ৰাজ্যত প্ৰৱৰ্তন হ'ব নম্বৰবিহীন শিক্ষা 

dainik janambhumi February 14, 2025

ডিজিটেল ডেস্ক: ৰাষ্ট্ৰীয় শিক্ষা নীতি ২০২০ৰ আধাৰত পোন প্ৰথমবাৰৰ বাবে ৰাজ্যত নম্বৰ বিহীন শিক্ষা ব্যৱস্থা আৰম্ভ হ'ব। পাঠ মুখস্থ ৰাখি শিক্ষার্থীয়ে পৰীক্ষাত নম্বৰ লাভ কৰিছিল যদিও ২০২৫-২৬ শৈক্ষিক বৰ্ষৰ পৰা নম্বৰবিহীন অৰ্থাৎ প্রতিযোগিতামূলক ব্যৱস্থাহে প্ৰৱৰ্তন হ'ব। এই ব্যৱস্থা প্রথম অৱস্থাত প্ৰথম আৰু দ্বিতীয় শ্ৰেণীত আৰম্ভ হ'ব যদিও পৰৱৰ্তী পৰ্যায়ত অষ্টম শ্ৰেণীলৈ নম্বৰবিহীন শিক্ষা ব্যৱস্থাক আগুৱাই নিয়া হ'ব। 

ৰাজ্যিক শিক্ষা গৱেষণা আৰু প্ৰশিক্ষণ পৰিষদে (এছ চি ই আৰ টি) ৮ পৃষ্ঠাৰ শিক্ষাৰ্থীৰ সৰ্বাংগীণ অগ্ৰগতিৰ খতিয়ান পঞ্জী, অর্থাৎ ৰিপ'ৰ্ট কার্ড প্ৰস্তুত কৰি উলিয়াইছে। এই ব্যৱস্থাত শিক্ষাৰ্থীৰ বাবে কোনো নম্বৰ নাথাকিব যদিও শিক্ষার্থীজন কোনটো স্তৰত আছে সেই কথা শিক্ষকে নিৰূপণ কৰিব। বুনিয়াদী জ্ঞানৰ ক্ষেত্ৰত যিগৰাকী শিক্ষাৰ্থীক শিক্ষকৰ সহায়ৰ প্ৰয়োজন হ'ব তেওঁক শিক্ষকে এটা তৰাযুক্ত বুলি গণ্য কৰিব। যিগৰাকী শিক্ষার্থীয়ে কিছুপৰিমাণে বুনিয়াদী জ্ঞান আহৰণ কৰিছে যদিও শিক্ষকৰ সহায়ৰ প্রয়োজন হৈয়ে আছে তেওঁক দুটা তৰাযুক্ত আৰু যিগৰাকী শিক্ষাৰ্থীক শিক্ষকৰ সহায়ৰ প্ৰয়োজন হোৱা নাই তেওঁ তিনিটা তৰাযুক্ত বুলি ৰিপ'ৰ্ট কাৰ্ডত লিপিবদ্ধ কৰিব। নামভৰ্তিৰ সময়ৰ পৰা প্ৰতি তিনি মাহৰ মূৰে মূৰে শিক্ষকে শিক্ষার্থীক পৰ্যবেক্ষণৰ অন্তত ৰিপ'ৰ্ট কাৰ্ডত মান নিৰূপণ কৰিব। 

নম্বৰ বিহীন এই নতুন ব্যৱস্থাৰ কথা সংবাদ মাধ্যমক জানিবলৈ দিলে এছ চি আৰ টিৰ সঞ্চালক ড° নিৰদা দেৱীয়ে। তেওঁ কয় যে এই নতুন ব্যৱস্থাত প্রথমে ফাউণ্ডেশ্যন লেভেল, অর্থাৎ প্রথম আৰু দ্বিতীয় শ্রেণীত কৰা হ'ব। পৰৱৰ্তী সময়ত প্রিপেৰটৰী পাৰ্যয়ত কৰাৰ পাছত অষ্টম শ্ৰেণীলৈ নম্বৰ বিহীন শিক্ষা ব্যৱস্থা প্ৰৱৰ্তন কৰা হ'ব। এই ব্যৱস্থাত শিক্ষাৰ্থীক চাৰিটা স্তৰত গ্রেড দিয়া হ'ব। শিক্ষকে শিক্ষাৰ্থীক চাৰিটা গ্রেড ক্রমে প্রাথমিক, অগ্রগতি, দক্ষ আৰু উন্নত বুলি পৰ্যবেক্ষণৰ অন্তত নিৰূপণ কৰিব। ড° দেৱীয়ে কয় যে আগতে মুখস্থ ৰখিও শিক্ষার্থীয়ে নম্বৰ লাভ কৰিব পাৰিছিল। নতুন ব্যৱস্থাত প্রতিযোগিতাৰ ওপৰত গুৰুত্ব আৰোপ কৰা হৈছে। এই নম্বৰবিহীন ব্যৱস্থা শিক্ষাৰ্থীৰ মাজত প্ৰৱৰ্তন কৰাৰ আগতে শিক্ষকৰ মাজত প্ৰশিক্ষণৰ প্ৰয়োজন হ'ব আৰু ইয়াৰ বাবে এছ চি ই আৰ টিয়ে নীতি-নিৰ্দেশনা প্ৰস্তুত কৰি উলিয়াইছে।

Share This