গুৱাহাটীৰ ভিভাণ্টাৰ সম্প্ৰসাৰণ আৰু উন্নীতকৰণত ২১.৫২ কোটি টকাৰ অনুমোদন ।

Kakali Deka March 10, 2025

ডিজিটেল ডেস্কঃ পৰ্যটনক প্ৰসাৰিত কৰাৰ লগতে পৰিবহণ সেৱা সুশৃংখলিত কৰিবলৈ অসম কেবিনেটে গুৱাহাটীৰ ভিভান্টা সম্প্ৰসাৰণ আৰু ৰাজ্যজুৰি অটোমেটেড ড্ৰাইভাৰ টেষ্টিং ট্ৰেক (এডিটিটি) স্থাপনকে ধৰি বৃহৎ পদক্ষেপত অনুমোদন জনাইছে। ছিডবি ক্লাষ্টাৰ ডেভেলপমেণ্ট ফাণ্ডৰ অধীনত প্ৰকল্পৰ বাবে অসমে ২১.৫২ কোটি টকাৰ অনুমোদন জনাইছে। ৰাজ্যজুৰি উদ্যোগসমূহৰ সবলীকৰণৰ ওপৰত গুৰুত্ব আৰোপ কৰি সুষম অৰ্থনৈতিক বৃদ্ধিৰ বাবে এই পদক্ষেপ।

ইয়াৰ উপৰি কেবিনেটে ভিভান্তা গুৱাহাটীৰ সম্প্ৰসাৰণ আৰু উন্নীতকৰণৰ বাবে পৰ্যটন বিভাগক ভূমি আবণ্টন অনুমোদন জনাইছে। এই পদক্ষেপৰ উদ্দেশ্য হৈছে পৰ্যটকক আকৰ্ষণ কৰাৰ লগতে অঞ্চলটোৰ আতিথ্য খণ্ডক শক্তিশালী কৰা।

যোৱা ৯ মাৰ্চ দেওবাৰে অনুষ্ঠিত কেবিনেট বৈঠকত এই সিদ্ধান্ত গ্ৰহণ কৰা হয়।

ৰাজ্যৰ আতিথ্যৰ আন্তঃগাঁথনি বৃদ্ধি কৰাৰ লগতে অধিক পৰ্যটকক আকৰ্ষণ কৰিবলৈ কেবিনেটে গুৱাহাটীৰ ভিভান্টাৰ সম্প্ৰসাৰণ আৰু উন্নীতকৰণৰ বাবে পৰ্যটন বিভাগক ভূমি আবণ্টন দিবলৈ অনুমোদন জনাইছে। এই পদক্ষেপৰ লক্ষ্য হৈছে চহৰখনক দৰ্শনাৰ্থীৰ বাবে এক প্ৰধান গন্তব্যস্থান হিচাপে প্ৰতিষ্ঠা কৰা।

অসম কেবিনেটে অধিক স্বচ্ছ, বৈজ্ঞানিক আৰু মানক ড্ৰাইভিং লাইচেন্স প্ৰদান প্ৰক্ৰিয়া সুনিশ্চিত কৰিবলৈ স্বয়ংক্ৰিয় চালক পৰীক্ষণ ট্ৰেক (এডিটিটি) সুবিধা থকা স্বীকৃতিপ্ৰাপ্ত চালক প্ৰশিক্ষণ কেন্দ্ৰ (এডিটিচি) স্থাপনত অনুমোদন জনায়। এই পদক্ষেপৰ লক্ষ্য হৈছে মানৱ হস্তক্ষেপ নাইকিয়া কৰা, প্ৰক্ৰিয়াটোক অধিক কাৰ্যক্ষম আৰু ন্যায্য কৰি তোলা।

বৰ্তমান ডিব্ৰুগড়, নগাঁও, বিশ্বনাথ, বৰপেটা আৰু কামৰূপ গ্ৰাম্যত এনে পাঁচটা এডিটিচি নিৰ্মাণৰ কাম চলি আছে। ইয়াৰ উপৰিও প্ৰতিটো বিধানসভা সমষ্টিত অন্ততঃ এখন এনে প্ৰশিক্ষণ বিদ্যালয় স্থাপনৰ পৰিকল্পনা কৰা হৈছে, যাৰ কাৰ্যকৰীকৰণৰ বাবে পৰিবহণ বিভাগে বিশদ নিৰ্দেশনা প্ৰস্তুত কৰিবলৈ ওলাইছে।

উৎস: প্ৰাগ নিউজ ডিজিটেল
 

Share This