পদপথত বহু অট্টালিকাৰ অবৈধ নিৰ্মাণ 

dainik janambhumi February 03, 2025

ডিজিটেল ডেস্ক: গুৱাহাটীৰ বহু ব্যস্ত পথৰ পদপথসমূহত অবৈধভাৱে নিৰ্মাণ কাৰ্য আৰম্ভ হৈছে। বিশেষকৈ বিভিন্ন আৱাসিক অট্টালিকাৰ লগতে বাণিজ্যিক অট্টালিকাসমূহেও নিজা সুবিধা অনুসৰি পদপথসমূহ ওখ কৰি নিৰ্মাণ কৰি লৈছে। ফলত ব্যস্ত পদপথসমূহত পথাচাৰী অহা-যোৱা কৰাত অসুবিধাৰ সন্মুখীন হ'বলগীয়া হয়। 

এনেধৰণৰ বেদখল সন্দৰ্ভত কেইবাটাও অট্টালিকাৰ বিৰুদ্ধে অভিযোগ উত্থাপিত হোৱাত পৌৰ নিগমে উচ্ছেদ তথা অবৈধ নির্মাণকাৰ্য ভাঙি পথচাৰীৰ বাবে মুকলি কৰি দিছে। কিন্তু গুৱাহাটী মহানগৰীৰ মূল পথ জি এছ ৰ'ডৰ লগতে আৰ জি বৰুৱা ৰ'ড, জি এন বি ৰ'ড আদিত এনে দৃশ্য সুলভ। অট্টালিকাসমূহে নিজৰ সুচল যাতায়াতৰ বাবে অবৈধভাৱে নিৰ্মাণ কৰি আহিছে। এনেবোৰ ক্ষেত্ৰত গুৱাহাটী পৌৰ নিগম কর্তৃপক্ষ সৰৱ হোৱা দেখা নাযায়। এই অভিযোগ মহানগৰীৰ একাংশ পদপথ ব্যৱসায়ীৰ। 

সাধাৰণতে মহানগৰীৰ পদপথত বছৰ বছৰ ধৰি ক্ষুদ্ৰ ব্যৱসায় কৰি পৰিয়াল পোহপাল দি অহাসকলক বেদখল কৰা বুলি সঘনাই উচ্ছেদ কৰি থাকে। কিন্তু একাংশ ধনৱান ব্যক্তিয়ে খােদ পদপথত অবৈধ নির্মাণকার্য চলাই পথচাৰীক প্রত্যেকদিনে সমস্যাত পেলাই আহিছে। এইক্ষেত্ৰত পৌৰ নিগমে চকু মুদা কুলিৰ ভাও ধৰা বুলি সচেতন ৰাইজে পৌৰ নিগমৰ বিৰুদ্ধে ক্ষোভ প্রকাশ কৰি আহিছে।

Share This