কামাখ্যা ধামত ই ডিৰ অভিযান

Dainik janambhumi January 24, 2025

ডিজিটেল ডেস্কঃ বিশ্বৰ ভিতৰতে অন্যতম প্রধান তীর্থস্থানৰূপে খ্যাত শক্তিপীঠ কামাখ্যা ধামত চলিল ই ডিৰ অভিযান। পূর্বে কামাখ্যা ধাম পৰিচালনা কৰা দেৱোত্তৰ ব'র্ডে বিয়াগোম হাৱালা কেলেংকাৰি সংঘটিত কৰাৰ অভিযোগত কেন্দ্রীয় চৰকাৰৰ অধীনস্থ আইন বলৱৎকাৰী সঞ্চালকালয়ে (এনফ'চমেণ্ট ডাইৰেক্টৰেট বা ই ডি) বৃহৎ অভিযান চলায়। দেৱোত্তৰ ব'ৰ্ডৰ কেইবাজনো প্রাক্তন বিষয়ববীয়াৰ ঘৰত ই ডিয়ে চলোৱা এই অভিযানক লৈ ব্যাপক চাঞ্চল্যৰ সৃষ্টি হৈছে।

প্রণিধানযোগ্য যে পৱিত্ৰ মা কামাখ্যা ধাম পৰিচালনা সমিতি দেৱোত্তৰ ব'ৰ্ডে প্রায় ১৬ বছৰ ধৰি সংঘটিত কৰি অহা বৃহৎ অর্থনৈতিক কেলেংকাৰিৰ তথ্য পোহৰলৈ আহিছে। প্রাপ্ত অভিযোগ অনুসৰি, ২০০৩ৰ পৰা ২০১৯ চনলৈ দেৱোত্তৰ ব'র্ডে প্রায় ৭.৬২ কোটি টকাৰ অনিয়ম সংঘটিত কৰিছিল। উক্ত অনিময়ৰ তদন্তৰ বাবেই কালি ই ডিয়ে ব'ৰ্ডৰ কেইবাজনো প্রাক্তন বিষয়ববীয়াৰ ঘৰত অভিযান চলোৱাৰ কথা আজি আনুষ্ঠানিকভাৱে প্রকাশ কৰে। ই ডিয়ে দেৱোত্তৰ ব'ৰ্ডৰ প্ৰাক্তন বিষয়ববীয়া ৰিজু প্ৰসাদ শৰ্মা, নৱকান্ত শৰ্মা, ধীৰাজ শৰ্মাকে ধৰি কেইবাজনো লোকৰ ঘৰত অভিযান চলায়।

অভিযানকালত ই ডিৰ দলটোৱে প্ৰায় ১.৮২ কোটি টকাৰ বীমা পলিচীৰ লগতে ২৭টা বেংক একাউণ্টৰ নথি জব্দ কৰে। লক্ষণীয় যে দেৱোত্তৰ ব'ৰ্ডে সংঘটিত কৰা অবৈধ ধনৰ লেনদেন সন্দৰ্ভত প্রথমে চি আই ডিত গোচৰ ৰুজু কৰা হৈছিল। এই গোচৰৰ পিছতে ই ডিয়েও সেই গোচৰটোকে লৈ তদন্ত আৰম্ভ কৰে। ই ডিয়ে অভিযানকালত বহুতো স্থাৱৰ-অস্থাৱৰ সম্পত্তিৰ গুৰুত্বপূৰ্ণ নথি-পত্ৰ জব্দ কৰে। ই ডিয়ে আজি এক প্রেছ বার্তাযোগে অভিযানৰ কথা ৰাজহুৱা কৰে। প্রণিধানযোগ্য যে কামাখ্যা ধাম পৰিচালনা কৰিবৰ বাবে প্ৰয়োজন হোৱা বিভিন্ন সামগ্রী ক্ৰয়ৰ নামত এই ধনৰ লেনদেন হৈছিল। ধন আত্মসাৎ কৰাৰ বাবে বহু ভুৱা প্ৰতিষ্ঠানৰ পৰা লাখ লাখ টকাৰ সামগ্ৰী ক্ৰয় কৰা দেখুৱাইছিল। আনকি এনেদৰে অবৈধভাৱে ধনৰ লেনদেন কৰা দেখুৱাবলৈ ভুৱা প্রতিষ্ঠান জন্ম দি বিল প্ৰস্তুত কৰি লৈছিল দেৱোত্তৰ ব'ৰ্ডৰ প্ৰাক্তন বিষয়ববীয়াসকলে। ই ডিৰ দলে অভিযানকালত ভুৱা ব্যাৱসায়িক প্ৰতিষ্ঠানৰ নথি প্ৰস্তুত কৰাৰ প্ৰমাণ লাভ কৰে। ব'র্ডে যিবোৰ সামগ্ৰী ক্ৰয়ৰ নামত ধন হৰণলুকী কৰিছিল, সেই সামগ্ৰীৰ ভিতৰত চিমেণ্ট, ঘৰ মচা ৰাসায়নিক সামগ্রী, বৈদ্যুতিক সামগ্রী অন্যতম।

কৰ্মচাৰীক প্ৰদান কৰিবলগীয়া দৰমহা আৰু অন্যান্য সেৱাৰ মূল্য আদায় দিয়াৰ নামতো ভুৱা বিল প্ৰস্তুত কৰি বহু পৰিমাণৰ ধন সেই সময়ৰ দেৱোত্তৰ ব'ৰ্ডৰ বিষয়ববীয়াসকলে আত্মসাৎ কৰিছিল। প্ৰাথমিক অনুসন্ধানত আত্মসাৎ কৰা মন্দিৰৰ ধনসমূহ মুখ্যতঃ ৰিজু প্ৰসাদ শৰ্মা, নৱকান্ত শৰ্মা আৰু প্ৰয়াত ধীৰাজ শৰ্মাৰ একাউণ্টত সোমাইছিল বুলি তথ্য লাভ কৰা গৈছে। আনহাতে তেওঁলোকে যিবোৰ ভুৱা বিল প্ৰস্তুত কৰি ধন আত্মসাৎ কৰিছিল সেই বিলবোৰ ৫০ হাজাৰতকৈ কম আছিল। অতি সুপৰিকল্পিতভাৱে তেওঁলোকে এই কাম কৰিছিল। কাৰণ কামাখ্যা ধামৰ পুঁজিৰ পৰা ৫০ হাজাৰতকৈ অধিক টকা ব্যয় কৰিবলগীয়া হ'লে দেৱোত্তৰ ব'ৰ্ডে কামৰূপ (মঃ) জিলাৰ আয়ুক্তৰ পৰা (তেতিয়াৰ উপায়ুক্ত) স্বাক্ষৰ তথা অনুমতি ল'ব লাগে। এই অনুমতি অবিহনে ধামৰ পুঁজিৰ পৰা ৫০ হাজাৰতকৈ অধিক ধন মোকলাব নোৱাৰে। তাৰ তলৰ পৰিমাণ দেৱোত্তৰ ব'ৰ্ডে নিজাকৈ ব্যয় কৰাৰ অনুমতি আছে। তাৰেই সুযোগ লৈ তেওঁলোকে ধাৰাবাহিকভাবে ভুৱা বিল প্ৰস্তুত কৰি চাৰে সাত কোটিতকৈ অধিক ধন আত্মসাৎ কৰিছিল।

Share This