ড° হিমন্ত বিশ্ব শর্মালৈ লাচিত বৰফুকন সাহসিকতা বঁটা

dainik janambhumi August 02, 2025

ডিজিটেল ডেস্ক : সংৰক্ষিত বনাঞ্চল বেদখলমুক্ত কৰাৰ উদ্যোগ গ্রহণ কৰাৰ বাবে পৰিৱেশ সুৰক্ষা
সমিতিয়ে মুখ্যমন্ত্রী ড° হিমন্ত বিশ্ব শর্মাক কৃতজ্ঞতা জ্ঞাপন কৰিছে। আনহাতে, উক্ত বিষয়ৰ বাবে মুখ্যমন্ত্ৰীলৈ লাচিত বৰফুকন সাহসিকতা বঁটা ঘোষণা কৰিছে পৰিৱেশ সুৰক্ষা সমিতি, অসমে। সংগঠনটোৰ সভাপতি ঋতুৰাজ বৰুৱাই এই সন্দৰ্ভত কয় যে পৰিৱেশ সুৰক্ষা সমিতি, অসমৰ কৰ্মীসকলে দীর্ঘদিনৰ পৰা প্ৰকৃতি সুৰক্ষা আৰু প্ৰাকৃতিক পৰিৱেশৰ ভাৰসাম্য ৰক্ষাৰ বাবে অবিৰতভাৱে প্রয়াস চলাই আহিছে। সংৰক্ষিত বনাঞ্চল আৰু ৰাষ্ট্ৰীয় উদ্যানৰ সুৰক্ষাৰ ক্ষেত্ৰত পৰিৱেশ সুৰক্ষা সমিতি, অসমে ২০১০ বৰ্ষৰ পৰাই চৰকাৰক আৱেদন জনোৱাৰ উপৰি সজাগতামূলক কার্যসূচী গ্ৰহণ কৰি আহিছে। 

পৰিৱেশ সুৰক্ষা সমিতি, অসমৰ কৰ্মীসকলে ২০১২ চনত তিনিচুকীয়াৰ পৰা গুৱাহাটীলৈ পাঁচদিনীয়া চাইকেল ৰেলী কাৰ্যসূচী হাতত লৈ সংৰক্ষিত বনাঞ্চলসমূহৰ সুৰক্ষা আৰু পৰিৱেশ সম্পর্কীয় অন্যান্য বিষয়ত মাত মাতিছিল। একেদৰে ২০১৫ চনত তিনিচুকীয়াৰ পৰা গুৱাহাটীলৈ পৰিৱেশ সুৰক্ষা সমিতি, অসমৰ কৰ্মীসকলে ২৪ দিনীয়া পদযাত্রা কাৰ্যসূচীৰ জৰিয়তে সংৰক্ষিত বনাঞ্চলসমূহৰ সুৰক্ষা আৰু পৰিৱেশ সম্পৰ্কীয় সজাগতা কার্যসূচী গ্রহণ কৰিছিল। সংৰক্ষিত বনাঞ্চলসমূহ বেদখল কৰা কাৰ্য কোনোধৰণেৰে গ্রহণীয় নহয়। যিহেতু সংৰক্ষিত বনাঞ্চলসমূহে অসমৰ জলবায়ু পৰিৱৰ্তন নিয়ন্ত্ৰণৰ ক্ষেত্ৰত বিশেষভাৱে সহায় কৰি আহিছিল। এই বনাঞ্চলসমূহত থকা চৰাই-চিৰিকটি তথা অন্যান্য বন্যপ্রাণী বেদখলৰ বাবে ধ্বংস হোৱাৰ উপক্রম হৈছিল। ১৯৭২ চনত প্ৰণয়ন কৰা বন্যপ্রাণী সুৰক্ষা আইন অনুসৰি সংৰক্ষিত বনাঞ্চল অধিগ্রহণ কৰা দোষীক কঠোৰ শাস্তি প্ৰদানৰ ব্যৱস্থা কৰা উচিত বুলিও পৰিৱেশ সুৰক্ষা সমিতি, অসমে সদৰী কৰে। 

সংৰক্ষিত বনাঞ্চলসমূহৰ মাটি বেদখল কৰি বসবাস কৰি থকা সন্দেহযুক্ত বিদেশী নাগৰিকসকলক উচ্ছেদ কৰা কাৰ্যক পৰিৱেশ সুৰক্ষা সমিতিয়ে সম্পূর্ণ সমৰ্থন আগবঢ়োৱাৰ উপৰি মুখ্যমন্ত্ৰীৰ এনে সাহসী পদক্ষেপত অসমৰ খিলঞ্জীয়া ৰাইজে সদায়ে কৃতজ্ঞ হৈ থাকিব বুলি উল্লেখ কৰে। পৰিৱেশ সুৰক্ষা সমিতিয়ে এনে উচ্ছেদ কাৰ্যক আদৰণি জনোৱাৰ লগতে ধন্যবাদ জ্ঞাপন কৰিছে। আনহাতে, এনে সাহসী পদক্ষেপৰ বাবে পৰিৱেশ সুৰক্ষা সমিতিয়ে বিশেষ মহাবীৰ লাচিত বৰফুকনৰ সাহসিকতা বঁটা প্ৰদান কৰাৰ ব্যৱস্থা কৰিছে আৰু ঘোষণা কৰিছে। এই সন্দৰ্ভত জিলা আয়ুক্তৰ জৰিয়তে মুখ্যমন্ত্ৰীলৈ পত্ৰ প্ৰেৰণ কৰা বুলিও তেওঁ সদৰী কৰে।

Share This