বিশ্বজুৰি বৃদ্ধি পাইছে ভূমিকম্পৰ সংখ্যা 

Dainik janambhumi March 02, 2025

ডিজিটেল ডেস্ক: যোৱা ২৬ ফেব্ৰুৱাৰীৰ নিশা ২-২৫ বজাত অহা ৫.১ প্রাবল্যৰ ভূমিকম্পই পুনৰ এবাৰ সৰ্বসাধাৰণক শংকিত কৰি তোলাৰ লগতে সম্প্ৰতি বৰভূঁইকঁপৰ সম্ভাৱনীয়তাক লৈ সৰ্বত্ৰ চৰ্চা আৰম্ভ হৈছে। উল্লেখযোগ্য যে যোৱা ২৩ জানুৱাৰীৰ নিশাও একে প্রাবল্যৰ এক ভূমিকম্পই ৰাজ্যৰ অধিকাংশ জিলাকো জোকাৰি গৈছিল। বিশ্বৰ পঞ্চম ভূমিকম্পপ্ৰৱণ মণ্ডলীয় অঞ্চলত আছে অসম। আনহাতে, ১৭ ফেব্ৰুৱাৰীত দিল্লী আৰু ২৫ ফেব্ৰুৱাৰীত বংগৰ উপকূলীয় অঞ্চলতো ভূমিকম্পৰ জোকাৰণি অনুভূত হোৱাৰ লগতে বংগৰ উপকূলীয় অঞ্চলৰ ভূমিকম্পৰো প্রাবল্য আছিল ৫.১। 

আনহাতে, দিল্লীৰ ভূমিকম্পটোৰ প্রাবল্য আছিল ৰিখটাৰ স্কেলত চাৰি। প্রণিধানযোগ্য যে ২৬ ফেব্ৰুৱাৰীৰ নিশাৰ ভূমিকম্পৰ উৎপত্তিস্থল মধ্য অসমৰ মৰিগাঁও জিলা। ভাৰত বিশ্বৰ আটাইতকৈ অধিক ভূমিকম্পপ্ৰৱণ স্থানৰ দ্বিতীয়, তৃতীয়, চতুর্থ আৰু পঞ্চম মণ্ডলত অন্তর্ভুক্ত। পঞ্চম মণ্ডলত আছে অসম। নগাঁও, কার্বি আংলং, শোণিতপুৰ, মৰিগাঁও, ওদালগুৰি আদি বিভিন্ন জিলা ইতিমধ্যেই ভূমিকম্পৰ উৎপত্তিস্থল হ'ব পাৰে বুলি ভূতাত্ত্বিক গৱেষণাত চিহ্নিত হোৱাৰ উপৰি অতিশয় ভূমিকম্পপ্ৰৱণ এলেকা ম্যানমাৰো দেশৰ সমীপতে। 

উল্লেখযোগ্য যে যোৱা ২৩ জানুৱাৰীৰ নিশা অনুভূত হোৱা ভূমিকম্পৰ উৎপত্তিস্থল আছিল এই ম্যানমাৰ। যোৱা ১০ বছৰে সমগ্র বিশ্বত ১৫,৩৩৫টা ভূমিকম্পৰ জোকাৰণি অনুভূত হোৱাৰ বিপৰীতে এই সময়ছোৱাত ৬-ৰ পৰা ৬.৯ প্রাবল্যৰ ভূমিকম্প হৈছে ১২৭টা। যাৰ বাবে জাপান, আফগানিস্তান, নেপাল, চীন আদি দেশত হাহাকাৰ পৰিস্থিতিৰ উদ্ভৱ হৈছিল। আনহাতে, ৫ৰ পৰা ৫.৯ প্রাবল্যৰ ভূমিকম্প হৈছে ১৪১৩টা। ইয়াতকৈ নিম্ন প্রাবল্যৰ ভূমিকম্প হৈছিল ১৩,৭৭৬টা। ইপিনে, ২০২৫ চনৰ আজিৰ তাৰিখলৈকে সমগ্র বিশ্বত ভূমিকম্প হৈছে ১৯৭৪টা। বছৰটোৰ মাত্ৰ দুটা মাহৰ ভিতৰতে হোৱা এনে পৰিমাণৰ ভূমিকম্পৰ ভিতৰত আঠটাৰ প্রাবল্য ৰিখটাৰ স্কেলত ছয়তকৈ অধিক। পাঁচতকৈ অধিক প্রাবল্যৰ ভূমিকম্পৰ সংখ্যা হৈছে ২৩৬টা। আনহাতে, ফেব্ৰুৱাৰীতে এটা ভূমিকম্পৰ প্রাবল্য প্রায় সাতৰ ওচৰা-উচৰি হৈছিল। বিশ্বৰ ভূতাত্ত্বিক ভূভৌতিক গৱেষণাৰে জড়িত বিজ্ঞানীসকলে প্রকাশ কৰা বিভিন্ন তথ্যত ক্রমান্বয়ে ভূমিকম্পৰ সংখ্যা বৃদ্ধি পোৱাটো স্পষ্ট কৰিছে। উল্লেখযোগ্য যে ভাৰতত অৱস্থিত ভাৰতীয় আৰু ইউৰ'-এছিয়া টেকটনিকপ্লেটৰ ওপৰত। এই প্লেটৰ হেঁচা উত্তৰে যথেষ্ট বৃদ্ধি পাইছে। বছৰি পাঁচ ছেণ্টিমিটাৰকৈ আগবাঢ়ি থকা এই প্লেটৰ সংঘৰ্ষই ছিকিম আৰু হিমালয়ান ক্ষেত্রত ভূমিকম্পৰ বিপদ ক্রমান্বয়ে বৃদ্ধি কৰিছে। আনহাতে, দেশৰ ৫৯ শতাংশ অঞ্চল দ্বিতীয় মণ্ডলৰ ভূমিকম্পপ্ৰৱণ অঞ্চলৰ অন্তৰ্ভুক্ত হোৱাৰ উপৰি পঞ্চম মণ্ডলৰ অন্তর্ভুক্ত অসম তথা দেশৰ উত্তৰ-পূৰ্বাঞ্চলৰ ৰাজ্যসমূহক লৈ ১১ শতাংশ অঞ্চল এই পঞ্চম মণ্ডলৰ অতি ভূমিকম্পপ্ৰৱণ এলেকাৰ অন্তৰ্ভুক্ত। দেশৰ ১৮ শতাংশ অঞ্চল চতুৰ্থ আৰু ৩০ শতাংশ অঞ্চল অন্তর্ভুক্ত তৃতীয় ভূমিকম্পপ্ৰৱণ মণ্ডলত। 

উল্লেখযোগ্য যে সমগ্র দেশৰ লগতে দেশৰ উত্তৰ-পূৰ্বাঞ্চল অতি ভূমিকম্পপ্ৰৱণ অঞ্চলৰ ভিতৰত অন্তর্ভুক্ত। হায়দৰাবাদস্থিত ভূতাত্ত্বিক গৱেষণা কেন্দ্ৰত ভূমিকম্পক লৈ নিৰন্তৰ গৱেষণা অব্যাহত আছে। পৃথিৱীৰ অন্তর্ভাগত দৈনিক ভূতাত্ত্বিক ক্রিয়া চলি থাকে আৰু ইয়াৰ ফলত দৈনিক ভূমিকম্প সংঘটিত হয় যদিও ইয়াৰ কিছুমানৰ জোকাৰণিহে অনুভূত হয়। উল্লেখযোগ্য যে যোৱা জানুৱাৰীতে বিশ্বজুৰি সাত শতাধিক ভূমিকম্পৰ জোকাৰণি অনুভূত হোৱাৰ লগতে আমাৰ ৰাজ্যত একাধিক জিলাত অনুভূত হৈছিল। দেশ আৰু ৰাজ্যত এইদৰে ভূমিকম্পৰ আশংকা তথা প্রত্যাহ্বান বৃদ্ধি পাই অহাৰ সময়তো বিকাশ আৰু উন্নয়নৰ নামত বিভিন্ন নির্মাণকার্য চলি আহিছে। এই সৰু-বৰ আৰু চৰকাৰী-বেচৰকাৰী সকলো নিৰ্মাণকাৰ্য কিমান সুপৰিকল্পিত আৰু ভূমিকম্পৰে মোকাবিলা কৰিব পৰাকৈ কৰা হৈছেনে- তাৰ ওপৰতে নিৰ্ভৰ কৰিব আগত দিনৰ ক্ষয়-ক্ষতিৰ পৰিমাণ।

Share This