উকিয়াম জলবিদ্যুৎ প্রকল্প ৰূপায়ণৰ চূড়ান্ত সিদ্ধান্ত লোৱা নাই চৰকাৰে

dainik janambhumi July 21, 2025

ডিজিটেল ডেস্ক : বিভিন্ন প্রকল্প স্থাপনৰ বাবে চলোৱা উচ্ছেদ অভিযানত খিলঞ্জীয়া লোকো ক্ষতিগ্রস্ত হোৱাত তীব্র ক্ষোভৰ সৃষ্টি হোৱাৰ সময়তে উকিয়ামৰ জলবিদ্যুৎ প্রকল্পক লৈ ৰাজ্য চৰকাৰে
স্থিতি স্পষ্ট কৰিবলৈ বাধ্য হ'ল। উল্লেখযোগ্য যে যোৱা ২ জুনত অসমৰ মুখ্যমন্ত্রী ড° হিমন্ত বিশ্ব শৰ্মা আৰু মেঘালয়ৰ মুখ্যমন্ত্ৰী কনৰাড চাংমাৰ মাজত হোৱা বৈঠকত কামৰূপ জিলাৰ অসম-মেঘালয় সীমান্তত অৱস্থিত কুলশী নদীৰ উকিয়ামত ৫৫ মেগাৱাট শক্তি উৎপাদনৰ ক্ষমতা থকা বহুমুখী জলবিদ্যুৎ প্রকল্প স্থাপনৰ সিদ্ধান্ত গ্ৰহণ কৰা হৈছিল। জলবিদ্যুৎ উৎপাদনৰ লগতে জলসিঞ্চন ব্যৱস্থা থকা প্রকল্পটো নিৰ্মাণৰ প্ৰস্তাৱৰ পাছতে অঞ্চলটোত বসবাস কৰা খিলঞ্জীয়া লোকসকলে উচ্ছেদৰ সন্মুখীন হোৱাৰ শংকা প্রকাশ কৰি তীব্র প্রতিবাদী কাৰ্যসূচী গ্ৰহণ কৰিছে। এই প্রকল্পটো নিৰ্মাণৰ বাবে প্রায় ২৬খন খিলঞ্জীয়া লোকৰ বসতি থকা গাঁও উচ্ছেদৰ কবলত পৰাৰ লগতে নামনিৰ প্ৰায় ৪০০ খন গাঁও আক্রান্ত হোৱাৰ সম্ভাৱনা আছে। 

শক্তি উৎপাদনৰ বাবে থলুৱা লোকৰ গাঁও উচ্ছেদক কেন্দ্ৰ কৰি হোৱা ক্ষোভৰ বাবে অৱশেষত ৰাজ্য চৰকাৰে স্থিতি স্পষ্ট কৰি কয় যে এই সিদ্ধান্ত চূড়ান্ত নহয়। সীমান্ত সুৰক্ষা উন্নয়ন বিভাগে প্রকল্পটোৰ সন্দৰ্ভত স্থিতি স্পষ্ট কৰি উল্লেখ কৰে যে ৰাইজৰ মাজত অশান্তি আৰু উদ্বেগৰ সৃষ্টি হৈছে। স্থানীয় লোকৰ মনত হোৱা উদ্বেগৰ প্ৰতি লক্ষ্য ৰাখি ৰাজ্য চৰকাৰে স্থানীয় জনগোষ্ঠীসমূহৰ মাজত সম্ভাব্য পৰিৱেশৰ প্ৰভাৱ, স্থানান্তৰ আৰু কৃষি¸ জীৱিকাৰ ওপৰত সম্ভাব্য বিৰূপ প্ৰভাৱৰ ওপৰত হোৱা আশংকা দূৰ কৰাৰ বাবে ব্যৱস্থা ল'ব। এইটো স্পষ্ট কৰা হৈছে যে প্ৰস্তাৱিত প্রকল্পটোৰ ৰূপায়ণৰ সন্দৰ্ভত অসম চৰকাৰে কোনো চূড়ান্ত সিদ্ধান্ত লোৱা নাই। 

ইয়াৰ উপৰি প্ৰকল্পৰ স্থানৰ ওপৰত ন্যায়িক বিষয়সমূহ বৰ্তমান অসম চৰকাৰ আৰু মেঘালয় চৰকাৰৰ মাজত আলোচনা চলি আছে। স্থানীয় সকলো সম্প্ৰদায়ৰ প্রতিনিধিকে ধৰি সকলো সংশ্লিষ্ট অংশীদাৰিত্ব থকা সংগঠনসমূহৰ লগতো আলোচনাৰ জৰিয়তে সমাধান কৰা হ'ব। অসম চৰকাৰে আশ্বাস দিয়ে যে ক্ষতিগ্রস্ত জনগোষ্ঠীসমূহৰ স্বাৰ্থ সুৰক্ষিত হ'ব আৰু ভৱিষ্যতে যিকোনো সিদ্ধান্ত স্বচ্ছভাৱে আৰু সকলো অংশীদাৰৰ সৈতে আলোচনাৰ অন্তত লোৱা হ'ব।

Share This