ৰক্তৰঞ্জিত পাইকানৰ উচ্ছেদস্থলী

dainik janambhumi July 18, 2025

ডিজিটেল ডেস্কঃ গোৱালপাৰা জিলাৰ পাইকান সংৰক্ষিত বনাঞ্চলৰ অন্তৰ্গত বিদ্যাপাৰা, বেতবাৰী উচ্ছেদস্থলীৰ সংযোগী পথ এটা বন্ধ কৰি দিয়াক কেন্দ্ৰ কৰি আজি উচ্ছেদিত লোক আৰু আৰক্ষী-বনৰক্ষী বাহিনীৰে এক সংঘাতৰ সৃষ্টি হয়। এই সংঘাতে অৱশেষত গৈ ভয়াৱহ ৰূপ ধাৰণ কৰে। মুহূৰ্ততে উচ্ছেদস্থলী ৰণক্ষেত্ৰত পৰিণত হয়। আৰক্ষী-বনৰক্ষী বাহিনীয়ে বাধ্য হৈ গুলীবর্ষণ কৰে। এই গুলীত ছাকোৱাত আলী (১৯) নামৰ এজন যুৱকৰ মৃত্যু হোৱাৰ লগতে কুতুবুদ্দিন শেখ (২৫), আক্কাছ আলী (২৮) আৰু আমিৰ হামজা (২৭) গুলীবিদ্ধ হৈ আহত হয়। জানিব পৰা মতে আজি পুৱা প্রায় ৭-৩০ বজাত আৰক্ষী-বনৰক্ষীৰ যৌথ দল এটাই এখন এক্সকেভেটৰ লৈ উচ্ছেদস্থলী বদ্যাপাৰাৰ সৈতে যোগাযোগ কৰিব পৰা বেতবাৰীৰ পথ এটাত উপস্থিত হয়। পাছত পথছোৱা খান্দিবলৈ ধৰাত উচ্ছেদিত একাংশ লোকে পথটো খান্দি যোগাযোগ ব্যৱস্থা বন্ধ নকৰিবলৈ প্ৰতিবাদ কৰে। কাৰণ এই পথছোৱাৰে উচ্ছেদিত লোকসকলে যোগাযোগ কৰি আহিছে। প্রথম অৱস্থাত দুয়োপক্ষৰ মাজত বাক-বিতণ্ডা হয় যদিও পাছত আৰক্ষী-বনৰক্ষী বাহিনীৰ দলটোৱে পথ খন্দা কাম এৰি উভতি যাবলৈ ধৰোঁতে ঘটনাস্থলীত উপস্থিত থকা একাংশই ধৰ ধৰ, মাৰ মাৰকৈ চিঞৰি চিঞৰি ইটাৰ টুকুৰা-শিলগুটি আদিৰে আক্ৰমণ কৰিবলৈ ধৰে।

মুহূৰ্ততে চৌদিশৰ পৰা আৰক্ষী-বনৰক্ষীৰ বাহিনীক আক্ৰমণ কৰিবলৈ হাতে হাতে লাঠী-জোং, দা লৈ ওলাই আহে। ৰাইজৰ উগ্রমূর্তি দেখি বাহিনীটো দৌৰি দৌৰি পলাবলৈ চেষ্টা কৰে যদিও ইতিমধ্যে উত্তেজিত ৰাইজে তেওঁলোকক ঘেৰাও কৰি লৈ ইটাৰ টুকুৰা-শিলগুটিৰে আক্ৰমণ অব্যাহত ৰাখে। পাছত উত্তেজিত ৰাইজক নিয়ন্ত্রণ কৰিবলৈ আৰক্ষী-বনৰক্ষী বাহিনীয়ে শূন্যলৈ কেইবাজাঁই গুলী এৰে। এই গুলীত এজন উচ্ছেদিতৰ মৃত্যু হোৱাৰ লগতে আন তিনিজন গুলীবিদ্ধ হৈ আহত হয়। ইয়াৰে কুতুবুদ্দিনক সংকট অৱস্থাত উন্নত চিকিৎসাৰ বাবে গুৱাহাটীলৈ প্ৰেৰণ কৰা বুলি জানিব পৰা হৈছে। বাকী দুজন গোৱালপাৰা অসামৰিক চিকিৎসালয়ত চিকিৎসাধীন হৈ আছে। ইফালে এই আক্রমণত আৰক্ষী-বনৰক্ষী বাহিনীৰ দহজন আহত হোৱা বুলি জানিব পৰা গৈছে। ইয়াৰে বনপালক দুজন ক্রমে প্রসেনজিত নাথ আৰু দীপ দে', এজন ফৰেষ্ট গার্ড সঞ্জীৱ সান্দাল। বাকী পাঁচজন বন বিভাগৰ বেটেলিয়ন ক্রমে নীলিম আকাশ ভৰালী, প্রকাশ বৰ্মন, ৰাম ফিষ্ট আৰু ৰিবন দাস বুলি জানিব পৰা গৈছে। আহত আৰক্ষীৰ তালিকাখন পোৱা হোৱা নাই। এই ঘটনাৰ পাছতে সমগ্র জিলাখনতে এক আতংকৰ সৃষ্টি হয়। ঘটনাৰ লগে লগে জিলা আযুক্ত, আৰক্ষী অধীক্ষকে এক বিশাল নিৰাপত্তা বাহিনীৰ দল লৈ ঘটনাস্থলীত উপস্থিত হয়। ইফালে পৰিস্থিতি ক্ৰমাৎ উত্তপ্ত হৈ পৰে। এই পৰিস্থিতিৰ সুযোগ লৈ একাংশ দুর্বৃত্তই উচ্ছেদস্থলীত থকা বিদ্যাপাৰা মধ্য ইংৰাজী বিদ্যালয় আৰু কাষতে থকা এটা অংগনবাড়ী কেন্দ্রত অগ্নিসংযোগ কৰে। অৱশ্যে লগে লগে ঘটনাস্থলীত আৰক্ষী আৰু অগ্নিনির্বাপক বাহন গৈ পৰিস্থিতি নিয়ন্ত্ৰণ কৰিবলৈ সক্ষম হয়। এই ঘটনাত হাছিনুৰ ৰহমান আৰু আব্দুল ৰহিমক আৰক্ষীয়ে আটক কৰে। ইফালে দুপৰীয়া উপ-আৰক্ষী অধীক্ষকৰ নেতৃত্বত উচ্ছেদস্থলীলৈ যোৱা এটা বিশাল নিৰাপত্তা বাহিনীৰ ওপৰতো উত্তেজিত ৰাইজে জধে-মধে শিলগুটি নিক্ষেপ কৰাত কেইবাজনো আৰক্ষী আহত হোৱা বুলি জানিব পৰা গৈছে। ইফালে উচ্ছেদিত একাংশ লোকে অভিযোগ কৰা মতে আৰক্ষী-বনৰক্ষীৰ বাহিনীটোয়ে আমাৰ কোনো কথাই শুনা নাছিল। আনকি বহু বেয়া ব্যৱহাৰ কৰিছিল। আমি প্রথম অৱস্থাত একো কৰা নাই। বাহিনীটোয়ে গুলী মৰাৰ পাছতহে মানুহখিনি উত্তেজিত হৈ পৰিছিল বুলি জনায়। ইফালে ঘটনাৰ পাছতে আৰক্ষীয়ে উচ্ছেদস্থলীৰ সকলোবোৰ বাট-পথ বন্ধ কৰি বেৰিকেড বহুৱাই আৰক্ষী বাহিনী নিয়োগ কৰে। ঘটনাৰ পাছতে আমছু আৰু ছাত্ৰ মুক্তিৰ দল এটাই কৃষ্ণাই হাব্রঘাট মহাবিদ্যালয়ৰ কাষত তথা ৰিচুবেলপাৰা পথত থকা প্রথম বেৰিকেডৰ সন্মুখত পথৰ ওপৰতে আজি সংঘটিত হত্যাকাণ্ডৰ প্ৰতিবাদ জনায়। প্রতিবাদকাৰীসকলে বিভিন্ন শ্ল'গানেৰ পৰিৱেশ উত্তপ্ত কৰি তোলে।

আৰক্ষীয়ে পথটো মুকলি কৰি দিবলৈ নিৰ্দেশ দিয়াৰ পাছতে মুকলি নকৰাত লাঠীচালনা কৰি প্ৰতিবাদকাৰীক ছত্রভংগ দিয়ায়। এই লাঠীচালনাত ছাত্ৰ মুক্তিৰ হবিবুল হক আৰু আজিজ মোল্লা, আমছুৰ আনিমূল হককে ধৰি বহুকেইজন নিৰীহ লোক আহত হয়। আনকি অঞ্চলটোত কমাণ্ডোৰ এটা বিশাল বাহিনী উপস্থিত হৈ অঞ্চলটোৰ একাংশ নিৰীহ লোকক মাৰপিট কৰা বুলি অভিযোগ উঠিছে। ইফালে আজিৰ ঘটনাটোত এটা তৃতীয় পক্ষ জড়িত আছিল বুলি একাংশ উচ্ছেদিত লোকে মুকলিকৈ মত প্রকাশ কৰিছে। এই ঘটনাত অকল উচ্ছেদিত মানুহখিনিয়ে জড়িত নাছিল। উচ্ছেদিত মানুহখিনিক তৃতীয় পক্ষ এটাই উচটাই এই ঘটনাটো সংঘটিত কৰা বুলি সন্দেহ প্রকাশ কৰিছে। আজিৰ ঘটনাটোত উচ্ছেদ নোহোৱা অঞ্চলৰ পৰাও বহু মানুহে উচ্ছেদস্থলীত প্ৰৱেশ কৰি এই ঘটনাত জঁপিয়াই পৰিছিল। উচ্ছেদিত ৰাইজে ঘটনাটোৰ এক উচ্চ পৰ্যায়ৰ তদন্তৰ দাবী জনাইছে। ঘটনাস্থলীৰ পৰা উচ্ছেদিত ৰাইজে কেইবাটাও সজীৱ বন্দুকৰ গুলী উদ্ধাৰ কৰে। বাতৰি লিখাৰ পৰলৈ উচ্ছেদিত অঞ্চলটোৰ পৰিস্থিতি ক্রমে শান্ত হৈ পৰিছে। ইতিমধ্যে উচ্ছেদস্থলীত প্লাষ্টিক-তিপালৰ তলত আশ্ৰয় লৈ থকা উচ্ছেদিত লোকসকলক বাহিৰলৈ খেদি পঠিয়াইছে। উচ্ছেদস্থলীৰে যোগাযোগ কৰিব পৰা আটাইবোৰ বাট-পথ এক্সেভেটৰেৰে খান্দি বন্ধ কৰি দিছে। জানিব পৰা মতে উচ্ছেদস্থলীত প্রায় তিনিশটা পৰিয়ালে প্লাষ্টিক-তিপালৰ তলত দিন অতিবাহিত কৰি আহিছিল। সমগ্র অঞ্চলটোতে জিলা প্রশাসনে ১৬৩নং ধাৰাৰ অধীনত নিষেধাজ্ঞা জাৰি কৰিছে। বন বিভাগে উচ্ছেদ কৰা বনাঞ্চলৰ ভূমিত কোনোবা ব্যক্তিক দেখা মাত্রই গ্ৰেপ্তাৰ কৰাৰ প্ৰয়োজনীয় আইন জাৰি কৰিছে। আৰক্ষী-বনৰক্ষীৰ গুলীত নিহত হোৱা ছাকোৱাত আলীৰ মৃতদেহ মৰণোত্তৰ পৰীক্ষাৰ পাছত গোৱালপাৰা সদৰৰ কিছমদপুৰস্থিত জানাজা মাঠত সম্পন্ন কৰা হয়। ইফালে আজিৰ এই ঘটনাক গৰিহণা দিয়ে এ আই ইউ ডি এফৰ মুখপাত্র আব্দুল হাইয়ে।

Share This