স্নাতক বিজ্ঞান শিক্ষক হ'ব পাৰিব প্রধান শিক্ষক

dainik janambhumi March 01, 2025

ডিজিটেল ডেস্ক: শিক্ষাৰ্থীৰ অভাৱৰ বাবে 'শিক্ষা ক্ষেত্ৰ' আঁচনিৰ অধীনত হাইস্কুলৰ লগত একত্ৰীকৰণ হোৱা মধ্য ইংৰাজী বিদ্যালয় আৰু মজলীয়া বিদ্যালয়ৰ স্নাতক বিজ্ঞান শিক্ষকসকলৰ প্ৰধান শিক্ষকৰ পদত নিযুক্তি হোৱাৰ পথ প্রশস্ত হৈ পৰিল। উল্লেখযোগ্য যে যিসমূহ এম ই বা এম ভি স্কুল হাইস্কুলৰ লগত একত্ৰীকৰণ হৈছিল সেই বিদ্যালয়সমূহত শিক্ষকতা কৰি থকা স্নাতক বিজ্ঞান শিক্ষকক প্ৰধান শিক্ষকৰ পদ লাভ কৰাত বাৰণ কৰিছিল শিক্ষা বিভাগে।

চৰকাৰৰ এই সিদ্ধান্তত ক্ষুব্ধ হৈ একাংশ স্নাতক বিজ্ঞান শিক্ষক উচ্চ ন্যায়ালয়ৰ দ্বাৰস্থ হৈছিল। উচ্চ ন্যায়ালয়ে গোচৰৰ ৰায় দিয়াৰ পূৰ্বে বিদ্যালয় শিক্ষা বিভাগে যোৱা ২১ ফেব্ৰুৱাৰীত প্রধান শিক্ষক নিযুক্তিৰ সেৱা বিধি সংশোধন কৰি জাৰি কৰা জাননীত একত্ৰিত এম ই আৰু এম ভি স্কুলৰ স্নাতক বিজ্ঞান শিক্ষকে প্রধান শিক্ষকৰ পদত নিযুক্তি লাভ কৰাৰ ক্ষেত্ৰত থকা বাধা প্রত্যাহাৰ কৰিছিল। আজি উচ্চ ন্যায়ালয়ে গোচৰটোৰ নিষ্পত্তি কৰি শিক্ষাৰ্থীৰ অভাৱত হাইস্কুলৰ লগত চামিল হ'বলগীয়া হোৱা এম ই আৰু এম ভি স্নাতক বিজ্ঞান শিক্ষকসকলকো প্রধান শিক্ষক হিচাপে নিযুক্তিৰ বাছনিৰ আওতালৈ আনিবলৈ নির্দেশ দিয়ে। 

লগতে যিসমূহ হাইস্কুলত স্নাতক বিজ্ঞান শিক্ষকসকলক বাদ দি প্রধান শিক্ষকৰ বাছনী প্রক্রিয়া চলিছিল সেই বিদ্যালয়সমূহত পুনৰ বাছনী প্রক্রিয়া চলাবলৈ নির্দেশ দিয়ে। বিদ্যালয় শিক্ষা বিভাগে প্রধান শিক্ষকৰ পদৰ সেৱা বিধি সলনি কৰিবলৈ বাধ্য হৈ পৰাৰ লগতে উচ্চ ন্যায়ালয়ৰ নিৰ্দেশৰ পাছত হাইস্কুলৰ লগত একত্ৰিত হ'বলগীয়া হোৱা এম ই আৰু এম ভি স্কুলৰ প্ৰায় দুহেজাৰ স্নাতক বিজ্ঞান শিক্ষকক জ্যেষ্ঠতাৰ ভিত্তিত প্রধান শিক্ষকৰ পদত নিযুক্তি লাভ কৰাৰ পথ প্ৰশস্ত হৈ পৰিল।

Share This