়োকে। কইনাৰ আত্মীয় পদ্মা কলিতাৰ দুয়োখন ভৰি ভাগিছে।

দৰাৰ ঘৰ জাগীৰোডৰ ভোমোৰাগুৰিত। লংকাৰ গোসাইগাঁৱৰ পৰা কইনা লৈ পুৱতি নিশা গৈ আছিল জাগীৰোডলৈ।

ঘন কুঁৱলীৰ বাবেই এই দুৰ্ঘটনা সংঘটিত হোৱাৰ সন্দেহ। ফৰলেনযুক্ত ৰাষ্ট্ৰীয় ঘাইপথৰ ৰেলিঙত খুন্দা মাৰি চূৰমাৰ হৈ পৰে বাহনখন।

কইনা লংকাৰ গোসাইগাঁৱৰ অলক কলিতাৰ কন্যা মুনমি কলিতা। অলক কলিতাৰ একমাত্ৰ কন্যা মুনমি। কইনাৰ পিতৃ অলক কলিতাই অসম আৰক্ষীত চাকৰি কৰি অৱসৰ লৈছে।

উৎসঃ প্ৰাগ নিউজ ডিজিটেল