৬০% কাম সম্পূর্ণ হৈছে 'টুইন টাৱাৰ'ৰ

dainik janambhumi March 01, 2025

ডিজিটেল ডেস্ক: প্রতিশ্রুতি অনুসৰিয়েই গুৱাহাটীত নির্মাণ হৈ আছে টুইন টাৱাৰ। ইতিমধ্যে ৬০ শতাংশ কাম সম্পূৰ্ণ হৈছে টুইন টাৱাৰৰ। শুকুৰবাৰে এডভাণ্টেজ আছাম ২.০ সন্দৰ্ভত আয়োজন কৰা এখন সংবাদমেলত এই কথা প্রকাশ কৰিছে মুখ্যমন্ত্রী হিমন্ত বিশ্ব শর্মাই। এডভাণ্টেজ আছাম ১.০ক লৈ সমালোচনা কৰি যিসকলে টুইন টাৱাৰৰ প্ৰশ্ন সুধিছে তেওঁলোককক উদ্যেশ্যি মুখ্যমন্ত্ৰীগৰাকীয়ে কয়, 'টুইন টাৱাৰ নহ'ল বুলিও সমালোচনা হৈছে। কিন্তু কোনোবাই জানেনে টুইন টাৱাৰ ক'ত হৈ আছে? 

টুইন টাৱাৰৰ ৬০ শতাংশ কাম সম্পূর্ণ হৈছে। ৮০০ কোটি টকাৰে টুইন টাৱাৰ নিৰ্মাণ কৰা হৈছে।' আনহাতে, টুইন টাৱাৰ চাবলৈ কেইজন সাংবাদিক গৈছে বুলি প্রশ্ন তুলি তেওঁ লগতে কয় যে ৬০ শতাংশ কাম সম্পূর্ণ হোৱা প্রকল্পটো কোনেও চাব যোৱা নাই। বিধানসভাত কোনেও এই বিষয়ে এটা কথাও সোধা নাই। সকলোৱে ধৰিয়ে লৈছে যে টুইন টাৱাৰ অসমত নহ'বই বা নহ'লেই। মুখ্যমন্ত্রী ড° শর্মাই লগতে কয়, 'ইন্টিগ্রেটেড্ ডিৰেক্টৰেট কমপ্লেক্স যিটো নির্মাণ হৈ আছে, সেইটোৱেই আমাৰ টুইন টাৱাৰ। টুইন টাৱাৰৰ আৰ্হিতেই এই সংহত সচিবালয় চৌহদ নির্মাণ কৰি থকা হৈছে।

Share This