পলাতক অভিযুক্ত স্বামী ৰফিকুল ইছলামক গুৱাহাটীত গ্ৰেপ্তাৰ

dainik janambhumi April 03, 2025

ডিজিটেল ডেস্কঃ বিগত বৰ্ষৰ ১৯ অক্টোবৰত চাপৰ থানাৰ অন্তৰ্গত টোকৰাবান্ধা গাঁৱত নিজ পত্নী ৰমেনা খাতুনক নৃশংসভাৱে হত্যা কৰাৰ অভিযোগত বুধবাৰে গুৱাহাটীৰ ভৰলুমুখ আৰক্ষীয়ে হত্যাকাৰী ৰফিকুল ইছলামক গ্রেপ্তাৰ কৰে। উল্লেখযোগ্য যে চাপৰৰ টোকৰাবান্ধা গাঁৱত সিদিনা সংঘটিত হৈছিল লোমহর্ষক হত্যাকাণ্ডটো। হত্যাকাণ্ড সংঘটিত হোৱাৰ এমাহৰ পাছত ১৮ নৱেম্বৰত নৃশংসভাৱে হত্যা কৰি গাঁতত পুতি থোৱা ৰমেনা খাতুনৰ অর্ধগলিত মৃতদেহ টোকৰাবান্ধা পাহাৰত অভিযান চলাই দণ্ডাধীশৰ উপস্থিতিত গুৱাহাটী, বিলাসীপাৰা আৰু চাপৰ আৰক্ষীয়ে এক্সকেভেটৰেৰে গাঁত খান্দি মৃতদেহ উদ্ধাৰ কৰিছিল।

 

জানিব পৰা মতে, ৰফিকুল ইছলাম নামৰ স্বামীয়ে একাংশ লোকৰ সহযোগত অতি নৃশংসভাৱে ৰমেনা খাতুনক হত্যা কৰি বস্তাত ভৰাই গাঁত খান্দি পুতি থৈছিল। জানিব পৰা মতে ৰফিকুল ইছলামৰ পত্নী ৰমেনা খাতুনৰ ঘৰ দক্ষিণ শালমাৰাৰ পাটাকাটা গাঁৱত। প্রায় চাৰি বছৰ পূৰ্বে ৰমেনা খাতুনৰ বিবাহ হৈছিল টোকৰাবান্ধা গাঁৱৰ ৰফিকুল ইছলামৰ সৈতে। তেতিয়াৰ পৰাই ৰফিকুল ইছলাম গুৱাহাটীত ই-ৰিক্সা চলাই জীৱন নিৰ্বাহ কৰিছিল আৰু দুয়ো স্বামী-স্ত্রী তাতে বসবাস কৰি আছিল।

 

ইমানেলৈকে সকলো ঠিকেই আছিল। কিন্তু কিছু দিন পিছৰ পৰা ৰফিকুল ইছলাম জড়িত হৈ পৰে লটাৰী খেলৰ লগত আৰু স্বামী-স্ত্ৰীৰ মাজত আৰম্ভ হয় ঘৰুৱা কন্দল। তাৰ পাছতে বিগত বৰ্ষৰ ১৯ অক্টোবৰৰ পৰা সন্ধানহীন হৈ আছিল ৰফিকুল ইছলামৰ পত্নী ৰমেনা খাতুন। ৰমেনা খাতুন সন্ধানহীন হৈ পৰাৰ পাছত ভৰলুমুখ থানাত ৰমেনা খাতুনৰ মাতৃয়ে এখন এজাহাৰ দাখিল কৰিছিল। উক্ত এজাহাৰৰ ভিত্তিতে গুৱাহাটীৰ আৰক্ষীয়ে গোচৰ নং 188/2024 ৰ অধীনত ভাৰতীয় ন্যায় সংহিতাৰ 61(2), 140(3) 140 (4)/142/249 (C) ধাৰাত গোচৰ ৰুজু কৰি তদন্ত আৰম্ভ কৰে।

 

উক্ত লোমহর্ষক হত্যাকাণ্ডৰ ঘটনাৰ লগত জড়িত থকাৰ সন্দেহত ভৰলুমুখ আৰক্ষীয়ে ৰফিকুলৰ ভাতৃ হাবিজুল ইছলামসহ কেইবাজন লোকক পূর্বেই গ্ৰেপ্তাৰ কৰিছিল। বিগত বৰ্ষৰ ১৯ অক্টোবৰৰ পৰা পলাতক হৈ আছিল ৰমেনা খাতুনৰ স্বামী তথা হত্যাকাৰী ৰফিকুল ইছলাম। আজি ভৰলুমুখ আৰক্ষীয়ে পলাতক তথা অভিযুক্ত হত্যাকাৰী ৰফিকুল ইছলামক গ্ৰেপ্তাৰ কৰে।

Share This