কেইবাবছৰীয়া প্ৰেমৰ সফল পৰিসমাপ্তি, এখন চৰ্চিত বিয়া 

Kakali Deka January 24, 2025

ডিজিটেল ডেস্ক: প্ৰেম অন্ধ।ভালপোৱাই নামানে যেন বয়সৰ বাধা।বয়সে চেৰ পেলাব নোৱাৰে এওঁলোকক। এদিন-দুদিনকৈ উকলি যোৱা জীৱনৰ বিয়লি বেলাতো মিলন হয় প্ৰিয়জনৰ সৈতে সেয়ে বয়সৰ কথা নাভাবি জীৱনৰ বিয়লি বেলাত আৰম্ভ কৰিব লৈ ওলাইছে যুগ্ম জীৱনৰ। সমাজক সাক্ষী কৰি গাত মাহ-হালধি ঘঁহি আজি সম্পন্ন হ'ল এহাল ককা-আইতাৰ বিয়া।

ককাৰ বয়স ৭১ বছৰ আৰু আইতাৰ বয়স ৬৫ বছৰ।কেইবাবছৰীয়া প্ৰেমৰ অন্তত জীৱনৰ বিয়লি বেলাত যুগ্ম জীৱন আৰম্ভ কৰিলে ককা-আইতাই ।৭১ বছৰীয়া ককা পদ্মেশ্বৰ গোৱালাৰ জীৱন সংগী হ’ল ৬৫ বছৰীয়া আইতা জয়াপ্ৰভা বৰা।

প্ৰেম চাগে এনেকুৱাই…! হয়তো নেদেখাজনেও তেনেকৈ লিখিছিল তেওঁলোকৰ জীৱন কাহিনী। বেলতলাৰ প্ৰমোদ তালুকদাৰ সোঁৱৰণী বৃদ্ধাৱাসত বাস কৰা ককা পদ্মেশ্বৰ গোৱালাই বিয়া পাতিলে মঠঘৰীয়াৰ মাতৃ নিৱাসত বাস কৰা আইতা জয়াপ্ৰভা বৰাক।

ককা আইতাৰ বিয়াখনক লৈ দুয়োখন বৃদ্ধা আৱাসতে আজি উদুলি-মুদুলি পৰিৱেশে বিৰাজ কৰিছিল।
আনহাতে তেওঁলোকৰ বিয়াৰ বাতৰিয়ে ৰাইজৰ মাজত উৎসুকতাৰ সৃষ্টি কৰিছে।আপোনজনৰ পৰা আঁতৰি থকা দুটা মনে অৱশেষত বিচাৰি পালে এটি নতুন ঠিকনা। আইতায়ে জীৱনসংগী হোৱাৰ প্ৰতিশ্ৰুতি দিয়াৰ পিছতে হাঁহি জিলিকি উঠিছে ককাৰ মনত। সঁচাকৈ কি নিৰ্ভেজাল প্ৰেম!

Share This