বিহুৰ পাছতহে হ'ব উচ্চতৰ মাধ্যমিক প্রথম বৰ্ষৰ বাকী পৰীক্ষা

dainik janambhumi March 25, 2025

ডিজিটেল ডেস্ক : ৰাজ্যৰ লাখ লাখ শিক্ষার্থীৰ জীৱনক লৈ চৰম হেতালি খেলি উচ্চতৰ মাধ্যমিক প্রথম বাৰ্ষিকৰ পৰীক্ষা স্থগিত ৰখাৰ পাছত এইবাৰ নতুন পৰীক্ষাৰ দিন ধাৰ্যৰ বাবে পঞ্চায়ত নিৰ্বাচনৰ দিন ঘোষণাৰ বাবে অপেক্ষা কৰিব অসম ৰাজ্যিক বিদ্যালয় শিক্ষা পৰিষদে। একাধিক বিষয়ৰ প্রশ্নকাকত ফাদিল হোৱাৰ পাছত বহুকেইটা বিষয়ৰ পৰীক্ষাৰ সূচী বাতিল কৰা পৰিষদে ব'হাগ বিহুৰ পাছত বিষয়কেইটাৰ পুনৰ পৰীক্ষা অনুষ্ঠিত কৰাৰ সিদ্ধান্ত গ্রহণ কৰিছে। আনহাতে, প্রশ্নকাকত ফাদিল হোৱা বিষয়টোৰ তদন্ত কৰাৰ বাবে চি আই ডিলৈ গোচৰ হস্তান্তৰ কৰা হৈছে। 

উল্লেখযোগ্য যে উচ্চতৰ মাধ্যমিক প্ৰথম বৰ্ষৰ চলি থকা পৰীক্ষাৰ গণিত বিষয়ৰ পাছত অর্থনীতি বিজ্ঞানৰ প্ৰশ্নকাকত ফাদিল হোৱাত উপায়হীন হৈ পৰা অসম ৰাজ্যিক বিদ্যালয় শিক্ষা পৰিষদে ২৪-২৯ মাৰ্চৰ ভিতৰত থকা সকলো পৰীক্ষা বাতিল কৰি দিয়ে। লাখ লাখ শিক্ষার্থীক চৰম অনিশ্চয়তাৰ মুখলৈ ঠেলি দিয়া পৰিষদে পুনৰ পৰীক্ষা অনুষ্ঠিত কৰাৰ বিষয়টোৰ আলোচনাৰ বাবে সোমবাৰে এখন গুৰুত্বপূৰ্ণ বৈঠকত মিলিত হয়। এই বৈঠকত বহাগ বিহুৰ পাছত বাকী থকা বিষয়কেইটাৰ পৰীক্ষা অনুষ্ঠিত কৰাৰ সিদ্ধান্ত গ্রহণ কৰে। অৱশ্যে, এতিয়াও পৰীক্ষাৰ দিন সন্দৰ্ভত নিশ্চিত সিদ্ধান্ত গ্রহণ কৰা হোৱা নাই। বিহুৰ পাছত পৰীক্ষা অনুষ্ঠিত হ'লেও পঞ্চায়ত নিৰ্বাচনৰ ওপৰতহে পৰীক্ষাৰ দিন নিশ্চিত কৰা হ'ব। ৰাজ্য চৰকাৰে ব'হাগ বিহুৰ পাছতে পঞ্চায়ত নিৰ্বাচনৰ দিন ঘোষণা কৰিব বুলি ইতিমধ্যে ঘোষণা কৰিছে। চৰকাৰে পঞ্চায়ত নিৰ্বাচনৰ দিন ঘোষণা কৰাৰ পাছতহে বিদ্যালয় শিক্ষা পৰিষদে পৰীক্ষাৰ নতুন সূচী ঘোষণা কৰিব। অৰ্থাৎ, নিৰ্বাচনৰ সূচীৰ সৈতে মিলাই পৰীক্ষাৰ সূচী চূড়ান্ত কৰা হ'ব। 

সোমবাৰে বৈঠকত এই সিদ্ধান্তই গ্রহণ কৰা হয়। প্রণিধানযোগ্য যে প্ৰাৰম্ভিক তদন্তত ৰাজ্যৰ ২১খন বিদ্যালয়ত প্রশ্নকাকতৰ পেকেটৰ ছীল খোলাৰ তথ্য লাভ কৰিছে বিদ্যালয় শিক্ষা পৰিষদে। অৱশ্যে, সকলো বিদ্যালয়ৰ পৰা প্ৰশ্নকাকত ভাইৰেল হোৱা নাছিল। লক্ষণীয় যে এতিয়াও কিছু শিক্ষানুষ্ঠানৰ তথ্য লাভ কৰিবলৈ বাকী থকাৰ পৰিপ্ৰেক্ষিতত পৰিষদে ব্যৱস্থা গ্রহণ কৰিবলগীয়া শিক্ষানুষ্ঠানৰ তালিকা দীঘলীয়া হোৱাৰ সম্ভাৱনা আছে। ইফালে কালিৰ বৈঠকত এই বৰ্ষৰ উচ্চতৰ মাধ্যমিকৰ পাঠ্যক্ৰমত কিছু সালসলনি কৰাৰ সিদ্ধান্ত গ্ৰহণ কৰে। এইবছৰৰ পাঠ্যক্ৰমত এ আই, চাইন লেংগুৱেজ আৰু ফাইনেন্সিয়েল লিটাৰেচাৰ বিষয় অন্তর্ভুক্ত কৰাৰ সিদ্ধান্ত গ্রহণ কৰা হয়। আনহাতে, ইতিমধ্যে প্রশ্নকাকতৰ পেকেট সময়তকৈ পূর্বে নীতিবহির্ভূতভাৱে খোলাৰ অভিযোগত স্বীকৃতি বাতিল কৰা আৰু অভিযুক্ত হোৱা শিক্ষানুষ্ঠানৰ বিৰুদ্ধে গোচৰ তৰিছে পৰিষদে। সোমবাৰে এই গোচৰ চি আই ডিলৈ স্থানান্তৰ কৰাৰ ব্যৱস্থা গ্রহণ কৰা হয়।

Share This