বনৰীয়া হাতীৰ আক্ৰমণত মাতৃ -কন্যাৰ মৃত্যু 

dainik janambhumi January 29, 2025

ডিজিটেল ডেস্কঃ: ওদালগুৰি জিলাৰ ভাৰত-ভূটান সীমান্তত সঘনাই বৃদ্ধি পাইছে হাতী-মানুহৰ সংঘাত।ভূটান সীমান্তৱৰ্তী অঞ্চলত হাতীৰ সন্ত্ৰাসৰ পৰিণতিত নিদ্রা হৰণ হৈছে সাধাৰণ জনতাৰ। ইয়াৰ মাজতে ওদালগুৰি জিলাৰ ডিমাকুছি থানাৰ অন্তৰ্গত শান্তিপুৰত সোমবাৰে পুৱতি নিশা বনৰীয়া হাতীৰ আক্ৰমণত একেটা পৰিয়ালৰে ৬০ বছৰীয়া লালমেক কৰ্মকাৰ নামৰ মহিলাগৰাকীৰ লগতে ৪০ বছৰীয়া অকু কৰ্মকাৰ নামৰ কন্যাগৰাকীৰ মৃত্যু হোৱা ঘটনাই অঞ্চলটোত চাঞ্চল্যৰ সৃষ্টি কৰিছে।

আনহাতে একেটা ঘটনাত কথমপি প্ৰাণ ৰক্ষা পৰে শিশুসহ তিনিগৰাকী ব্যক্তিৰ। জানিব পৰা অনুসৰি, সোমবাৰে পুৱতি নিশা ঘৰত শুই থকা অৱস্থাতেই এই কৰুণ ঘটনাটো সংঘটিত হয়। ইফালে কেইবামাহ ধৰি বৰংগাজুলি চাহ বাগিচাত আশ্ৰয় লৈ থকা হাতীৰ পালক খেদি পঠিয়াবলৈ ব্যর্থ হৈছে বন বিভাগ।

স্থানীয় ৰাইজে ক্ষোভ উজাৰিছে বন বিভাগ আৰু প্ৰশাসনৰ বিৰুদ্ধে। অঞ্চলটোত বৃদ্ধি পোৱা হাতী-মানুহৰ সংঘাতৰ বাবে চৰকাৰ-প্ৰশাসন আৰু বন বিভাগকে জগৰীয়া কৰে সচেতন যুৱ সমাজে। ইফালে বন বিভাগৰ সহযোগিতাতে এচাম বনদস্যুৱে জিলাখনৰ সেউজীয়া বনভূমি উদং কৰাৰ বাবেই এনেদৰে হাতী-মানুহৰ সংঘাত বৃদ্ধি পোৱা বুলি ৰাইজে অভিযোগ কৰিছে

Share This