মহানগৰীত আৰক্ষীৰে এনকাউণ্টাৰত চিলনী চোৰ গুলীবিদ্ধ

dainik janambhumi January 30, 2025

ডিজিটেল ডেস্ক : ৰাজ্যৰ ৰাজধানী গুৱাহাটী মহানগৰীত পুনৰ আৰক্ষীৰ এনকাউণ্টাৰ। আৰক্ষীক শাণিত অস্ত্ৰৰে আক্ৰমণ কৰি পলায়ন কৰিবলৈ চেষ্টা কৰা এটা চিলনী চোৰক ৰুধিবলৈ এইবাৰ আৰক্ষীয়ে গুলীচালনা কৰিবলৈ বাধ্য হয়। উল্লেখযোগ্য যে মঙলবাৰে বনফুল নগৰত বিজু শৰ্মা নামৰ এগৰাকী বয়সস্থ মহিলাক আক্ৰমণ কৰি বেগ কাঢ়ি নিয়াৰ লগতে মহিলাগৰাকীক গুৰুতৰভাৱে আহত কৰিছিল।

হাতীগাঁও আৰক্ষীয়ে এই কাম সংঘটিত কৰা জুৱেল খান নামৰ চোৰটোৰ সন্ধান লাভ কৰি মঙলবাৰে নিশা প্রায় ডেৰ বজাত গ্ৰেপ্তাৰ কৰিবলৈ অভিযান চলায়। এই অভিযানৰ সময়ত অভিযানকাৰী আৰক্ষীৰ দলটোক শাণিত অস্ত্ৰৰে আক্ৰমণ কৰি পলায়ন কৰাৰ চেষ্টা কৰে। ফলত আত্মৰক্ষাৰ লগতে চোৰটো ধৰিবৰ বাবে আৰক্ষীয়ে দুজাঁই গুলীচালনা কৰিবলৈ বাধ্য হয়। আৰক্ষীৰ এটা গুলীয়ে চিলনী চোৰটোৰ ভৰি ভেদ কৰি যায়। আহত চোৰটোক জি এম চি এইচত চিকিৎসা কৰি থকা হৈছে। উল্লেখযোগ্য যে ধৃত জুৱেল খানৰ ঘৰ হাতীগাঁৱৰ সিজুবাৰীৰ নৱজ্যোতি পথত।

আৰক্ষীয়ে ধৃত জুৱেল গুৱাহাটীৰ বহু চেইন চুৰি আৰু বাইক চুৰি কাণ্ডৰ সৈতে জড়িত থকাৰ তথ্য লাভ কৰা বুলি প্ৰকাশ কৰিছে। ধৃত চোৰটোৰ বিৰুদ্ধে হাতীগাঁও আৰু দিছপুৰ আৰক্ষী থানাত কেইবাটাও গোচৰ ৰুজু হৈ আছে বুলি আৰক্ষীয়ে প্ৰকাশ কৰে। ধৃত জুৱেলৰ ঘৰৰ পৰা আৰক্ষীয়ে কালি আক্ৰমণ কৰি কাঢ়ি নিয়া মহিলাগৰাকীৰ দুখন এ টি এম কাৰ্ডৰ লগতে এখন চুৰি স্কুটি উদ্ধাৰ কৰিবলৈ সক্ষম হয়।

Share This