বিশ্বৰ ষষ্ঠ সর্বোচ্চ শ্বহীদ স্মাৰক হ'ব গুৱাহাটীত

dainik janambhumi July 27, 2025

ডিজিটেল ডেস্ক : বিশ্বৰ ষষ্ঠ সর্বোচ্চ শ্বহীদ স্মাৰক ক্ষেত্ৰ হ'ব গুৱাহাটীত। অসম আন্দোলনৰ ৮৫৫গৰাকী শ্বহীদৰ স্মৃতি যাউতি-যুগমীয়া কৰাৰ উদ্দেশ্যে মহানগৰীৰ পশ্চিম বৰাগাঁৱত নিৰ্মাণ কৰি থকা হৈছে শ্বহীদ স্মাৰক উদ্যান। প্রায় ১৭৯ কোটি টকা বাজেটেৰে নিৰ্মাণ কৰি থকা শ্বহীদ ক্ষেত্ৰৰ স্মাৰকৰ উচ্চতা হ'ব ৬৭.২০ মিটাৰ (২২০.৪৭ ফুট)। পূর্ণগতিত নির্মাণকার্য চলি থকা শ্বহীদ স্মাৰক ক্ষেত্ৰৰ কাম-কাজ শনিবাৰে পৰিদৰ্শন কৰে অসম শক্তি বিভাগৰ মন্ত্ৰী অতুল বৰা আৰু আছুৰ এটা প্ৰতিনিধিৰ দলে। উল্লেখযোগ্য যে অসম আন্দোলনৰ ৮৫৫গৰাকী শ্বহীদৰ স্মৃতি যাউতি-যুগমীয়া কৰাৰ উদ্দেশ্যে অসম চৰকাৰে নিৰ্মাণ কৰি থকা শ্বহীদ স্মাৰক ক্ষেত্ৰৰ প্রথম পৰ্যায়ৰ কাম ইতিমধ্যে সম্পূৰ্ণ হৈছে। এই স্মাৰক বিশ্বৰ ষষ্ঠ সর্বোচ্চ শ্বহীদ স্মাৰক ক্ষেত্ৰ হিচাপে পৰিগণিত হ'ব। ইয়াৰ মূল স্মৃতিসৌধৰ উচ্চতা হ'ব ৬৭.২০ মিটাৰ (২২০.৪৭ ফুট)। তলৰ মহলাত থাকিব ৰিচেপশ্যন আৰু শ্বহীদৰ প্ৰতিমূর্তি। প্রথম মহলাত থাকিব এটা যোগ (মেডিটেশ্যন) কেন্দ্র। ভিউ পইণ্টৰ উচ্চতা হ'ব ৫১.৬০ মিটাৰ (১৬৯.২৯ ফুট)। ছার্ভিলেন্স কম, দুটা টিকট কাউণ্টাৰ থাকিব। 

অসম চুক্তি ৰূপায়ণ মন্ত্রী অতুল বৰাই সংবাদ মাধ্যমৰ আগত প্রকাশ কৰে যে শ্বহীদ স্মাৰক ক্ষেত্ৰৰ প্ৰথম পৰ্যায়ৰ কাম ইতিমধ্যে সম্পূর্ণ হৈছে। প্রথম পৰ্যায়ৰ কাম-কাজ সম্পূৰ্ণ কৰিবলৈ প্রায় ৯৫ কোটি টকা ব্যয় কৰা বুলি তেওঁ প্রকাশ কৰে। আনহাতে, দ্বিতীয় পৰ্যায়ৰ কাম-কাজখিনিৰ বাবে প্রস্তাৱিত বাজেট প্রায় ৮৪ কোটি টকা বুলিও মন্ত্রীজনে প্রকাশ কৰে। তেওঁ কয় যে দ্বিতীয় পর্যায়ত এটা প্রেক্ষাগৃহ তথা প্রদর্শনস্থলী (৫০০ আসনযুক্ত), এটা গেলেৰী, ১০০০ আসনযুক্ত লেজাৰ লাইট প্ৰদৰ্শনস্থলী, ৱাটাৰ শ্ব'ৰ মাল্টি মিডিয়া প্রজেকশ্যন, ষ্টাফ কোৱাৰ্টাৰ, এটা চাইকেল চলাবৰ বাবে বিশেষ সুবিধা (চাইকেল ট্রেক) নিৰ্মাণ কৰা হ'ব। মন্ত্ৰীজনে প্রকাশ কৰে যে সমগ্র প্রকল্পটো নিৰ্মাণ কৰাৰ বাবে মুঠ ১৭৯ কোটি টকাৰ বাজেট গ্ৰহণ কৰা হৈছে। প্রায় ১০০ বিঘা ভূমিত নিৰ্মাণ কৰা এই প্রকল্পটো নিৰ্মাণৰ দায়িত্বত আছে ছানৰাইজ এণ্টাৰপ্ৰাইজ। লক্ষণীয় যে প্রাক্তন মুখ্যমন্ত্রী সৰ্বানন্দ সোণোৱালৰ কাৰ্যকালত এই প্ৰকল্পৰ নিৰ্মাণকাৰ্য আৰম্ভ হৈছিল। ২০২০ চনৰ ১৬ ডিচেম্বৰত নিৰ্মাণকাৰ্য আৰম্ভ হৈছিল। মন্ত্রীজনে কয় যে অসম আন্দোলনৰ শ্বহীদৰ স্মৃতি যুগমীয়া কৰি এই প্ৰকল্পটো এক জাতীয় সম্পদলৈ পৰিণত হ'ব। ইতিমধ্যে প্ৰতিগৰাকী শ্বহীদৰ ফটো সংগ্ৰহ কৰি আছে। এই বৃহৎ স্মৃতিক্ষেত্রত সংৰক্ষণ কৰি ৰখাৰ বাবে মন্ত্রী অতুল বৰাই যদি কাৰোবাৰ লগত শ্বহীদৰ স্মৃতি, ফটো আছে তেতিয়া হ'লে বিভাগ নাইবা ছাত্ৰ সন্থাৰ লগত  যোগাযোগ কৰিবলৈ আহ্বান জনায়। 

লক্ষণীয় যে সদৌ অসম ছাত্র সন্থাৰ নেতৃত্বই ৩৬০গৰাকী শ্বহীদৰ ফটো সংগ্ৰহৰ দায়িত্ব লৈছে। ইতিমধ্যে প্রথম পৰ্যায়ৰ কাম-কাজ সম্পূর্ণ হৈছে আৰু দ্বিতীয় পৰ্যায়ৰ কাম আৰম্ভ হৈছে। বৰাগাঁৱত নির্মাণ হৈ থকা এই শ্বহীদ স্মাৰক ক্ষেত্ৰ আগন্তুক ১০ ডিচেম্বৰত হ'বলগীয়া শ্বহীদ দিৱসৰ পূৰ্বে ৰাইজৰ বাবে মুকলি কৰিবলৈ ৰাজ্য চৰকাৰে পৰিকল্পনা কৰা বুলিও মন্ত্ৰীজনে প্রকাশ কৰে। উল্লেখযোগ্য যে মন্ত্ৰী বৰাৰ সৈতে যোৱা আছুৰ দলটোক মুখ্য উপদেষ্টা ড° সমুজ্জ্বল কুমাৰ ভট্টাচাৰ্য, সভাপতি উৎপল শৰ্মা আৰু সাধাৰণ সম্পাদক সমীৰণ ফুকনে নেতৃত্ব প্রদান কৰে। আছুৰ দলটোৱে চৰকাৰে কৰি থকা নিৰ্মাণকাৰ্যত দৃষ্টি ৰাখিব বুলি প্রকাশ কৰে। উল্লেখযোগ্য যে উন্নত প্রযুক্তি আৰু আটকধুনীয়া আৰ্হিৰে নিৰ্মাণ কৰি থকা শ্বহীদ স্মাৰক ক্ষেত্ৰত অসম আন্দোলনৰ প্ৰতিমূর্তিও সংৰক্ষণ কৰাৰ পৰিকল্পনা কৰা হৈছে। আনহাতে, স্মাৰক ক্ষেত্ৰৰ সু-উচ্চ স্মৃতিসৌধটোৰ ওপৰৰ পৰা গুৱাহাটীৰ নৈসর্গিক সৌন্দর্য উপভোগ কৰিব পৰাৰ ব্যৱস্থাও কৰা হৈছে। স্মৃতিসৌধৰ ওপৰলৈ ভিউ পইন্ট পর্যন্ত উঠি যাবৰ বাবে লিফ্টৰ ব্যৱস্থা থাকিব বুলিও মন্ত্রীজনে প্রকাশ কৰে। 

আছুৰ মুখ্য উপদেষ্টা ড° সমুজ্জ্বল কুমাৰ ভট্টাচাৰ্যই প্রকাশ কৰে যে অসম আন্দোলনৰ শ্বহীদসকলৰ স্মৃতি যুগমীয়া কৰিবৰ বাবে আছুৱে কৰা আহ্বানৰ প্ৰতি সঁহাৰি জনাই অসম চৰকাৰে এই শ্বহীদ স্মাৰক উদ্যানখন নিৰ্মাণ কৰিবলৈ উদ্যোগ গ্রহণ কৰে। এই ক্ষেত্ৰ আটকধুনীয়াকৈ নিৰ্মাণ কৰিব লাগে বুলি উল্লেখ কৰি এই ক্ষেত্ৰ ঐতিহাসিক অসম আন্দোলনৰ হৃদপিণ্ড হ'ব বুলি কয়। পৃথিৱীৰ যিকোনো স্থানৰ পৰা কোনো লোক আহি ইয়াত উপস্থিত হ'লে যাতে ঐতিহাসিক অসম আন্দোলনৰ মূল সত্তাটো ইয়াত উপলব্ধি কৰিব পাৰে, জাতীয় শ্বহীদ আৰু নির্যাতিতসকলৰ ত্যাগক উপলব্ধি কৰিব পাৰে তেনে ভক্তিপূর্ণ পৰিৱেশত কাম-কাজ যাতে আগুৱাই যায় তাৰ আশা কৰে। আছুৰ সভাপতি উৎপল শৰ্মাই শ্বহীদসকললৈ উচিত সন্মান প্রদান কৰাটোক অধিক গুৰুত্ব দিবলৈ আহ্বান জনায়। অসম আন্দোলনৰ চাৰিটা দশকৰ পাছত শ্বহীদসকললৈ সন্মান জনাই এই শ্বহীদ স্মাৰক ক্ষেত্ৰ নির্মাণ হোৱাটো এক আৱেগৰ মুহূৰ্ত বুলিও তেওঁ কয়।

Share This