গোলাঘাটৰ উৰিয়ামঘাটৰ ৩০খনৰো অধিক গাঁৱত অচিৰেই চলিব উচ্ছেদ অভিযান

dainik janambhumi July 18, 2025

ডিজিটেল ডেস্ক : গোলাঘাট জিলাৰ উৰিয়ামঘাট সীমান্তৰ বনাঞ্চলসমূহত অবৈধভাৱে বসবাস কৰি থকা হাজাৰ হাজাৰ সন্দেহজনক পৰিয়ালক উচ্ছেদ কৰিবৰ বাবে সাজু হৈ উঠিছে প্রশাসন। খুব কম দিনৰ ভিতৰতে এই অঞ্চলত বেদখল কৰি জুপুৰি সাজি থকা শশ পৰিয়ালক উচ্ছেদ চলোৱা হ'ব। প্রশাসনে জনোৱা মতে, সীমান্তৰ ৩০ খনতকৈ অধিক গাঁৱত চলিব উচ্ছেদ আৰু মুকলি কৰিব তিনি হাজাৰ বিঘাতকৈ অধিক ভূমি। সীমান্ত অঞ্চলটোত এই কেইদিন যুদ্ধংদেহি ৰূপত বন বিভাগৰ গুৱাহাটী, যোৰহাট আৰু গোলাঘাটৰ শীৰ্ষ বিষয়াসকল আহি পৰিস্থিতিৰ বুজ লৈ আছেহি। ভাগ ভাগকৈ স্থানীয় গাঁওপ্রধানসকলক লগত লৈ ড্ৰনৰ সহায়ত ক্ষিপ্র গতিত জৰীপ কাৰ্য চলাই থকা হৈছে। মন কৰিব লগা কথা যে নগাঁও, মৰিগাঁও, ধিং মৈৰাবাৰী, ৰূপহী, লাহৰিঘাট আদিৰ দৰে সন্দেহজনক লোকে ভৰি থকা ঠাইৰ পৰা কিছু বছৰ আগতে এই উৰিয়ামঘাট সীমান্তলৈ আহি বনাঞ্চল ধ্বংস কৰি থিতাপি লৈছিলহি। কালক্ৰমত এই লোকসকলেই এজেণ্টৰ দৰে কাম কৰি পুনৰ হাজাৰ হাজাৰ এনে সন্দেহজনক লোকক আনিবলৈ ধৰে। যাৰবাবে গোলাঘাট জিলাৰ এই সৰুপথাৰ সম-জিলাৰ জনগাঁথনিত তৎকালীনভাবে বেয়াকৈ প্ৰভাৱ পেলাবলৈ ল'লে। 

দৈয়াং নদীৰ কাষে কাষে থাকি নদীৰ বক্ষৰ পৰা শিল, গ্রেভেল খান্দি কম দিনৰ ভিতৰতে ধনী হৈ পৰিল। বহু অসমীয়া ব্যৱসায়ীয়ে এইসকল লোকৰ সৈতে হাত মিলাই শিল ব্যৱসায়ত জড়িত হৈ পৰে। জানিব পৰা মতে, উৰিয়ামঘাট সীমান্তৰ ১নং আৰু ২নং পিঠাঘাট, ১নং আৰু ২নং দয়ালপুৰ, দলনিপথাৰ, ১নং মাধুপুৰ, ২নং মধুপুৰ আৰু ৩নং মধুপুৰ, খেৰবাৰী, বিদ্যাপুৰ, জাহাজিবস্তি, থুৰিবাৰী, ৩নং ৰজাপুখুৰী, পঞ্চমুখী টেঙাতল আদি গাঁওসমূহত এনে সন্দেহজনক লোকে বসবাস কৰি আছে। তাৎপর্যপূর্ণ কথা যে বিগত সময়ত গাড়ী চোৰ, ডকাইতি, হত্যাকাণ্ড, ড্রাগ্‌ছ, নকল টকা, অবৈধ মাৰণাস্ত্ৰ সৰবৰাহ, চোৰাং গৰু সৰবৰাহ আদি কাৰ্যৰ লগত এইসকল সন্দেহজনক লোকে জড়িত হৈ আহিছিল। কিয়নো আৰক্ষীৰ হাতত গ্ৰেপ্তাৰ হোৱাৰ পাছত সিহঁতৰ পৰিচয়ৰ পৰাই এই সকলো কথা জানিব পৰা যায়। 

শেহতীয়াকৈ এই সন্দেহজনক লোকৰ এনে অতপালি হৈছিলগৈ যে খিলঞ্জীয়া লোকক ভয়-ভাবুকি দি সীমান্তৰ পৰায়েই খেদি পঠাইছিল। সেয়ে এই উৰিয়ামঘাট সীমান্তৰ পৰা সন্দেহজনক লোকক উচ্ছেদ কৰাৰ ক্ষেত্ৰত সকলো দল-সংগঠনে সমর্থন জনাইছে। উল্লেখযোগ্য যে গোলাঘাট জিলাৰ সীমান্তত প্রশাসনিক সুবিধাৰ বাবে এ বি আৰু চি নামেৰে তিনিটা ছেক্টৰত বিভক্ত কৰি থৈছে আৰু ইয়াত থকা ডিফু, দক্ষিণ নামবৰ আৰু ৰেংমা সংৰক্ষিত বনাঞ্চলকেইখন কেতিয়াবাই ধ্বংস হ'ল আৰু বনাঞ্চলৰ ঠাইত জনাঞ্চল হ'ল। এই জনাঞ্চলতেই সন্দেজনক লোকৰ বসতি হ'ল। গতিকে এই লোকসকলৰ উচ্ছেদ শীঘ্ৰে হ'ব লাগে বুলি দাবী উত্থাপন হৈছে আৰু সন্দেহজনক লোকৰ পক্ষ লোৱাসকলকো ৰাইজে চিনাক্ত কৰি থ'বলৈ সচেতন লোকে সকলোলৈকে আহ্বান জনাইছে।

Share This